ສິງກະໂປສ້າງເມືອງໃຕ້ດິນແກ້ບັນຫາພື້ນທີ່ຈຳກັດ

ລັດຖະບານສິງກະໂປປະກາດແຜນການວາງພື້ນຖານໂຄງລ່າງໃຕ້ເຂດການເງິນຄືອ່າວມາຣີນາ ແລະສິ່ງປຸກສ້າງສູງອື່ນໆອັນເປັນຄວາມພະຍາຍາມຫຼ້າສຸດໃນ ການເພີ່ມພື້ນທີ່ໃນເມືອງທີ່ມີຢູ່ຈຳກັດໃຫ້ໄດ້ຫຼາຍທີ່ສຸດ.

ຕາມຂ່າວຕ່າງປະເທດລາຍງານໃນວັນທີ 4 ເມສາວ່າແຜນການດັ່ງກ່າວມີຂຶ້ນໃນໄລຍະທີ່ຈຳນວນປະຊາກອນທີ່ຂະຫຍາຍຕົວເຮັດໃຫ້ຂໍ້ຈຳກັດທາງພູມສາດຂອງປະເທດເດັ່ນຊັດຂຶ້ນ ແລະເລີ່ມປ່ຽນສະພາບດິນເພື່ອປຸກສ້າງອາຄານ ເພີ່ມຕື່ມບໍ່ໄດ້ ແລະເນື່ອງຈາກຂະນະນີ້ເກືອບຈະບໍ່ເຫຼືອທາງເລືອກອື່ນແລ້ວແຜນແມ່ບົດສະບັບໃໝ່ຂອງປະເທດຈຶ່ງຮຽກຮ້ອງໃຫ້ມີການຂຸດອຸໂມງໃຕ້ດິນ, ທັງນີ້ ແຜນດັ່ງກ່າວມີໄລຍະເວລາການດຳເນີນ ການໄປຈົນເຖິງ 10-15 ປີຕໍ່ໜ້າ ລາຍງານລະບຸວ່າ ລັດຖະບານມີ ຈຸດປະສົງທີ່ຈະເພີ່ມທີ່ດິນເພື່ອປະໂຫຍດໃຊ້ສອຍຂອງປະຊາຊົນເປັນຫຼັກ ດ້ວຍການຍ້າຍລະບົບສາທາລະນູປະໂພກ, ລະບົບຂົນສົ່ງ, ສະຖານທີ່ເກັບສິນຄ້າ ແລະໂຮງງານລົງໃຕ້ດິນ ຊຶ່ງເຂດອ່າວມາຣີນາເບຍເປັນ 1/3 ຂອງເຂດທີ່ລັດຖະບານສິງກະໂປມີແຜນຈະເປີດໂຕສິ່ງປຸກສ້າງໃຕ້ດິນເພື່ອໃຫ້ການໃຊ້ພື້ນທີ່ໃຕ້ດິນເປັນໄປຢ່າງມີປະສິດທິພາບ ແລະປະສິດທິຜົນລັດຖະບານຈະໃຊ້ປະໂຫຍດຈາກເຕັກໂນໂລຊີ 3 ມິຕິໃນການອຳນວຍຄວາມສະດວກໃນການວາງຜັງເມືອງໃນໄລຍະເລີ່ມຕົ້ນສຳລັບພື້ນທີ່ໃຕ້ດິນ ແລະຈະນໍາຜັງເມືອງໃຕ້ດິນ 3 ມິຕິນີ້ໄປໃຊ້ກັບພື້ນທີ່ອື່ນໆໃນອະນາຄົດ.

ຢ່າງໃດກໍຕາມ ຄວາມພະຍາຍາມປ່ຽນສະພາບດິນຂອງປະເທດປະເຊີນກັບອຸປະສັກຫຼາຍດ້ານເຊັ່ນຄວາມເລິກຂອງທະເລ, ການສູນເສຍແຫຼ່ງ ອາໄສຕົ້ນທຶນສູງຂຶ້ນ ແລະການນໍາເຂົ້າຊາຍຈາກຕ່າງປະເທດໄດ້ໜ້ອຍລົງ.

ນສພ ເສດຖະກິດ-ສັງຄົມ

แชร์