ສັດປ່າ ແລະພືດປ່າໃນໂລກ ຫຼາຍກວ່າ 8.400 ສາຍພັນໃກ້ຈະສູນພັນ

ອົງການອະນຸລັກທໍາມະຊາດສາກົນ (IUCN) Red List of Threa te ned Sp ecies ລະບຸວ່າ ສັດປ່າ ແລະພືດປ່າ ໃນໂລກນີ້ ຫຼາຍກວ່າ 8.400 ສາຍພັນແມ່ນໃກ້ຈະສູນພັນ ແລະອີກເກືອບ 30.000 ສາຍພັນ ແມ່ນມີຄວາມສ່ຽງສູນພັນຕາມມາຕິດໆ. ຈາກການຄາດຄະເນສະຫຼຸບໄດ້ວ່າມີສິ່ງມີຊີວິດຫຼາຍກວ່າ 1.000.000 ຊະນິດ ຖືກໄພຂົ່ມຂູ່ມີຄວາມສ່ຽງຕໍ່ການສູນພັນ ແລະ ການສູນເສຍແຫຼ່ງທີ່ຢູ່ອາໄສ ແລະ ລະບົບນິເວດຢ່າງຕໍ່ເນື່ອງ (ຈາກມະນຸດ ແລະ ໄພທໍາມະຊາດ). ໃນຂະນະດຽວກັນສະເພາະຢູ່ ສປປ ລາວ ມີຊະນິດພັນສັດປ່າ ຫຼາຍກວ່າ 1.000 ຊະນິດ ແລະມີຫຼາຍຊະນິດທີ່ຫາຍາກ ແລະໃກ້ຈະສູນພັນຂອງໂລກ ເຊັ່ນ: ເສົາລາ, ຂະຍຸ, ຊ້າງ, ເສືອໂຄ່ງ, ໂອ່ງ-ມັ່ງ, ປາຂ່າ ແລະສັດປ່າຊະນິດອື່ນໆ.

ທ່ານ ສົມຫວັງ ພິມມະວົງ ຮອງຫົວໜ້າກົມປ່າໄມ້ກ່າວໃນພິທີສະເຫຼີມສະຫຼອງວັນອະນຸລັກສັດປ່າ ແລະພືດປ່າໂລກພາຍໃຕ້ຫົວຂໍ້”ຄູ່ຮ່ວມງານເພື່ອການອະນຸລັກສັດປ່າ ແລະ ພືດປ່າ” ທີ່ນະຄອນຫຼວງວຽງຈັນຜ່ານມາວ່າ: ສັດປ່າ ແລະ ພືດປ່າ ແມ່ນມີຄວາມສໍາຄັນຕໍ່ການຮັກສາຄວາມອຸດົມສົມ ບູນຂອງຊັບພະຍາກອນປ່າໄມ້, ຄວາມສົມດຸນຂອງລະບົບນິເວດໃນທໍາມະຊາດ, ເປັນມໍລະດົກທາງທໍາມະຊາດອັນລໍ້າາຄ່າຂອງຊາດລາວເຮົາ ແລະຂອງໂລກ. ນອກນັ້ນ, ຍັງມີຄວາມສໍາຄັນຕໍ່ກັບປະຊາກອນມະນຸດທີ່ໄດ້ອາໄສທໍາມະຊາດໂດຍສະເພາະແມ່ນຈາກສັດປ່າ ແລະພືດປ່າ ເພື່ອຕອບສະໜອງຄວາມຕ້ອງການຕັ້ງແຕ່ອາຫານ, ເຊື້ອໄຟ, ຢາປົວພະຍາດ, ທີ່ຢູ່ອາໄສ ແລະເຄື່ອງ ນຸ່ງຫົ່ມ.

ໂອກາດນີ້ ທ່ານກ່າວຕື່ມວ່າ: ຕໍ່ກັບສະພາບກາບດັ່ງກ່າວ ສປປ ລາວ ໃນນາມທີ່ເປັນສະມາຊິກປະເທດພາຄີຂອງສົນທິສາສັນສາກົນ CITES ນັບຕັ້ງແຕ່ປີ 2004 ເປັນຕົ້ນມາໄດ້ປະຕິບັດຕາມພັນທະທີ່ຕົນເອງຮັບຜິດຊອບຢ່າງເຕັມທີ່ຊຶ່ງສະແດງໃຫ້ເຫັນວ່າພັກ ແລະ ລັດຖະບານໄດ້ໃຫ້ຄວາມສໍາຄັນຕໍ່ການອະນຸລັກຊີວະນາໆນັ້ນກໍຄືສັດປ່າ ແລະພືດປ່າ ໂດຍການກໍານົດນິຕິກໍາເພື່ອຄຸ້ມຄອງປົກປັກຮັກສາ ຕິດພັນກັບການໂຄສະນາເຜີຍແຜ່ ແລະ ສົ່ງເສີມຢ່າງກວ້າງຂວາງ ໃນຂອບເຂດທົ່ວປະເທດ ມີບັນດາຄໍາສັ່ງ, ລະບຽບການ, ນິຕິກໍາ, ມາດຕະການທາງກົດໝາຍ, ເພື່ອເປັນເຄື່ອງມືໃນການຈັດຕັ້ງປະຕິບັດ, ຄຽງຄູ່ກັບການໂຄສະນາເຜີຍແຜ່ກົດໝາຍ ແລະ ລະບຽບການ ໃຫ້ພໍ່ແມ່ປະຊາຊົນ, ຜູ້ປະກອບການ, ນັກທຸລະກິດ ແລະ ທຸກຄົນທົ່ວສັງຄົມ ເພື່ອໃຫ້ຮັບຮູ້ ແລະ ເຂົ້າໃຈ, ໃຫ້ເຫັນໄດ້ຄວາມສໍາຄັນຂອງສັດປ່າ ແລະພືດປ່າ ຕໍ່ລະບົບນິເວດ, ຕໍ່ເສດຖະກິດ-ສັງຄົມ ແລະ ໃຫ້ເຫັນເຖິງຜົນຮ້າຍ, ຜົນທີ່ຈະໄດ້ຮັບຫາກມີການລ່າ, ຄ້າ-ຂາຍ ສັດນໍ້າ ແລະສັດປ່າປະເພດຫວງຫ້າມ ແລະປະເພດຄຸ້ມຄອງ ແບບຜິດກົດໝາຍ.

ວັນສັດປ່າ ແລະ ພືດປ່າໂລກ (World Wildlife Day) ແມ່ນກົງກັບວັນທີ 3 ມີນາ ຂອງທຸກໆປີ ຊຶ່ງກໍານົດເອົາຕາມວັນທີ່ກໍ່ຕັ້ງພາຄີສົນທິສັນຍາສາກົນ CITES ເມື່ອວັນທີ 3 ມີນາ ປີ 1973 ປະເທດທີ່ເຂົ້າເປັນພາຄີ ມີທັງໝົດ 184 ປະເທດໃນທົ່ວໂລກ ແລະ ສປປ ລາວ ກໍໄດ້ເຂົ້າເປັນພາຄີຂອງສົນທິສັນຍາດັ່ງກ່າວ ໃນວັນທີ 30 ພຶດສະພາ 2004 ຊຶ່ງໃນວັນທີ 20 ທັນວາ ປີ 2013 ໃນກອງປະຊຸມສະມັດຊາໃຫຍ່ຂອງສະຫະປະຊາດ (UNGA) ໄດ້ມີມະຕິປະກາດໃຫ້ວັນທີ 3 ມີນາ ປີ 1973 ຊຶ່ງເປັນມື້ລົງນາມສົນທິສັນຍາສາກົນວ່າດ້ວຍ ການຄ້າຂາຍສັດນໍ້າ, ສັດປ່າ ແລະ ພືດປ່າທີ່ໃກ້ຈະສູນພັນລະຫວ່າງຊາດ (CITES) ໃຫ້ເປັນມື້ສໍາຄັນໃນຖານະ UN World Wildlife ຫຼື World Wildlife Day ເພື່ອສະເຫຼີມສະຫຼອງໃຫ້ແກ່ສັດປ່າ ແລະພືດປ່າໂລກ. ຕາມມະຕິຂອງກອງປະຊຸມສະມັດຊາໃຫຍ່ຂອງສະຫະປະຊາດ (UNGA) ຍັງກໍານົດ ໃຫ້ສໍານັກງານເລຂາທິການ CITES ເປັນຜູ້ອໍານວຍຄວາມສະດວກໃນການປະຕິບັດຕາມມື້ພິເສດຕາມຂອງປະຕິທິນຂອງສະຫະປະຊາຊາດ ວັນສັດປ່າໂລກໄດ້ການເປັນງານປະຈຳປີທີ່ສໍາຄັນທີ່ສຸດໃນໂລກທີ່ອຸທິດໃຫ້ກັບສັດປ່າ.
ໂດຍ: ສຳນານ

แชร์