ເຊັນສັນຍາ MOU ເພື່ອສຶກສາ-ສຳຫຼວດ ກໍ່ສ້າງ ແລະສຳປະທານຂົວຂ້າມນໍ້າເຊບັ້ງໄຟ ແຂວງຄຳມ່ວນ

ພິທີເຊັນສັນຍາ ເພື່ອສຶກສາ-ສຳຫຼວດ ຄວາມເປັນໄປໄດ້ການລົງທຶນໃນຮູບແບບ BOT ເພື່ອກໍ່ສ້າງ ແລະສໍາປະທານຂົວຂ້າມນໍ້າເຊບັ້ງໄຟ ຢູ່ເຂດບ້ານແກ້ງແປ ເມືອງເຊບັ້ງໄຟ ແຂວງຄຳມ່ວນ ຈັດຂຶ້ນໃນວັນທີ 20 ມີນາ 2023 ທີ່ໂຮງແຮມ ຣີເວີເຣ່ຍ ລະຫວ່າງ ອົງການປົກຄອງແຂວງຄຳມ່ວນ ແລະ ກຸ່ມບໍລິສັດ ມາລີນີ ຈຳກັດຜູ້ດຽວ.

ເຊິ່ງໂຄງການກໍ່ສ້າງ ສຳປະທານຂົວຂ້າມນໍ້າເຊບັ້ງໄຟ ຢູ່ຈຸດບ້ານແກ້ງແປ ເມືອງເຊບັ້ງໄຟ ໃນຮູບແບບ BOT ເພື່ອຜົນປະໂຫຍດທາງດ້ານເສດຖະກິດ-ສັງຄົມ ຂອງແຂວງຄຳມ່ວນ ໃນການເຊື່ອມຕໍ່ເສັ້ນທາງດ້ານພື້ນຖານໂຄງລ່າງ ທີ່ສາມາດເຮັດໃຫ້ການ ໄປ-ມາ, ຂົນສົ່ງ, ການທ່ອງທ່ຽວມີຄວາມສະດວກ ແລະສ້າງລາຍຮັບໃຫ້ແກ່ແຂວງຄຳມ່ວນ ເວົ້າສະເພາະແມ່ນສ້າງລາຍຮັບໃຫ້ແກ່ປະຊາຊົນໃນເຂດດັ່ງກ່າວ.

ເຊິ່ງບົດບັນທຶກຄວາມເຂົ້າໃຈການສຶກສາ-ສຳຫຼວດ ຂອງໂຄງການດັ່ງກ່າວແມ່ນການສຶກສາລາຍລະອຽດ ແລະ ຄວາມເປັນໄປໄດ້ຂອງໂຄງການເປັນຕົ້ນ: ທາງດ້ານເສດຖະກິດ-ເຕັກນິກ, ສິ່ງແວດລ້ອມ ແລະ ສັງຄົມ, ໄລຍະຂອບເຂດສິດ ໃນການປະຕິບັດ ແລະດຳເນີນງານຂອງໂຄງການເພື່ອໃຫ້ບັນລຸຕາມຂໍ້ຜູກພັນໃນບົດບັນທຶກຄວາມເຂົ້າໃຈໃນນັ້ນລວມທັງເສັ້ນທາງເຂົ້າ-ອອກ ແລະສິ່ງອຳນວຍຄວາມສະດວກອື່ນໆ.

ເຊິ່ງການສຶກສາ-ສຳຫຼວດໂຄງການ ແມ່ນທຶນຂອງຝ່າຍບໍລິສັດ 100% ແລະຝ່າຍບໍລິສັດຈະຕ້ອງໄດ້ປະຕິບັດຕາມມາດຕະການທີ່ໄດ້ລະບຸໄວ້ໃນສັນຍາເຊັ່ນ: ການສຶກສາຄວາມເປັນໄປໄດ້ ຕ້ອງໄດ້ມາດຕະຖານ-ເຕັກນິກ ທີ່ຂະແໜງການກ່ຽວຂ້ອງວາງອອກ, ການສຶກສາປະເມີນຜົນກະທົບຕໍ່ສິ່ງແວດລ້ອມ ແລະປະເມີນຜົນກະທົບຕໍ່ສັງຄົມ ໃຫ້ສອດຄ່ອງກັບກົດໝາຍ, ມີການລາຍງານຄວາມຄືບໜ້າໃນການສຶກສາ-ສຳຫຼວດ ທຸກໆ 3 ເດືອນ, ປົກປັກຮັກສາສິ່ງແວດລ້ອມ ແລະຈ່າຍຄ່າເສຍຫາຍ ໃນກໍລະນີທີ່ໄດ້ກໍ່ຄວາມເສຍຫາຍໃຫ້ແກ່ສິ່ງແວດລ້ອມ, ຜົນລະປູກ ແລະ ຊັບສິນຂອງພໍ່ແມ່ປະຊາຊົນ, ປະກອບສ່ວນຊ່ວຍເຫຼືອແກ່ທ້ອງຖິ່ນຕາມຄວາມເໝາະສົມໃນໄລຍະການດຳເນີນການສຳຫຼວດ, ປະຕິບັດຕາມກົດໝາຍແຮງງານ ແລະພັນທະອື່ນໆຕາມລະບຽບກົດໝາຍ ແລະ ຕ້ອງໄດ້ລົງມືດຳເນີນການສຳຫຼວດຄວາມເປັນໄປໄດ້ ພາຍໃນ 60 ວັນ ນັບແຕ່ວັນລົງລາຍເຊັນ MOU ເປັນຕົ້ນໄປ.

ຮ່ວມລົງນາມເຊັນ MOU ສຶກສາ-ສຳຫຼວດ ໂຄງການດັ່ງກ່າວ ໂດຍແມ່ນທ່ານ ເດດສັກດາ ມະນີຄຳ ຫົວໜ້າພະແນກແຜນການ ແລະການລົງທຶນແຂວງຄຳມ່ວນ (ຕາງໜ້າໃຫ້ແກ່ອົງການປົກຄອງແຂວງ) ແລະທ່ານ ພຸດສະດຸ ອິນທະວົງ ປະທານກຸ່ມບໍລິສັດ ມາລີນີ ຈຳກັດ ແລະບັນດາພາກສ່ວນທີ່ກ່ຽວຂ້ອງທັງສອງຝ່າຍ, ໂດຍການເຂົ້າຮ່ວມເປັນສັກຂີພິຍານຂອງທ່ານ ບົວສອນ ບຸບຜາວັນ ອາດີດນາຍົກລັດຖະມົນຕີ ແຫ່ງ ສປປ ລາວ, ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ພ້ອມດ້ວຍການນຳຂອງແຂວງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ທີ່ມາ: Medialaos

แชร์