ດ່ານສາກົນນໍ້າພາວ ເຂັ້ມງວດສະກັດກັ້ນການຂົນສົ່ງສັດປ່າຜິດກົດໝາຍຂ້າມຊາຍແດນ

ເຈົ້າໜ້າທີ່ຈຳປະຈຳດ່ານສາກົນນໍ້າພາວ ເມືອງຄຳເກີດ ແຂວງບໍລິຄຳໄຊ ໄດ້ວາງມາດຕະການຢ່າງເຂັ້ມງວດເພື່ອສະກັດກັ້ນຕໍ່ການລັກລອບຂົນສົ່ງສັດປ່າຜິດກົດໝາຍຂ້າມຊາຍແດນ ໂດຍໄດ້ກວດລົດຂົນສົ່ງສິນຄ້າເຂົ້າ-ອອກ ປະເທດທຸກຄັນ ດ້ວຍການນຳໃຊ້ເຄື່ອງມືທີ່ທັນສະໄໝ ເອັກສະເລ ຢູ່ຈຸດສາງ, ສ່ວນລົດທ່ອງທ່ຽວ ຫລື ລົດປະເພດອື່ນໆ ທີ່ເຂົ້າ-ອອກດ່ານ ບັນດາຂະແໜງການທີ່ກ່ຽວຂ້ອງກໍໄດ້ເຂັ້ມງວດກວດກາເປັນປົກກະຕິ. ທັງນີ້,ກໍເພື່ອຫລີກລ້ຽງການນໍາເຂົ້າ-ສົ່ງອອກສິນຄ້າທີ່ຜິດໝາຍທຸກປະເພດ.

ໂອກາດນີ້, ທ່ານ ໄຊຊະນະ ວົງຊົມພູ ຮອງຫົວໜ້າດ່ານພາສີສາກົນນໍ້າພາວໃຫ້ສຳພາດຕໍ່ສື່ມວນຊົນ ໃນວັນທີ 22 ມີນາ 2023 ນີ້ວ່າ: ດ່ານສາກົນນໍ້າພາວ ໄດ້ເອົາໃຈໃສ່ຕໍ່ວຽກງານສະກັດກັ້ນການລັກລອບຂົນສົ່ງສັດປ່າທີ່ຜິດກົດໝາຍຂ້າມຊາຍແດນໂດຍໄດ້ກວດລົດຂົນສົ່ງສິນຄ້າເຂົ້າ-ອອກ ປະເທດທຸກຄັນໂດຍນຳໃຊ້ເຄື່ອງມືທີທັນສະໄໝ ເອັກສະເລ ຢູ່ຈຸດສາງ ສ່ວນລົດທ່ອງທ່ຽວ ຫລື ລົດປະເພດອື່ນໆ ທີ່ເຂົ້າ-ອອກດ່ານ ບັນດາຂະແໜງການທີ່ກ່ຽວຂ້ອງກໍໄດ້ເຂັ້ມງວດກວດກາເປັນປົກກະຕິ. ໃນ 1 ປີຜ່ານມາ ດ່ານສາກົນນໍ້າພາວ ຍັງບໍ່ກວດພົບການລັກລອບຂົນສົ່ງສັດປ່າທີ່ຜິດກົດໝາຍເທື່ອ, ແຕ່ເຖິ່ງຢ່າງໃດກໍຕາມ ໃນໄລຍະຜ່ານມາ ເຈົ້າໜ້າທີ່ ກໍສາມາດຢຶດສິນຄ້າປະເພດສັດປ່າທີ່ປະເພດຜິດກົດໝາຍຈຳນວນໜຶ່ງເຊິ່ງມີທັງສົ່ງອອກ ແລະນຳເຂົ້າໂດຍນຳໃຊ້ຮູບແບບຊຸກເຊື່ອງໄວ້ໃນລົດຂົນສົ່ງສິນຄ້າປະເພດອື່ນໆ ເຊິ່ງສ່ວນໃຫຍ່ຈະເປັນສາກສັດປ່າເຊັ່ນ: ໜັງເສືອ, ໜັງໝີ ໂດຍເຈົ້າໜ້າທີ່ໄດ້ຍຶດຂອງກາງພ້ອມທຳລາຍສິນຄ້າດັ່ງກ່າວ ແລະດຳເນີນຄະດີຕໍ່ຜູ້ກະທຳຜິດ.

ປັດຈຸບັນ, ພັກ ແລະລັດຖະບານໄດ້ຖືເອົາວຽກງານໂຄສະນາເຜີຍແຜ່ ແລະການສ້າງຈິດສຳນຶກໃຫ້ທົ່ວສັງຄົມໄດ້ຮັບຮູ້ຂົ້າໃຈ ແລະເຫັນໄດ້ຄວາມສຳຄັນຂອງການອະນຸລັກສັດປ່າເພື່ອຕ້ານ ແລະສະກັດກັ້ນການຄ້າ-ຂາຍສັດປ່າທີ່ຜິດກົດໝາຍໃນລາວທຸກຮູບແບບແນໃສ່ການປົກປັກຮັກສາຊັບພະຍາກອນປ່າໄມ້ໃຫ້ມີຄວາມອຸດົມສົມບູນມີຄວາມຫລາກຫລາຍທາງຊີວະນາໆພັນ ແລະມໍລະດົກທາງທຳມະຊາດທີ່ເປັນເອກະລັກສະເພາະເຊິ່ງບໍ່ສະເພາະເເຕ່ເປັນການອະນຸລັກສັດປ່າໃຫ້ມີຄວາມຍືນຍົງເທົ່ານັ້ນ, ແຕ່ຍັງເປັນການຮັກສາສຸຂະພາບ ແລະປ້ອງກັນພະຍາດຈາກສັດປ່າທີ່ຈະຕິດແປດມາສູ່ຄົນ. ສະນັ້ນ, ວຽກງານດັ່ງກ່າວຈຶ່ງແມ່ນຄວາມຮັບຜິດຊອບ ແລະເປັນພັນທະຂອງໝົດທຸກຄົນທີ່ຈະຕ້ອງໄດ້ຊ່ວຍກັນອະນຸລັກຮັກສາໄວ້.
ຂປລ. ຂ່າວ-ພາບ: ກິດຕາ

แชร์