ຊາວໄຊສົມບູນໄດ້ຊົມໃຊ້ໄຟຟ້າ 15.203 ຄອບຄົວ

ທ່ານ ນະລົງສອນ ຈັນທະບຸນລີ ຮອງຫົວໜ້າພະແນກພະລັງງານ ແລະບໍ່ແຮ່ (ພບ) ແຂວງໄຊສົມບູນ ໄດ້ແຈ້ງຜົນການຈັດຕັ້ງປະຕິບັດວຽກງານ (ພບ) ປະຈຳປີ 2022 ຕໍ່ກອງປະຊຸມສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2022 ແລະທິດທາງແຜນການປີ2023 ໃນວັນທີ 7 ມີນາ 2023 ວ່າ: ໄດ້ຕິດຕາມຊຸກຍູ້ໂຄງການເຂື່ອນໄຟຟ້າຂະໜາດໃຫຍ່ ແລະຂະໜາດນ້ອຍທີ່ຜະລິດຢ່າງເປັນທາງການໂດຍພາຍໃນແຂວງມີທັງໝົດ 8 ໂຄງການ, ໂຄງການທີ່ເຊັນສັນຍາສຳປະທານ CA ມີ 8 ໂຄງການ, ໂຄງການທີ່ກຳລັງສຶກສາ-ສຳຫຼວດ ມີ 6 ໂຄງການ; ການຜະລິດ-ການຈຳໜ່າຍ ແລະນຳເຂົ້າກະແສໄຟຟ້າພາຍໃນແຂວງສາມາດຮັບພະລັງງານທັງໝົດ 2 ຕື້ກວ່າກິໂລວັດໂມງ (kw/h) ແລະ ພະລັງງານທີ່ຕົກເຮ່ຍໃນລະບົບ 42 ລ້ານກວ່າ kw/h, ຕິດຕາມຊຸກຍູ້ໂຄງການພັດທະນາຊຸມຊົນທົ່ວແຂວງມີ 4 ບໍລິສັດ 5 ໂຄງການ; ການຊົມໃຊ້ພະລັງງານລູກຄ້າລາຍໃຫຍ່ມີທັງໝົດ 383 ລ້ານກວ່າkw/h ຄິດເປັນເງິນ ເທົ່າກັບ 259ລ້ານກວ່າກີບ ແລະ ການຊົມໃຊ້ໄຟຟ້າທົ່ວແຂວງ ມີທັງໝົດ 5 ເມືອງ 89 ບ້ານ, ໄດ້ຊົມໃຊ້ໄຟຟ້າ 15.203 ຄອບຄົວ ໃນນີ້: ຄອບຄົວທີ່ມີໝໍ້ນັບໄຟ 14.831 ຄອບຄົວ, ຊົມໃຊ້ໄຟຟ້າຮ່ວມກັນກັບຄອບຄົວອື່ນມີ 372 ຄອບຄົວ ແລະຄອບຄົວທີ່ບໍ່ມີໄຟຟ້າໃຊ້ 220 ຄອບຄົວ; ເກັບລາຍຮັບໄດ້ທັງໝົດ 33,306 ຕື້ກວ່າກີບ, ລາຍຈ່າຍ 33,932 ຕື້ກວ່າກີບ ແລະດຸນດ່ຽງເທົ່າ 625 ລ້ານກວ່າກີບ.

ວຽກງານການຄຸ້ມຄອງບໍ່ແຮ່: ສະເພາະໃນ 10 ເດືອນຜ່ານມາ ໄດ້ຕິດຕາມ, ກວດກາ ແລະສົ່ງເສີມການຂຸດຄົ້ນ, ປຸງແຕ່ງ ແລະຈຳໜ່າຍແຮ່ທາດຂອງບັນດາບໍລິສັດທົ່ວແຂວງ ໃນນີ້ ໂຄງການຂຸດຄົ້ນແຮ່ທອງເຂັ້ມຂຸ້ນປະຕິບັດໄດ້ 10ລ້ານກວ່າໂຕນ/ປີ, ໂຄງການຂຸດຄົ້ນ ແຮ່ຄຳ-ເງິນ ປະຕິບັດໄດ້ 5 ລ້ານກວ່າໂຕນ/ປີ, ຜະລິດແຮ່ໂລຫະປະສົມຄຳ-ເງິນ ກ່ອນເຂົ້າຫຼອມໄດ້ 19 ລ້ານກວ່າກຼາມ, ໂຄງການຂຸດຄົ້ນແຮ່ເຫຼັກສົ່ງອອກ 72.652ຖ້ຽວ, ໂຄງການຂຸດຄົ້ນແຮ່ຄຳຕົກຂ້ອນຜະລິດໄດ້ທັງໝົດ36ພັນກວ່າກຼາມ, ໂຄງການຂຸດຄົ້ນຫີນຜາ 2.058ແມັດກ້ອນ/ປີ ມູນຄ່າການຜະລິດທັງໝົດ 102 ລ້ານກວ່າກີບ ແລະອື່ນໆຈໍານວນໜຶ່ງ;ສໍາລັບໂຄງການຂຸດຄົ້ນດິນແດງ ຍັງບໍ່ມີການເຄື່ອນໄຫວ;
- ພາບ-ຂ່າວ: ຮົວຈັ້ງ ດຣາເຊັ້ງ

แชร์