ລາວ-ຈີນ ເປີດໂຄງການຊ່ວຍເຫຼືອການສຶກສາທາງໄກ ຍົກລະດັບຂີດຄວາມສາມາດຄູອາຈານ ຊົນນະບົດ 1.000 ຄົນທົ່ວປະເທດ

ພິທີເປີດການຊ່ວຍເຫຼືອໂຄງການສຶກສາທາງໄກ (ພາກສ່ວນຊ່ວຍເຫຼືອທາງດ້ານເຕັກນິກ) ພາຍໃຕ້ທຶນຊ່ວຍເຫຼືອລ້າຈາກລັດຖະບານ ສປ ຈີນ ໄດ້ມີຂຶ້ນເມື່ອວັນທີ 22 ມີນາຜ່ານມາທີ່ໂຮງແຮມດອນຈັນພາເລດ ນະຄອນຫຼວງວຽງຈັນ, ໂດຍໃຫ້ກຽດເຂົ້າຮ່ວມຂອງທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະກິລາ (ສສກ), ທ່ານ ຈ້າວ ເວີຍຢູ ທີ່ປຶກສາດ້ານເສດຖະກິດ-ການຄ້າ ປະຈຳສະຖານເອກອັກຄະລັດຖະທູດ ສປ ຈີນ ປະຈຳ ສປປ ລາວ, ທ່ານ ມຽວ ຫົງຄາຍ (Miao Hongcai) ປະທານ ແລະບັນນາທິການສຳນັກພິມການສຶກສາຊຽງໄຮ ແລະທ່ານ ໄຊຊະນະ ສິດທິພອນ ຮອງປະທານຄະນະກຳມະການຮ່ວມມື ລາວ-ຈີນ ພ້ອມດ້ວຍບັນດາຫົວໜ້າ-ຮອງຫົວໜ້າກົມ ແລະພະນັກງານທີ່ກ່ຽວຂ້ອງຕະຫຼອດຮອດສື່ມວນຊົນເຂົ້າຮ່ວມ.

ໂອກາດນີ້, ທ່ານ ຮສ.ປອ ພຸດ ສິມມາລາວົງ ກ່າວວ່າ: ມື້ນີ້ສຸດທີ່ມີຄວາມປິຕິຊົມຊື່ນເປັນຢ່າງຍິ່ງ ທີ່ໄດ້ມີໂອກາດເຂົ້າຮ່ວມ "ພິທີເປີດໂຄງການສຶກສາທາງໄກຂອງ ສປປ ລາວ ພາຍໃຕ້ທຶນຊ່ວຍເຫຼືອລ້າຈາກລັດຖະບານ ສປ ຈີນ" ຮ່ວມກັບສໍານັກພິມການສຶກສາຊຽງໄຮ ທີ່ໄດ້ຕາງໜ້າໃຫ້ແກ່ລັດຖະບານ ສປ ຈີນ ໃນການຈັດຕັ້ງປະຕິບັດໂຄງການດັ່ງກ່າວ. ໃນນາມຕາງໜ້າລັດຖະບານ ສປປ ລາວ ກໍຄື ກະຊວງ ສສກ ຂໍສະແດງຄວາມຍ້ອງຍໍຊົມເຊີຍ ແລະ ຂອບໃຈຢ່າງສູງຕໍ່ລັດຖະບານ ແລະ ປະຊາຊົນ ສປ ຈີນ ທີ່ໄດ້ໃຫ້ການສະໜັບສະໜູນໃນການຈັດຕັ້ງປະຕິບັດໂຄງການດັ່ງກ່າວ, ຊຶ່ງເຫັນໄດ້ວ່າ ເປັນໂຄງການທີ່ເປັນຕົວແບບທີ່ດີໃນການປັບປຸງຄຸນນະພາບການສຶກສາ ໂດຍສະເພາະແມ່ນ ຄຸນນະພາບຂອງຄູສອນ ແລະ ຜູ້ບໍລິຫານການສຶກສາໃນຂັ້ນໂຮງຮຽນ, ຊຶ່ງເປັນປັດໃຈສຳຄັນໃນການປະກອບສ່ວນປັບປຸງຄຸນນະພາບການສຶກສາໂດຍລວມຂອງ ສປປ ລາວ. ເຖິງຢ່າງໃດກໍດີ, ຕະຫຼອດໄລຍະທີ່ຜ່ານມາ ລັດຖະບານ ສປ ຈີນ ໄດ້ໃຫ້ການສະໜັບສະໜູນຕໍ່ຂະແໜງການສຶກສາ ແລະ ກິລາມາຕັ້ງແຕ່ດົນນານ, ຊຶ່ງມີຫຼາຍໂຄງການທີ່ໄດ້ຮັບການສະໜັບສະໜູນໃນການຈັດຕັ້ງປະຕິບັດໃນໄລຍະຜ່ານມາ, ປັດຈຸບັນ ແລະ ຕໍ່ໜ້າ ເຊັ່ນ: ໂຄງການ ICT ໄລຍະທີ I (2011-2013) ເປັນໂຄງການກໍ່ສ້າງພື້ນຖານໂຄງລ່າງທາງດ້ານໄອຊີທີສໍາລັບການສຶກສາ ກໍຄື ການນໍາໃຊ້ໄອຊີທີເຂົ້າໃນການຮຽນການສອນ ເພື່ອສ້າງທັກສະໃຫ້ແກ່ຜູ້ຮຽນ ແລະ ຄູອາຈານ ມີມູນຄ່າທັງໝົດ 53 ລ້ານໂດລາສະຫະລັດ ເປັນທຶນທີ່ລັດຖະບານລາວ ກູ້ຢືມຈາກ ສປ ຈີນ. ໂຄງການດັ່ງກ່າວ ທີ່ໄດ້ຈັດຕັ້ງປະຕິບັດ ປະກອບມີ ສູນໄອຊີທີສູນກາງ ຕັ້ງຢູ່ ສສກ ເປັນສູນລວມຂໍ້ມູນຂ່າວສານຫຼັກ, ສູນໄອຊີທີການສຶກສາ ແລະ ກິລາ 16 ແຂວງ ແລະ 1 ນະຄອນຫຼວງ ແຕ່ລະສູນປະກອບດ້ວຍສິ່ງອຳນວຍຄວາມສະດວກທາງດ້ານໄອຊີທີສຳລັບການສຶກສາ ພ້ອມກັບຫ້ອງທົດລອງວິທະຍາສາດຈໍານວນໜຶ່ງ.

ໂຄງການກໍ່ສ້າງໂຮງຮຽນມັດທະຍົມສຶກສາສົມບູນເພຍວັດ, ໂຮງຮຽນມັດທະຍົມສຶກສາສົມບູນນາຊາຍທອງ ນະຄອນຫຼວງວຽງຈັນ ແລະ ໂຄງການກໍ່ສ້າງວິທະຍາໄລເຕັກນິກການລົດໄຟ ແມ່ນເປັນອີກ 3 ໂຄງການທີ່ລັດຖະບານ ສປປ ລາວ ໄດ້ຮັບການຊ່ວຍເຫຼືອລ້າຈາກລັດຖະບານ ສປ ຈີນ ແລະ ເຫັນວ່າມີຄວາມໝາຍຄວາມສໍາຄັນທີ່ຈະເຮັດໃຫ້ຄຸນນະພາບການສຶກສາຂອງລາວດີຂຶ້ນ ທັງເປັນສັນຍາລັກທີ່ບົ່ງບອກເຖິງຄວາມສາມັກຄີຮັກແພງ ລະຫວ່າງປະຊາຊົນ 2 ຊາດ ລາວ-ຈີນ ແລະ ຈີນ-ລາວ ອີກດ້ວຍ. ໃນຕໍ່ໜ້ານີ້, ລັດຖະບານ ສປ ຈີນ ຍັງສືບຕໍ່ໃຫ້ການຊ່ວຍເຫຼືອ ສປປ ລາວ ໃນການກໍ່ສ້າງພື້ນຖານໂຄງລ່າງທີ່ຈໍາເປັນຈໍານວນໜຶ່ງຕື່ມ ເຊັ່ນ: ໂຄງການປຸກສ້າງໂຮງຮຽນມັດທະຍົມສົມບູນຢູ່ 3 ແຂວງຂອງ ສປປ ລາວ ຄື: ໂຮງຮຽມັດທະຍົມສົມບູນສັນຕິພາບ ແຂວງຫຼວງພະບາງ, ໂຮງຮຽນມັດທະຍົມສົມບູນສະຫວັນ ແຂວງສະຫວັນນະເຂດ, ໂຮງຮຽນມັດທະຍົມສົມບູນປາກເຊ ແຂວງຈຳປາສັກ ແລະ ໂຄງການປຸກສ້າງວິທະຍາໄລເຕັກນິກວິຊາຊີບເຂດກວມລວມໄຊເສດຖາ ອີກດ້ວຍ.

ນອກຈາກນີ້, ໃນແຕ່ລະປີ ລັດຖະບານ ສປ ຈີນ ຍັງໄດ້ໃຫ້ທຶນສະໜັບສະໜູນໃນການໄປຝຶກອົບຮົມ, ສໍາມະນາໄລຍະສັ້ນ ເພື່ອຍົກລະດັບຄວາມອາດສາມາດໃຫ້ແກ່ພະນັກງານ-ລັດຖະກອນ ສປປ ລາວ, ໃຫ້ທຶນການສຶກສາຕໍ່ໃນລະດັບປະລິນຍາຕີ, ປະລິນຍາໂທ ແລະ ປະລິນຍາເອກ ເພື່ອພັດທະນາຊັບພະຍາກອນມະນຸດຂອງ ສປປ ລາວ ເປັນຈຳນວນຫຼວງຫຼາຍ, ຊຶ່ງເປັນການຊ່ວຍເຫຼືອທີ່ມີຄວາມສໍາຄັນ ແລະ ມີຜົນປະໂຫຍດຢ່າງໃຫຍ່ຫຼວງຕໍ່ ສປປ ລາວ ເວົ້າລວມ, ເວົ້າສະເພາະ ຂະແໜງການສຶກສາ ແລະ ກິລາ, ຊຶ່ງສາມາດແກ້ໄຂໄດ້ດ້ານການເຂົ້າເຖິງ ແລະ ການປັບປຸງຄຸນນະພາບການສຶກສາ ລວມທັງແກ້ໄຂຄວາມແຕກໂຕນທາງດ້ານການສຶກສາ ລະຫວ່າງ ເຂດຊົນນະບົດຫ່າງໄກສອກຫຼີກ ແລະ ເຂດຕົວເມືອງໄດ້ຫຍັບເຂົ້າຫາກັນດີຂຶ້ນເທື່ອລະກ້າວ. ສະນັ້ນ, ເພື່ອແບ່ງຂັ້ນຄວາມຮັບຜິດຊອບ ລະຫວ່າງ ຄະນະຮັບຜິດຊອບໂຄງການດັ່ງກ່າວ ແລະ ພາກສ່ວນທີ່ກ່ຽວຂ້ອງຕາມທິດທາງນະໂຍບາຍຂອງພັກ ແລະ ລັດຖະບານ ສປປ ລາວ ແລ້ວ, ຂ້າພະເຈົ້າຂໍຖືໂອກາດນີ້ ມອບ "ໂຄງການສຶກສາທາງໄກຂອງ ສປປ ລາວ ພາຍໃຕ້ທຶນຊ່ວຍເຫຼືອລ້າຈາກລັດຖະບານ ສປ ຈີນ" ທີ່ໄດ້ກ່າວມານີ້ ໃຫ້ແກ່ສູນເຕັກໂນໂລຊີຂ່າວສານ ແລະ ການສື່ສານການສຶກສາ ແລະ ກິລາ, ກົມສ້າງຄູ ແລະ ກົມແຜນການ ສສກ ເປັນເຈົ້າການໃນການຈັດຕັ້ງປະຕິບັດ ໂດຍສົມທົບກັບຫ້ອງການຄະນະກໍາມະການຮ່ວມມື ລາວ-ຈີນ ແລະ ທຸກພາກສ່ວນທີ່ກ່ຽວຂ້ອງ ເພື່ອເຮັດໃຫ້ການຈັດຕັ້ງປະຕິບັດໂຄງການດັ່ງກ່າວ ສາມາດບັນລຸໄດ້ຕາມແຜນການທີ່ວາງໄວ້ທຸກປະການ.

ໂຄງການສຶກສາທາງໄກຂອງ ສປປ ລາວ ພາຍໃຕ້ທຶນຊ່ວຍເຫຼືອລ້າຈາກລັດຖະບານ ສປ ຈີນ ຈະມີການດໍາເນີນການຝືກອົບຮົມອໍານວຍການ, ຄູອາຈານ, ພະນັກງານຄຸ້ມຄອງການສຶກສາ ແລະ ພະນັກງານ ໄອຊີທີ ຈໍານວນ 3.000 ຄົນ. ໃນນັ້ນ, 1.000 ຄົນຢູ່ ສປປ ລາວ ແລະ 2.000 ຄົນຢູ່ນະຄອນຊຽງໄຮ ສປ ຈີນ ເປັນໄລຍະໃນເວລາ 3 ປີ ໂດຍຈະມີການປັບປຸງຫ້ອງຮຽນ ແລະ ຕິດຕັ້ງອຸປະກອນຂອງໂຄງການ ເພື່ອຈະໄດ້ເປັນສະຖານທີ່ສໍາລັບການຝືກອົບຮົມ ແລະ ສຶກສາແບບທາງໄກໃນອະນາຄົດ.

ໂດຍ ສົງການ ພັນແພງດີ

แชร์