ມອບ-ຮັບ ພາຫະນະລົດໃຫຍ່ທີ່ນໍາເຂົ້າບໍ່ຖືກຕ້ອງ

ແຫຼ່ງຂ່າວຈາກເມືອງແກ່ນທ້າວ ແຂວງໄຊຍະບູລີ ໃຫ້ຮູ້ວ່າ: ເມື່ອບໍ່ດົນມານີ້, ຢູ່ດ່ານສາກົນຂົວມິດຕະພາບນໍ້າເຫືອງ ເມືອງແກ່ນທ້າວ ໄດ້ມີພິທີມອບ-ຮັບພາຫະນະລົດໃຫຍ່ ລະຫວ່າງແຂວງໄຊຍະບູລີ ສປປ ລາວ ກັບ ຈັງຫວັດອຸດ ຕະລະດິດ ຣາຊະອານາຈັກໄທ ຈໍານວນ 4 ຄັນຄື: ລົດຍີ່ຫໍ້ ໂຕໂຍຕ້າ ວີໂກ້ (TOYOTA VIGO) ສະມາດແຄັບ ປະເພດກະບະ ສີປອນເງິນ 1 ຄັນ, ລົດຍີ່ຫໍ້ ໂຕໂຍຕ້າ ຣີໂວ (TOYOTA REVO) ສະມາດແຄັບ ປະເພດກະບະສີຂາວ 1 ຄັນ, ລົດຍີ່ຫໍ້ໂຕໂຍຕ້າວີໂກ້ (TOYOTA VIGO) ປະເພດກະບະ 4 ປະຕູ ສີດໍາ 1 ຄັນ ແລະ ລົດຍີ່ຫໍ້ ອີຊູຊຸ (IZUZU) ປະເພດກະບະ 4 ປະຕູ ສີຂາວ 1 ຄັນ ຊຶ່ງເປັນລົດທີ່ກຸ່ມຄົນບໍ່ດີໄດ້ລັກລອບນໍາເຂົ້າ ສປປ ລາວ ບໍ່ຖືກຕ້ອງຕາມກົດໝາຍຊຶ່ງຕາງໜ້າມອບໂດຍ ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ ແລະແລະຮັບໂດຍ ທ່ານ ສາມາດ ອິນທະປັນຍາ ນາຍອໍາເພີບ້ານໂຄກ ຈັງຫວັດອຸດ ຕະລະດິດ ໂດຍມີພາກສ່ວນກ່ຽວຂ້ອງສອງຝ່າຍເຂົ້າຮ່ວມເປັນສັກຂີພິຍານ.

ການມອບ-ຮັບລົດດັ່ງກ່າວ, ແມ່ນປະຕິບັດຕາມບົດບັນທຶກກອງປະຊຸມຄະນະກໍາມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນລາວ-ໄທ, ແຂວງໄຊຍະບູລີ- ຈັງຫວັດອຸດຕະລະດິດ ຄັ້ງທີ 7 ໃນວັນທີ 17 ພຶດສະພາ 2017 ທີ່ຈັງຫວັດອຸດຕະລະດິດ ຣາຊະອານາຈັກໄທ, ການແຈ້ງຂອງເຈົ້າໜ້າທີ່ ປກສ ເມືອງທົ່ງມີໄຊ ແລະເມືອງບໍ່ແຕນ ຄັ້ງວັນທີ 15 ແລະ ວັນທີ 17 ກຸມພາ 2023 ແລະໜັງສືຂອງຈັງຫວັດອຸດຕະລະດິດ ສະບັບເລກທີ ອຕ 0017.3/2917, ລົງວັນທີ 8 ມີນາ 2023.
ຂ່າວ: ຖວທ ເມືອງແກ່ນທ້າວ

แชร์