ສະຫຼຸບການປະຕິບັດວຽກຄຸ້ມຄອງລາຄາສິນຄ້າ ແລະຄ່າບໍລິການ

ກອງປະຊຸມຄະນະຊີ້ນຳວຽກງານຄຸ້ມຄອງລາຄາສິນຄ້າ ແລະ ຄ່າບໍລິການຄັ້ງທີ 4 ຕາມຂໍ້ຕົກລົງ 126/ນຍ ຄັ້ງທີ I ຈັດຂຶ້ນໃນວັນທີ 7 ມີນາ 2023 ໂດຍການເປັນປະທານຂອງທ່ານ ມະໄລທອງ ກົມມະສິດລັດຖະມົນຕີກະຊວງອຸດສາຫະກຳ ແລະການຄ້າ, ປະທານຄະນະຊີ້ນຳວຽກງານຄຸ້ມຄອງລາຄາສິນຄ້າ ແລະຄ່າບໍລິການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເພື່ອສະຫຼຸບຖອດຖອນບົດຮຽນການຈັດຕັ້ງປະຕິບັດຂອງຄະນະຊີ້ນໍາວຽກງານຄຸ້ມຄອງລາຄາສິນຄ້າ ແລະຄ່າບໍລິການໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ພ້ອມທັງປຶກສາຫາລື, ປະກອບຄໍາຄິດເຫັນໃສ່ແຜນການເຄື່ອນໄຫວວຽກງານຈຸດສຸມຂອງຄະນະຊີ້ນໍາວຽກງານຄຸ້ມຄອງລາຄາສິນຄ້າ ແລະຄ່າບໍລິການ (ຄະນະ 126/ນຍ ປະຈໍາປີ 2023), ບັນຫາປິ່ນອ້ອມວຽກງານຄຸ້ມຄອງລາຄາສິນຄ້າ ແລະຄ່າບໍລິການລະຫວ່າງຂະແໜງການກ່ຽວຂ້ອງ ທີ່ຂຶ້ນກັບພາລະບົດບາດຂອງແຕ່ລະຂະແໜງການໃຫ້ໄດ້ຮັບໝາກຜົນ ແລະບັນລຸຕາມຄາດໝາຍທີ່ວາງໄວ້.

ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ຜູ້ປະຈຳການຄະນະຊີ້ນຳວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ໄດ້ໃຫ້ຮູ້ວ່າ: ປີ 2022 ຄະນະຊີ້ນຳວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ໄດ້ສໍາເລັດການກໍານົດລາຍການສິນຄ້າຄວບຄຸມລາຄາ ແລະ ຄ່າບໍລິການ ເພື່ອແກ້ໄຂບັນຫາລາຄາສິນຄ້າ, ຄະນະຊີ້ນໍາວຽກງານຄຸ້ມຄອງລາຄາສິນຄ້າ ແລະ ຄ່າບໍລິການຂັ້ນສູນກາງ ໄດ້ອອກນິຕິກໍາຕ່າງໆ ເປັນແຕ່ລະໄລຍະ ເພື່ອເປັນບ່ອນອີງໃຫ້ທ້ອງຖິ່ນໃນການຈັດຕັ້ງປະຕິບັດ; ໄດ້ອອກແຈ້ງການສະບັບເລກທີ 1825/ ອຄ, ລົງວັນທີ 9/12/2022 ເຖິງຄະນະຊີ້ນໍາວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ຂັນແຂວງ ໃນຂອບເຂດທົ່ວປະເທດ ໃຫ້ເອົາໃຈໃສ່ຕິດຕາມ, ກວດກາລາຄາສິນຄ້າ ແລະ ຄ່າບໍລິການ ເພື່ອບໍ່ໃຫ້ຜູ້ປະກອບການສວຍໂອກາດຂຶ້ນລາຄາສິນຄ້າ ຕາມລຳພັງໃຈ. ນອກຈາກນັ້ນ, ຍັງໄດ້ປະສານ, ຊຸກຍູ້ບັນດາຂະແໜງການຕ່າງໆ ທັງພາກລັດ ແລະ ເອກະຊົນ ໂດຍສະເພາະ ແມ່ນປະສານສົມທົບກັບຄະນະຄຸ້ມຄອງລາຄາສິນຄ້າ ແລະ ຄ່າບໍລິການນະຄອນຫລວງວຽງຈັນ ຄົ້ນຄວ້າຄືນລະອຽດບັນດາລາຍຈ່າຍຕົວຈິງ ໃນໂຄງປະກອບລາຄາຊີ້ນໝູ ແລະ ເຂົ້າກິນ ເພື່ອໃຫ້ສອດຄ່ອງກັບຕົ້ນທຶນຕົວຈິງ, ຊຸກຍູ້ ບໍລິສັດ ແຈ້ງສະຫວ່າງ ສົ່ງເສີມການກະເສດ ຂາອອກ-ຂາເຂົ້າ ຈໍາກັດ ນໍາໃຊ້ເຂົ້າສານໜຽວປະເພດ 2 ໃນໂຄງການຄັງແຮເຂົ້າແຊກແຊງລາຄາ ແລະ ດັດສົມຕະຫລາດ ຈໍານວນ 340 ໂຕນອອກມາຂາຍໃນລາຄາ 9.700 ກີບ/ກິໂລ (ລາຄາແຊກແຊງ) ຊຶ່ງເລີ່ມຂາຍຕັ້ງແຕ່ວັນທີ 24 ຕຸລາ-24 ທັນວາ 2022 ແລະ ໂຄງການທົດລອງຂາຍຊີ້ນໝູໃນລາຄາຊີ້ນໍາແມ່ນໄດ້ສິ້ນສຸດລົງ ໃນວັນທີ 4 ພະຈິກ 2022.
-----
Cr.ປະເທດລາວ.

แชร์