ກະຊວງການເງິນ ຈໍາໜ່າຍພັນທະບັດຜ່ານຕະຫລາດຫລັກຊັບລາວ 2.500 ຕື້ກີບ ແລະ50 ລ້ານໂດລາ

ໃນວັນທີ 16 ມີນາ 2023 ກະຊວງການເງິນຈັດຖະແຫລ່ງຂ່າວການຈໍາໜ່າຍພັນທະບັດລັດຖະບານຊຸດໃໝ່ເປັນພັນທະບັດດຸ່ນດ່ຽງງົບປະມານຜ່ານຕະຫລາດຫລັກຊັບລາວເປັນຊຸດທີ 4 ລວມມີ ສະກຸນເງິນກີບ 2.500 ຕື້ກີບ ແລະສະກຸນເງິນໂດລາ 50 ລ້ານໂດລາສະຫະລັດ ໂດຍການຖະແຫລງຂອງທ່ານ ສຸລິວັດ ສຸວັນນະຈູມຄໍາ ຫົວໜ້າກົມຄຸ້ມຄອງໜີ້ສິນສາທາລະນະກະຊວງການເງິນ.

ທ່ານ ສຸລິວັດ ສຸວັນນະຈູມຄໍາ ໄດ້ໃຫ້ຮູ້ວ່າ: ໄລຍະຜ່ານມາ, ກະຊວງການເງິນ ໄດ້ຮ່ວມມືກັບສຳນັກງານຄະນະກຳມະການຄຸ້ມຄອງຫລັກຊັບ ຕະຫລາດຫລັກຊັບລາວ, ບໍລິສັດຫລັກຊັບ ທຄຕລ-ກທ ຈຳກັດ, ບໍລິສັດຫລັກຊັບ ລ້ານຊ້າງ ມະຫາຊົນ ແລະ ບໍລິສັດຫລັກຊັບ ລາວ- ຈີນ ຈໍາກັດ ຈໍາໜ່າຍພັນທະບັດລັດຖະບານ ທີ່ອອກຈໍາໜ່າຍໂດຍ ກະຊວງການເງິນຜ່ານຕະຫລາດຫລັກຊັບລາວນັບແຕ່ປີ 2018-2022 ແມ່ນໄດ້ອອກມາແລ້ວ 3 ຊຸດ, ຊຶ່ງເປັນສະກຸນເງິນກີບ 5.900 ຕື້ກີບ ແລະ ສະກຸນເງິນໂດລາສະຫະລັດແມ່ນ 100 ລ້ານໂດລາ, ຊຶ່ງເຫັນວ່າທຸກໆພາກສ່ວນໄດ້ມີການຮ່ວມມືເອົາໃຈໃສ່ໃນການຈໍາໜ່າຍຈົນປະສົບຜົນສຳເລັດ; ຜ່ານມາກະຊວງການເງິນ ໄດ້ປະຕິບັດພັນ ທະໃນການຈ່າຍຕົ້ນທຶນ ແລະ ດອກເບ້ຍໃຫ້ຜູ້ລົງທຶນຢ່າງເຄັ່ງຄັດ ໂດຍຄົບຕາມຈຳນວນ ແລະ ຖືກ ຕ້ອງຕາມເວລາທີ່ກຳນົດໄວ້, ເຮັດໃຫ້ຜູ້ລົງທຶນເຊື່ອໝັ້ນ ແລະ ເລືອກລົງທຶນໃນພັນທະບັດລັດຖະບານ.

ຈາກຜົນສໍາເລັດດັ່ງກ່າວ, ກະຊວງການເງິນຈຶ່ງເຫັນດີອະນຸມັດໃຫ້ມີການຈໍາໜ່າຍພັນທະບັດລັດຖະບານຊຸດໃໝ່ຜ່ານຕະຫລາດຫລັກຊັບລາວໂດຍເລີ່ມຈໍາໜ່າຍແຕ່ເດືອນກຸມພາ 2023 ເປັນຕົ້ນມາ ແລະຈະດໍາເນີນໄປຈົນກວ່າຈະສໍາເລັດເຊິ່ງການອອກຈໍາໜ່າຍຄັ້ງນີ້, ກະຊວງການເງິນໄດ້ເພີ່ມພັນທະບັດ ແລະມີການປັບອັດຕາດອກເບ້ຍເພີ່ມຂຶ້ນສໍາລັບພັນທະບັດສະກຸນເງິນກີບໂດຍອີງໃສ່ສະພາບເສດຖະກິດໃນປັດຈຸບັນເພື່ອໃຫ້ຜູ້ລົງທຶນກັນມາລົງທຶນໃນພັນທະບັດລັດຖະບານ ເພີ່ມຂຶ້ນ ໂດຍອັດຕາດອກເບ້ຍໃໝ່ ປີ 2023 ພັນທະບັດທີ່ມີອາຍຸ 1 ປີ ອັດຕາດອກເບ້ຍ 5,80%, ອາຍຸ 2 ປີ 6,90%, ອາຍຸ 3 ປີ 7,60%, ອາຍຸ 5 ປີ 7,75%, ອາຍຸ 7 ປີ 7,90% ແລະ ອາຍຸ 10 ປີ 8,15%. ສ່ວນພັນທະບັດລັດຖະບານສະກຸນເງິນໂດລາ ອາຍຸ 1 ປີ ມີອັດຕາດອກເບ້ຍ 5%, ອາຍຸ 2 ປີ 5,50%, ອາຍຸ 3 ປີ 6%, ອາຍຸ 5 ປີ 7%, ອາຍຸ 7 ປີ 7,50% ແລະອາຍຸ 10 ປີ 8%. ທັງໝົດນີ້, ກະຊວງການເງິນຕາງໜ້າໃຫ້ລັດຖະບານລາວ ມີແຜນຈະນໍາເງິນໄປໃຊ້ເຂົ້າໃນການບໍລິຫານທົ່ວໄປ ຂອງລັດຖະບານດັດສົມງົບປະມານ ແລະ ລົງທຶນຕາມໂຄງການຕ່າງໆຂອງລັດຖະບານ.
ຂ່າວ-ພາບ: ກະຊວງການເງິນ

แชร์