ໃນ 1 ປີ ສປປ ລາວ ມີຄວາມຕ້ອງການເລືອດ 73 ພັນຖົງ

ເລືອດ ແມ່ນປັດໃຈທີ່ຈໍາເປັນຂອງຊີວິດຄົນທີ່ຂາດບໍ່ໄດ້ຕາມຄວາມຕ້ອງການເລືອດຂັ້ນຕໍ່າຂອງອົງການອະນາໄມໂລກທີ່ກໍານົດໄວ້ວ່າຕ້ອງຮັບບໍລິຈາກເລືອດໃຫ້ໄດ້ 1% ຂອງປະຊາຊົນຕໍ່ປີ ຫຼື 10 ຖົງ ຕໍ່ 1,000 ຄົນ.

ຜ່ານມາສູນເລືອດໄດ້ມີຄວາມພະຍາຍາມໂຄສະນາໃຫ້ສັງຄົມໄດ້ຮັບຮູ້ ແລະເຂົ້າໃຈເຖິງຄວາມໝາຍຄວາມສໍາຄັນ ແລະຄວາມຈໍາເປັນຂອງເລືອດ ໃນປີ 2022 ທີ່ຜ່ານມາ ການປຸກລະດົມຮັບບໍລິຈາກເລືອດໃນທົ່ວປະເທດ ສາມາດປະຕິບັດໄດ້ 67,017 ຖົງ ເທົ່າກັບ 98,5% ເຊິ່ງເປົ້າໝາຍແມ່ນ 68,000 ຖົງ ແລະ ໃນປີ 2023 ການປຸກລະດົມການບໍລິຈາກເລືອດຄາດໝາຍບັນລຸ 73,000 ຖົງ.

ພ້ອມດຽວກັນນັ້ນໃນໄລຍະຜ່ານມາ ເຫັນວ່າ 80 % ຂອງຜູ້ບໍລິຈາກເລືອດແມ່ນມາຈາກ, ຊາວໜຸ່ມ-ໄວໜຸ່ມ, ນັກຮຽນ-ນັກສຶກສາເຂົ້າຮ່ວມຢ່າງຟົດຟື້ນໃນຂອບເຂດທົ່ວປະເທດ. ເພື່ອເຮັດໃຫ້ເລືອດມີພຽງພໍໂດຍພື້ນຖານຈຶ່ງມີຄວາມຈໍາເປັນຕ້ອງມີການສ້າງຂະບວນການບໍລິຈາກເລືອດ ແລະ ຄຽງຄູ່ກັບການປູກຈິດສໍານຶກ, ໂຄສະນາ ໃຫ້ສັງຄົມຮັບຮູ້ ແລະເຂົ້າໃຈຢ່າງກ້ວາງຂວາງໂດຍສະເພາະແມ່ນຊາວໜຸ່ມໃນທຸກສາຂາອາຊີບ ນັບແຕ່ສູນກາງຮອດທ້ອງຖິ່ນຊຶ່ງຄະນະຊາວໜຸ່ມປະຊາຊົນປະຕິວັດລາວ ແມ່ນອົງການຈັດຕັ້ງມະຫາຊົນທີ່ມີເຄືອຂ່າຍກວ້າງຂວາງນັບແຕ່ສູນກາງຮອດບ້ານຈິ່ງເປັນທ່າແຮງເພື່ອຮ່ວມມືກັບສະຖາບັນເລືອດແຫ່ງຊາດ ໃນການຈັດຕັ້ງປະຕິບັດ.

ສະນັ້ນ, ຄະນະເລຂາທິການ ສູນກາງຊາວໜຸ່ມຂໍເຊີນຊວນຄະນະບໍລິຫານງານຊາວໜຸ່ມທຸກຂັ້ນ, ບັນດາອົງການຈັດຕັ້ງທາງສັງຄົມ, ຊາວໜຸ່ມ, ໄວໜຸ່ມປະຊາຊົນໃນທົ່ວສັງຄົມ ເຂົ້າຮ່ວມຂະບວນການບໍລິຈາກເລືອດເພື່ອແກ້ໄຂບັນຫາການຂາດເລືອດ ແລະຕອບສະໜອງເລືອດໃຫ້ພຽງພໍເພື່ອນໍາໃຊ້ເຂົ້າໃນການປິ່ນປົ່ວຄົນເຈັບທີ່ນອນຢູ່ຕາມໂຮງໝໍແຫ່ງຕ່າງໆໃນຂອບເຂດທົ່ວປະເທດ. ຄາດຄະເນຜູເຂົ້າຮ່ວມທັງໜົດປະມານ: 1,265 ຄົນ, ຄາດໝາຍໄດ້ເລືອດ 1,000 ຖົງ ແລະຂັ້ນແຂວງຄາດໝາຍໃຫ້ໄດ້ 500 ຖົງ.

แชร์