ແຟງລັງປະກາດເລີກໃຊ້ຖ່ານຫີນພາຍໃນ 10 ປີ

ແຟງລັງມີແຜນຈະຍົກເລີກການໃຊ້ຖ່ານຫີນໃນການຜະລິດກະແສໄຟຟ້າພາຍໃນໄລຍະເວລາ 10 ປີຕໍ່ໜ້າ ຊຶ່ງເປັນໄປຕາມແຜນທີ່ຕັ້ງເປົ້າໝາຍໄວ້.ຕາມຂ່າວຕ່າງປະເທດລາຍງານໃນວັນທີ 4 ເມສາຜ່ານມາວ່າ ແຟງລັງເປັນປະເທດທີ່ໄດ້ຊື່ວ່າປະເທດທີ່ມີຄວາມສຸກທີ່ສຸດໃນໂລກ ໂດຍການຈັດອັນດັບຂອງອົງການສະຫະປະຊາຊາດໃນປີນີ້ ກຳລັງມີແຜນຈະຍົກເລີກການໃຊ້ຖ່ານຫີນໃນການຜະລິດ ກະແສໄຟຟ້າພາຍໃນໄລຍະ 10 ປີຕໍ່ໜ້າ ໂດຍແຜນຍຸດທະສາດທີ່ຕັ້ງເປົ້າໝາຍຍົກເລີກການເພີ່ງພາຖ່ານຫີນເປັນແຫຼ່ງພະລັງງານພາຍໃນປີ 2030, ເມື່ອບໍ່ດົນມານີ້ແຟງລັງໄດ້ຮັບຮອງແຜນດັ່ງກ່າວ ໂດຍໄວກວ່າແຜນການ 1 ປີ ໝາຍຄວາມ ວ່າ ຕ້ອງປັບແຜນການຫຼຸດການໃຊ້ຖ່ານຫີນໃຫ້ຫຼາຍຂຶ້ນປະ ມານ 10%. ປະຈຸບັນ ແຟງລັງໃຊ້ຖ່ານຫີນໃນການຜະລິດກະ ແສໄຟຟ້າຄິດເປັນອັດຕາສ່ວນປະມານ 8% ຂອງຄວາມຕ້ອງການໃຊ້ໄຟຟ້າທັງໝົດ ຊຶ່ງເປົ້າໝາຍດັ່ງກ່າວເຮັດໃຫ້ລັດຖະບານຕ້ອງຫາແຫຼ່ງພະລັງງານສະອາດທີ່ບໍ່ແພງຈົນເກີນໄປເພື່ອເຮັດໃຫ້ທຸລະກິດເອກະຊົນສາມາດບໍລິຫານຕົ້ນທຶນໄດ້ຢ່າງມີປະສິດທິພາບ.

ນອກຈາກແຟງລັງແລ້ວຫຼາຍປະເທດທົ່ວໂລກກໍ່ກຳລັງເລັ່ງເດີນໜ້າໂຄງການຫຼຸດເພີ່ງພາຖ່ານຫີນໃນການຜະລິດກະແສໄຟຟ້າເນື່ອງຈາກຕ້ອງການຫຼຸດການປ່ອຍແກ໊ສກາກບອນໄດອອກໄຊ ແລະອາຍພິດເຮືອນແກ້ວໃນຂະບວນການຜະລິດເຊັ່ນ: ນອກແວ ປະຈຸບັນສາມາດບັນລຸເປົ້າໝາຍການປ່ອຍແກ໊ສກາກບອນໄດອອກໄຊໄດ້ໄວຂຶ້ນກວ່າກຳນົດເຖິງ 3 ປີ.

ນສພ ເສດຖະກິດ-ສັງຄົມ

• 05/04/2019