ກິດຈະກໍາໂຄສະນາເຜີຍແຜ່ເພື່ອປູກຈິດສໍານຶກດ້ານຄວາມປອດໄພທາງຫຼວງ

ໃນໄລຍະເດືອນທັນວາ 2022 ກົມຕຳຫຼວດຈະລາຈອນ, ກະຊວງປ້ອງກັນຄວາມສະຫງົບ ແລະ ພະແນກໂຍທາທິການ ແລະ ຂົນສົ່ງແຂວງສະຫວັນນະເຂດຮ່ວມກັບ ພະແນກສຶກສາທິການແລະກິລາ ແຂວງສະຫວັນນະເຂດ ພ້ອມດ້ວຍພາກສ່ວນທີ່ກ່ຽວຂ້ອງ ໄດ້ພ້ອມກັນເຄື່ອນໄຫວໂຄສະນາເຜີຍແຜ່ກ່ຽວກັບວຽກງານຄວາມປອດໄພທາງຫຼວງ ແລະຈັດກິດຈະກໍາ ເພື່ອປູກຈິດສໍານຶກໃຫ້ແກ່ນັກຮຽນ, ຄູອາຈານຜູ້ທີ່ນໍາໃຊ້ລົດຈັກໃຫ້ໃສ່ໝວກກັນກະທົບ ແລະໃຫ້ເຂົາເຈົ້າເຫັນໄດ້ຄວາມສໍາຄັນຂອງການໃສ່ໝວກກັນກະທົບເວລາຂັບຂີ່ລົດຈັກ, ຄວາມອັນຕະລາຍຂອງຜູ້ຂັບຂີ່ທີ່ບໍ່ໃສ່ໝວກກັນກະທົບເວລາເກີດອຸບປະຕິເຫດ, ຢູ່ຕາມໂຮງຮຽນສາມັນສຶກສາແຫ່ງຕ່າງໆໃນແຂວງສະຫວັນນະເຂດ.

ກ່ອນທີ່ຈະມີການລົງເຄື່ອນໄຫວໂຄສະນາ ແລະເຮັດກິດຈະກໍາໃນຄັ້ງນີ້ພາກສ່ວນກ່ຽວຂ້ອງໄດ້ພ້ອມກັນຄົ້ນຄວ້າແລະກໍານົດຮູບແບບການເຮັດກິດຈະກໍາອອກເປັນ 2 ໄລຍະ, ຊຶ່ງໄລຍະທໍາອິດໄດ້ຄົ້ນຄວ້າ ແລະອອກແບບອຸປະກອນທີ່ໃຊ້ປະກອບກິດຈະກໍາລົງໂຄສະນາເຜີຍແຜ່ຢູ່ໂຮງຮຽນລວມມີ: ແຜ່ນພັບ, ໂປສເຕີ້, ສະຕິກເກີ້, ປຶ້ມນິທານ, ໝວກກັນກະທົບ, ຄູ່ມືການນໍາໃຊ້ຖະໜົນເບື້ອງຕົ້ນ, ວິດີໂອ ແລະ ບົດນໍາສະເໜີ.  ທີມງານໄດ້ເລີ່ມເຮັດວຽກນັບແຕ່ຕົ້ນປີ 2022 ເປັນຕົ້ນມາ ໂດຍສົມທົບກັບຊ່ຽວຊານດ້ານການສື່ສານ, ພະນັກງານອາວຸໂສ, ນັກແຕ້ມຮູບນິທານ ແລະບໍລິສັດອອກແບບທີ່ມີປະສົບການມາເຮັດວຽກພັດທະນາອຸປະກອນຈົນເຖິງປະຈຸບັນແມ່ນເຮັດສໍາເລັດແລ້ວ. ໄລຍະທີ2 ແມ່ນການໂຄສະນາເຜີຍແຜ່ປູກຈິດສໍານຶກດ້ານຄວາມປອດໄພທາງຫຼວງ ແລະ ເຮັດກິດຈະກໍາ ຢູ່ໂຮງຮຽນປະຖົມ ແລະ ມັດທະຍົມແຂວງສະຫວັນນະເຂດຊຶ່ງໄດ້ດໍາເນີນການຈັດຕັ້ງປະຕິບັດກິດຈະກໍາໂດຍການສົມທົບກັນລະຫວ່າງກົມຂົນສົ່ງກະຊວງໂຍທາທິການແລະຂົນສົ່ງ,ກົມຕຳຫຼວດຈະລາຈອນ ກະຊວງປ້ອງກັນຄວາມສະຫງົບ, ກະຊວງສຶກສາທິການແລະກິລາ, ພະແນກໂຍທາທິການ ແລະຂົນສົ່ງແຂວງສະຫວັນນະເຂດ ແລະພາກສ່ວນທີ່ກ່ຽວຂ້ອງ.

ຈາກການໃຫ້ສຳພາດອາຈານ ວັນລາລາຊະຈັກ ຄູສຶກສານິເທດມັດທະຍົມແຂວງສະຫວັນນະເຂດ ໄດ້ກ່າວໄວ້ວ່າ:“ ດີໃຈຫຼາຍທີ່ໄດ້ມີສ່ວນຮ່ວມໃນການນໍາພາຈັດກິດຈະກຳ ຊຶ່ງກົມຕຳຫຼວດຈະລາຈອນ ກະຊວງປ້ອງກັນຄວາມສະຫງົບ ແລະພະແນກໂຍທາທິການ ແລະຂົນສົ່ງ ແຂວງສະຫວັນນະເຂດ ໄດ້ໃຫ້ຄວາມຮູ້ກ່ຽວກັບການໃສ່ໝວກກັນກະທົບທີ່ຖືກຕ້ອງເວລາຂັບຂີ່ລົດຈັກ, ການຍ່າງ ແລະ ການໃຊ້ລົດໃຊ້ຖະໜົນທີ່ມີຄວາມປອດໄພ, ເຜີຍແຜ່ກົດລະບຽບຈະລາຈອນທາງບົກໃຫ້ນ້ອງນັກຮຽນທຸກຄົນໄດ້ຮັບຮູ້ຢ່າງທົ່ວເຖິງ.ໃນໄລຍະຜ່ານມາ ນັກຮຽນໃນແຂວງສະຫວັນນະເຂດ ຍັງຖືເບົາ, ບໍ່ສວມໃສ່ໝວກກັນກະທົບ ແລະ ບໍ່ຮູ້ເຖິງຄຸນປະໂຫຍດຂອງໝວກກັນກະທົບ; ເວົ້າລວມແລ້ວ ຍັງບໍ່ໃຫ້ຄວາມສໍາຄັນກ່ຽວກັບກົດຈະລາຈອນເທື່ອ.”

ສໍາລັບການຈັດກິດຈະກໍາສໍາຄັນນີ້ ຈຸດປະສົງເພື່ອເພີ່ມຈໍານວນຜູ້ຂັບຂີ່ລົດຈັກໃຫ້ສວມໃສ່ໝວກກັນກະທົບເວລາຂັບຂີ່ລົດຈັກ ແລະໃສ່ໃຫ້ຖືກວິທີ, ເພີ່ມຈໍານວນຜູ້ຂັບຂີ່ໃຫ້ມີໃບຂັບຂີ່ຖືກຕ້ອງ ແລະ ເຮັດໃຫ້ເຂົາເຈົ້າມີສ່ວນຮ່ວມໃນການປະຕິບັດລະບຽບກົດໝາຍ,  ພ້ອມທັງປູກຈິດສໍານຶກດ້ານຄວາມປອດໄພທາງຫຼວງ ໃຫ້ນ້ອງນັກຮຽນຊັ້ນປະຖົມ ເຊິ່ງເປັນກຸ່ມຄົນທີ່ຈະກາຍເປັນຜູ້ຂັບຂີ່ໜ້າໃໝ່ໃນອານາຄົດ. ກິດຈະກໍາດັ່ງກ່າວ ເລີ່ມຈັດຕັ້ງປະຕິບັດມາແຕ່ວັນທີ 3 ທັນວາ 2022 ໂດຍເລີ່ມຈາກໂຮງຮຽນມັດທະຍົມຕອນຕົ້ນສົມສະອາດ,ໂຮງຮຽນມັດທະຍົມຕອນຕົ້ນດົງຄຳຫຼວງ,ໂຮງຮຽນມັດທະຍົມຕອນຕົ້ນຢາງສູງ ແລະໂຮງຮຽນປະຖົມສົມບູນ ບ້ານຫ້ວຍ ເມືອງນະຄອນໄກສອນ,ໂຮງຮຽນມັດທະຍົມສົມບູນ ບ້ານນາ, ໂຮງຮຽນມັດທະຍົມສົມບູນ ອຸທຸມພອນ, ໂຮງຮຽນມັດທະຍົມສົມບູນ ໄຊຍະເພັດ ເມືອງອຸທຸມພອນ,ໂຮງຮຽນມັດທະຍົມຕອນປາຍ ດົງເຫັນ ເມືອງອາດສະພັງທອງ,ໂຮງຮຽນມັດທະຍົມສົມບູນ ແກ້ງກອກ, ໂຮງຮຽນມັດທະຍົມສົມບູນ ບຶກທົ່ງ, ໂຮງຮຽນມັດທະຍົມສົມບູນ ຫຼັກ 35 ເມືອງຈຳພອນ, ໂຮງຮຽນມັດທະຍົມສົມບູນ ປາກຊ່ອງ ເມືອງສອງຄອນ, ໂຮງຮຽນມັດທະຍົມສົມບູນ ບ້ານນາຄຳ, ໂຮງຮຽນມັດທະຍົມຕອນຕົ້ນ ໂພສີແກ້ວ ເມືອງໄຊພູທອງ, ໂຮງຮຽນມັດທະຍົມສົມບູນນາວເໜືອ, ໂຮງຮຽນມັດທະຍົມສົມບູນສາລະພູມ ເມືອງໄຊບູລີ ຊຶ່ງລວມມີຜູ້ເຂົ້າຮ່ວມຫຼາຍກວ່າ 2.000 ຄົນ.

ພາຍຫຼັງສໍາເລັດກິດຈະກໍາສັງເກດເຫັນໄດ້ວ່າບັນດານັກຮຽນສາມັນທີ່ເຂົ້າຮ່ວມກິດຈະກໍາໄດ້ມີຄວາມຮູ້ ແລະຄວາມເຂົ້າໃຈທີ່ຖືກຕ້ອງກ່ຽວກັບການໃສ່ໝວກກັນກະທົບຫຼາຍຂຶ້ນຊຶ່ງສະແດງອອກໃນການຕອບຄໍາຖາມເອົາຂອງລາງວັນນັກຮຽນສ່ວນຫຼວງຫຼາຍແມ່ນຕອບຖືກຕ້ອງຕາມບົດຮຽນທີ່ນໍາໄປເຜີຍແຜ່ ແລະກໍໃຫ້ຄຳຫມັ້ນສັນຍາ ກັບຕົນເອງວ່າຈະໃສ່ໝວກກັນກະທົບທຸກຄັ້ງເວລາຂັບຂີ່ລົດຈັກ ແລະເຄົາລົບກົດລະບຽບຈະລາຈອນຢ່າງເຄັ່ງຄັດ.

ໂຄງການສະໜອງວັດຖຸອຸປະກອນເຂົ້າໃນວຽກງານໂຄສະນາເຜີຍແຜ່ປູກຈິດສໍານຶກຄວາມປອດໄພທາງຫຼວງ 

ດໍາເນີນໂຄງການໂດຍ: ກົມຂົນສົ່ງ, ກະຊວງໂຍທາທິການ ແລະຂົນສົ່ງ

แชร์