ເຈົ້າແຂວງຈຳປາສັກ ຢ້ຽມຢາມອ້າຍນ້ອງກອງຮ້ອຍທະຫານຊາຍແດນ 519

ໃນວັນທີ 14 ມີນາຜ່ານມາ, ທ່ານ ວິໄລວົງ ບຸດດາຄໍາ ເຈົ້າແຂວງຈຳປາສັກ, ປະທານຄະນະກຳມະການປ້ອງກັນຊາດ-ປ້ອງກັນຄວາມສະຫງົບຂັ້ນແຂວງພ້ອມຄະນະ ໄດ້ເຄື່ອນໄຫວຢ້ຽມຢາມອ້າຍ-ນ້ອງ ນາຍ ແລະພົນທະຫານກອງຮ້ອຍທະຫານຊາຍແດນ 519 ໂດຍມີທ່ານ ພັນເອກ ແຫວນຄໍາ ຈະເລີນວົງ ຫົວໜ້າການເມືອງກອງບັນຊາການທະຫານແຂວງ, ທ່ານ ວຽງສະໄໝ ສີລິພອນພັນ ເຈົ້າເມືອງປະທຸມພອນ, ມີຄະນະພັກ-ຄະນະບັນຊາ ນາຍ ແລະ ພົນທະຫານຂອງກົມກອງດັ່ງກ່າວໃຫ້ການຕ້ອນຮັບ.

ທ່ານ ພັນຕີ ບຸນນອງ ໝັ້ນອະນຸສອນ ຕ່າງໜ້າຄະນະພັກ, ຄະນະບັນຊາກອງຮ້ອຍທະຫານຊາຍແດນ 519 ໄດ້ລາຍງານສະພາບໂດຍລວມຂອງກົມກອງ, ຜ່ານມາໄດ້ເອົາໃຈໃສ່ນໍາພາຈັດຕັ້ງເຄື່ອນໄຫວເພື່ອປົກປັກຮັກສາຄວາມສະຫງົບຕາມເຂດຊາຍແດນ ແລະເຂດປ່າດົງເຊປຽນ, ອັດປ່ອງຂ້າມລອຍຂອງສັດຕູ ແລະກຸ່ມຄົນບໍ່ຫັວງດີ ໃນເຂດຄວາມຮັບຜິດຊອບຂອງຕົນຢ່າງເປັນປະຈໍາ ໂດຍລວມແລ້ວ ແມ່ນມີຄວາມສະຫງົບ ເປັນພື້ນຖານ.

ໂອກາດນີ້, ທ່ານ ວິໄລວົງ ບຸດດາຄຳ ໄດ້ຕີລາຄາສູງຕໍ່ການຊີ້ນຳ-ນຳພາຂອງ ຄະນະພັກ, ຄະນະບັນຊາກອງຮ້ອຍທະຫານຊາຍແດນ 519 ໃນການປະຕິບັດ ສອງໜ້າທີ່ຍຸດທະສາດ ໃນການປົກປັກຮັກສາ ແລະພັດທະນາປະເທດຊາດໂດຍສະເພາະການປົກປັກຮັກສາຊາຍແດນ, ກອງຮ້ອຍ 519 ຊຶ່ງ ທີ່ຕັ້ງເປັນເຂດໜຶ່ງທີ່ທຸລະກັນດານ ແລະຫ່າງໄກສອກຫຼີກ,ຜ່ານການເຄື່ອນໄຫວຂອງບັນດາສະຫາຍຄະນະນໍາ ແລະບັນດາອ້າຍນ້ອງທະຫານເຮັດໃຫ້ເຂດແດນມີຄວາມສະຫງົບເປັນເຂດແດນມິດຕະພາບ ພ້ອມທັງຮັກສາຊັບພະຍາກອນທໍາມະຊາດ ເຂດນໍ້າແດນດິນຂອງລາວ ແລະ ຂໍໃຫ້ບັນດາສະຫາຍອ້າຍນ້ອງທັງໝົດ ຈົ່ງສືບຕໍ່ມູນເຊື້ອຮັກສາຄວາມສາມັກຄີເປັນປຶກແຜ່ນ ເປັນກໍາລັງແຮງໃຫ້ແກ່ປະເທດຊາດກໍຄືແຂວງຈໍາປາສັກ ແລະ ການຢ້ຽມຢາມນີ້, ແມ່ນຢັ້ງຢືນເຖິງຄວາມເປັນຫ່ວງເປັນໄຍຂອງຄະນະພັກທຸກຂັ້ນຕະຫລອດຮອດ ປະຊາຊົນແຂວງຈຳປາສັກ ທີ່ມີຕໍ່ອ້າຍນ້ອງກອງທັບປະຊາຊົນປະຕິວັດລາວໂດຍສະເພາະໃນໂອກາດວັນສ້າງຕັ້ງກອງທັບປະຊາຊົນລາວຄົບຮອບ 74 ປີ, ອົງການປົກຄອງແຂວງຂໍອວຍພອນໄຊອັນປະເສີດມາຍັງຄະນະພັກ-ຄະນະນຳ,ພະນັກງານ-ນັກຮົບກຳລັງປະກອບອາວຸດທົ່ວກອງທັບຈົ່ງມີສຸຂະພາບແຂງແຮງ, ມີຄວາມຜາສຸກ ແລະປະສົບຜົນສໍາເລັດໃນໜ້າທີ່ວຽກງານ.

ໃນໂອກາດຢ້ຽມຢາມຄັ້ງນີ້, ທ່ານເຈົ້າແຂວງຈຳປາສັກ ແລະຄະນະໄດ້ນຳເອົາເຄື່ອງອຸປະໂພກ-ບໍລິໂພກ, ວັດຖຸ-ເຄື່ອງໃຊ້ ແລະພິເສດມີພັນລະຍາທ່ານເຈົ້າແຂວງຈຳປາສັກ ກໍຄືໃນນາມຄອບຄົວການນຳຍັງໄດ້ມອບເງິນສົດ ຈຳນວນ 10 ລ້ານກີບ ໃຫ້ກົມກອງດັ່ງກ່າວນຳອີກ.
ຂ່າວ: ພູທິບສະຫວັນ.

• 16/03/2023