ຫາລືໜ້າວຽກຮີບດ່ວນ ເພື່ອກຽມເປັນປະທານອາຊຽນ ຂອງ ສປປ ລາວ ປີ 2024

ຄະນະກຳມະການຊີ້ນໍາລະດັບຊາດ ເພື່ອກະກຽມ ແລະ ດຳເນີນການເປັນປະທານອາຊຽນຂອງ ສປປ ລາວ ໃນປີ 2024 ຈັດກອງປະຊຸມປຶກສາຫາລືໜ້າວຽກຮີບດ່ວນ ໃນວັນທີ 23 ມີນາ 2023 ນີ້, ທີ່ນະຄອນຫລວງວຽງຈັນ ໂດຍການເປັນປະທານຂອງ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ຮອງປະທານ, ຜູ້ປະຈໍາການຄະນະກຳມະການຊີ້ນໍາລະດັບຊາດ ເພື່ອກະກຽມ ແລະ ດຳເນີນການເປັນປະທານອາຊຽນຂອງ ສປປ ລາວ ໃນປີ 2024, ມີບັນດາລັດຖະມົນຕີ, ຮອງລັດຖະມົນຕີ ແລະ ພະນັກງານທີ່ກ່ຽວຂ້ອງຈາກບັນດາກະຊວງຂະແໜງການຕ່າງໆເຂົ້າຮ່ວມ.

ການຈັດກອງປະຊຸມຄັ້ງນີ້, ເພື່ອສືບຕໍ່ຜັນຂະຫຍາຍທິດຊີ້ນຳຂອງກອງປະຊຸມຄະນະກຳມະ ການຊີ້ນຳລະດັບຊາດ ເພື່ອກະກຽມ ແລະ ດຳເນີນການເປັນປະທານອາຊຽນ ຂອງ ສປປ ລາວ ໃນປີ 2024 ຊຶ່ງຈັດຂຶ້ນໃນວັນທີ 9 ກຸມພາ 2023 ໂດຍການເປັນປະທານ ຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ. ໃນນີ້, ກອງປະຊຸມໄດ້ລາຍງານຄວາມຄືບໜ້າໃນການກະກຽມດ້ານຕ່າງໆ ເຊັ່ນ: ການກໍານົດຄໍາຂວັນປະທານອາຊຽນ, ການອອກແບບໂລໂກປະທານ, ການສ້າງວິດີໂອສັ້ນສໍາລັບໄປຮັບປະທານອາຊຽນ, ບຸລິມະສິດສໍາລັບການເປັນປະທານອາຊຽນ ສໍາລັບສາມເສົາຄໍ້າປະຊາຄົມອາຊຽນ (ປະຊາຄົມການເມືອງ-ຄວາມໝັ້ນຄົງ, ປະຊາຄົມເສດຖະກິດ ແລະ ປະຊາຄົມວັດທະນະ ທຳ-ສັງຄົມ), ການຂຶ້ນແຜນບັນຊີໂຮງແຮມ ແລະ ກຳນົດສະຖານທີ່ພັກສຳລັບບັນດາປະມຸກລັດ/ຫົວໜ້າລັດຖະບານ ແລະ ບັນດາຜູ້ແທນ ຫລື ນັກຂ່າວ, ການກະກຽມຄວາມພ້ອມສະຖານທີ່ຫ້ອງປະຊຸມ, ຄວາມພ້ອມພາຫະນະທີ່ຈະຮັບໃຊ້ປະມຸກລັດ/ຫົວໜ້າລັດຖະບານ, ລັດຖະມົນຕີຕ່າງປະເທດ ແລະ ເຈົ້າໜ້າທີ່ອາວຸໂສ, ລະບົບສື່ສານ ແລະ ອິນເຕີເນັດ, ພະນັກງານປະສານງານ (LO) ແລະ ພະນັກງານອາສາສະໝັກ (VO), ພະນັກງານໃກ້ຊິດ, ແຜນງົບປະມານ, ວຽກງານການຊ່ວຍເຫລືອ ແລະ ວຽກອື່ນໆທີ່ກ່ຽວຂ້ອງ.

ໃນໂອກາດນີ້, ທ່ານ ຮອງນາຍົກລັດຖະມົນຕີ ກໍໄດ້ມອບໝາຍໃຫ້ບັນດາອະນຸກຳມະການກ່ຽວ ຂ້ອງ ສືບຕໍ່ດຳເນີນການກະກຽມບັນດາວຽກ ທີ່ມີຄວາມຈຳເປັນຮີບດ່ວນ ໂດຍສະເພາະແມ່ນການກຳ ນົດຄຳຂວັນ, ໂລໂກ ແລະ ບຸລິມະສິດຂອງການເປັນປະທານອາຊຽນຂອງ ສປປ ລາວ ໃນປີ 2024, ການເກັບກຳບັນຊີບັນດາໂຮງແຮມ ສຳລັບຄະນະຜູ້ແທນທີ່ຈະມາພັກເຊົາ ໃນໄລຍະເຂົ້າຮ່ວມກອງປະ ຊຸມ, ສະຖານທີ່ປະຊຸມ, ການກະກຽມຍານພາຫະນະ ແລະ ອື່ນໆ ແລະ ລາຍງານຄວາມຄືບໜ້າໃຫ້ກອງປະຊຸມຄັ້ງຕໍ່ໄປຊາບ.

ທີ່ມາ: ຂປລ. ພາບ: ອ່າຍຄຳ

 

แชร์