ແມ່ຍິງມີສ່ວນຮ່ວມໃນສາທາລະນະ

ສູນກາງສະຫະພັນແມ່ຍິງລາວຮ່ວມກັບອົງການ UNFPA ແລະບັນດາຄູ່ຮ່ວມມືໄດ້ພ້ອມກັນສະເຫຼີມສະຫຼອງວັນແມ່ຍິງສາກົນ ປະຈຳປີ 2023 ໃນວັນທີ 8 ມີນາຜ່ານມາ ໂດຍການໃຫ້ກຽດເຂົ້າຮ່ວມຂອງທ່ານນາງ ອິນລາວັນ ແກ້ວບຸນພັນປະທານສູນກາງສະຫະພັນແມ່ຍິງລາວ;ທ່ານ ນາງ ມາຣຽມ ຄານ, ຜູ້ຕາງໜ້າອົງການ UNFPAແລະ ພາກສ່ວນກ່ຽວຂ້ອງໂດຍຈັດຂຶ້ນທີ່ເດີ່ນພຣະທາດຫຼວງ, ນະຄອນຫຼວງວຽງຈັນ ຊຶ່ງມີກິດຈະກໍາຍ່າງເພື່ອສຸຂະພາບແນໃສ່ສົ່ງເສີມສິດທິໃນການເຂົ້າເຖິງ ແລະມີສ່ວນຮ່ວມຂອງແມ່ຍິງໃນສາທາລະນະຢູ່ທຸກຂົງເຂດຂອງຊີວິດ.

ທ່ານປະທານສູນກາງສະຫະພັນແມ່ຍິງລາວກ່າວວ່າ:“ປະຈຸບັນໃນຍຸກໂລກາພິວັດການນໍາໃຊ້ເຕັກໂນໂລຊີ ແລະການສື່ສານທີ່ທັນສະໄໝໄດ້ກາຍເປັນປັດໃຈໜຶ່ງໃນການດໍາລົງຊີວິດຂອງພົນລະເມືອງໃນທົ່ວໂລກ ກໍຄືພົນລະເມືອງລາວ ເປັນຕົ້ນການນໍາໃຊ້ເພື່ອການສື່ສານລະຫວ່າງກັນ, ການເດີນທາງ, ການທໍາມາຫາກິນ, ການນໍາໃຊ້ເພື່ອການດໍາເນີນທຸລະກິດຂະໜາດນ້ອຍ ແລະ ຂະໜາດໃຫ່ຍ ແລະ ບັນຫາອື່ນໆ ຊຶ່ງບັນຫາດັ່ງກ່າວໄດ້ສົ່ງຜົນກະທົບທາງດ້ານບວກ ແລະ ດ້ານລົບ ຕໍ່ເອື້ອຍນ້ອງແມ່ຍິງຈໍານວນໜຶ່ງທີ່ຂາດທັກສະ ເຮັດໃຫ້ຫຼົງເຊື່ອຈາກການນໍາໃຊ້ເຕັກໂນໂລຊີ ແລະ ຕົກເປັນເຫຍື້ອຂອງການຕົວະຍົວະຫຼອກລວງໃນການດໍາເນີນທຸລະກິດ, ຕົວະຍົວະຫຼອກລວງໄປເຮັດວຽກໃນສະຖານທີ່ທີ່ບໍ່ມີຄວາມປອດໄພ ແລະບໍ່ໄດ້ຮັບຄ່າແຮງງານຕາມການຕົກລົງເຮັດໃຫ້ມີການໃຊ້ຄວາມຮຸນແຮງຕໍ່ແມ່ຍິງ ແລະເດັກທີ່ເກີດຈາກການນໍາໃຊ້ເຕັກໂນໂລຊີ.”

ການສະເຫຼີມສະຫຼອງວັນແມ່ຍິງໃນປີນີ້ພາຍໃຕ້ຫົວ“ດີຈິຕອນ ສໍາລັບທຸກຄົນ: ນະວັດຕະກໍາ ແລະການນໍາໃຊ້ເຕັກໂນໂລຊີເພື່ອຄວາມສະເໝີພາບຍິງ-ຊາຍ”ກໍເພື່ອຮັບປະກັນໃຫ້ທຸກຄົນໄດ້ເຂົ້າເຖິງເຕັກໂນໂລຊີ ແລະ ການປົກປ້ອງສິດຜົນປະໂຫຍດຂອງແມ່ຍິງ ແລະ ເດັກຍິງ ຈາກການໃຊ້ຄວາມຮຸນແຮງໂດຍຜ່ານການນໍາໃຊ້ເຕັກໂນໂລຊີ ໃນນີ້ການເຜີຍແຜ່ສື່ລາມົກອານາຈານທີ່ເປັນການລະເມີດຮີດຄອງປະເພນີອັນດີງາມຂອງຊາດ ແລະເປັນການລະເມີດຕໍ່ກົດໝາຍຂອງ ສປປ ລາວ” ; ສປປ ລາວ ເປັນປະເທດທີ່ຊຸກຍູ້ຄວາມກ້າວໜ້າ ແລະເຫັນດີເຫັນພ້ອມຕໍ່ສິດທິຂອງແມ່ຍິງຢ່າງສະເໝີຕົ້ນສະເໝີປາຍໃນເວທີສາກົນໂດຍສື່ໃຫ້ເຫັນຜ່ານບັນດາກົດໝາຍ ແລະນະໂຍບາຍແຫ່ງຊາດຕ່າງໆທີ່ຊ່ວຍສະໜັບສະໜູນວຽກງານດັ່ງກ່າວ.

แชร์