ຮອງນາຍົກ ເຂົ້າຮ່ວມກອງປະຊຸມສຸດຍອດຜູ້ນຳບັນດາປະເທດດ້ອຍພັດທະນາ

ໃນວັນທີ 4 ມີນາ 2023 ທີ່ຫໍປະຊຸມແຫ່ງຊາດກາຕາ, ນະຄອນຫລວງໂດຮາ, ປະເທດກາຕາ, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດໄດ້ນຳພາຄະນະຜູ້ແທນ ແຫ່ງ ສປປ ລາວ ເຂົ້າຮ່ວມກອງປະຊຸມສຸດຍອດຜູ້ນຳບັນດາປະເທດດ້ອຍພັດທະນາໂດຍມີທ່ານ ລາຊາລັສ ແມ້ກຄາທີ ຊັກແວລາ ປະທານາທິບໍດີ ແຫ່ງ ສາທາລະນະລັດມາລາວີ ໃນນາມປະທານກຸ່ມປະເທດດ້ອຍພັດທະນາ, ໄດ້ເປັນປະທານກ່າວເປີດກອງປະຊຸມຢ່າງເປັນທາງການ ພ້ອມທັງມີທ່ານ ແຊກ ໂມຮາເມັດ ບິນ ອັບດຸນລາມັນ ອານທານີ ຮອງນາຍົກລັດຖະມົນຕີ, ລັດຖະມົນຕີຕ່າງປະເທດ ແຫ່ງລັດກາຕາ ແລະທ່ານ ແອນໂຕນິໂອ ກູເຕເລສ ເລຂາທິການໃຫ່ຍອົງການ ສປຊ ໄດ້ເຂົ້າຮ່ວມ ແລະກ່າວປາໄສໃນພາກເປິດກອງປະຊຸມດັ່ງກ່າວ.

ຫລັງຈາກນັ້ນ, ບັນດາຫົວໜ້າຄະນະຜູ້ແທນລະດັບປະມຸກລັດ, ຫົວໜ້າລັດຖະບານ, ຮອງນາຍົກລັດຖະມົນຕີ ແລະລັດຖະມົນຕີຂອງບັນດາປະເທດດ້ອຍພັດທະນາ ໄດ້ຜັດປ່ຽນກັນຂຶ້ນກ່າວປາໄສ ເພື່ອແລກປ່ຽນທັດສະນະ ແລະ ວິໄສທັດກ່ຽວກັບການແກ້ໄຂ ບັນດາສິ່ງທ້າທາຍທີ່ສົ່ງຜົນກະທົບຕໍ່ການພັດທະນາ ແລະຄວາມພະຍາຍາມໃນການຫລຸດພົ້ນອອກຈາກສະຖານະພາບປະເທດດ້ອຍພັດທະນາກໍຄືການສະແດງຄວາມໝາຍໝັ້ນໃນການຈັດຕັ້ງປະຕິບັດແຜນດຳເນີນໂດຮາສຳລັບປະເທດດ້ອຍພັດທະນາ ສົກປີ 2022–2031.

ໃນບົດປາໄສຂອງ ທ່ານເລຂາທິການໃຫຍ່ອົງການ ສປຊ ໄດ້ສະແດງຄວາມຊົມເຊີຍຕໍ່ບັນດາຜົນສໍາເລັດ ແລະ ຄວາມພະຍາຍາມຂອງບັນດາປະເທດດ້ອຍພັດທະນາໃນການພັດທະນາປະເທດໃນໄລຍະທີ່ຜ່ານມາ, ແຕ່ກໍເຫັນວ່າບັນດາປະເທດເຫລົ່ານີ້ຍັງສືບຕໍ່ປະເຊີນກັບສິ່ງທ້າທາຍຕ່າງໆຢ່າງໜັກໜ່ວງໃນປັດຈຸບັນຫລາຍກວ່າປະເທດອື່ນໆ ໂດຍສະເພາະໂຄງສ້າງເສດຖະກິດມະຫາພາກຂອງໂລກ, ການນໍາໃຊ້ ແລະເຂົ້າເຖິງຊັບພະຍາກອນທໍາມະຊາດທີ່ບໍ່ເທົ່າທຽມກັນ, ຜົນກະທົບຈາກການລະບາດຂອງພະຍາດໂຄວິດ-19, ຜົນກະທົບຈາກບັນຫາພາກພື້ນ, ບັນຫາໜີ້ສິນຈໍານວນມະຫາສານ, ຄວາມແຕກໂຕນກັນທາງດ້ານດີຈິຕອນ ແລະ ອື່ນໆ. ສະນັ້ນ, ຈຶ່ງມີຄວາມສໍາຄັນ ແລະ ຈໍາເປັນທີ່ສຸດທີ່ອົງການຈັດຕັ້ງສາກົນ ກໍຄືວົງຄະນະຍາດສາ ກົນຈະຕ້ອງໄດ້ມີການປະຕິຮູບ ແລະ ເພີ່ມທະວີການຊ່ວຍເຫລືອປະເທດດ້ອຍພັດທະນາ ໃຫ້ຫລຸດພົ້ນອອກຈາກສະຖານະພາບດັ່ງກ່າວໄດ້ຢ່າງຍືນຍົງ ແລະ ສືບຕໍ່ໃຫ້ການສະໜັບສະໜູນຊ່ວຍເຫລືອປະເທດເຫລ່ານັ້ນ ພາຍ ຫລັງທີ່ຫລຸດພົ້ນແລ້ວ ໂດຍທ່ານ ໄດ້ເນັ້ນຢໍ້າວ່າການຫລຸດພົ້ນອອກຈາກສະຖານະພາບປະເທດດ້ອຍພັດທະນາຄວນຖືເປັນລາງວັນ ແຕ່ບໍ່ແມ່ນການລົງໂທດ.

ໃນໂອກາດດຽວກັນນັ້ນ, ທ່ານ ສະເຫລີມໄຊ ກົມມະສິດ ກໍໄດ້ມີຄໍາເຫັນຕໍ່ກອງປະຊຸມ ເຊິ່ງໄດ້ຮຽກຮ້ອງໃຫ້ວົງຄະ ນະຍາດສາກົນ ສືບຕໍ່ປະຕິບັດຄຳໝາຍໝັ້ນທາງດ້ານການເມືອງ ແລະ ຊອກຫາວິທີທາງແກ້ໄຂຄວາມຕ້ອງການອັນຮີບດ່ວນແລະ ບັນຫາທ້າທາຍຕ່າງໆ ຢ່າງມີລັກສະນະຫັນປ່ຽນໃໝ່, ສາມາດປະຕິບັດໄດ້ຢ່າງມີປະສິດທິພາບ, ເປັນຮູບປະທໍາ ແລະ ມີຄວາມຍືນຍົງ ແນໃສ່ເຮັດໃຫ້ບັນດາປະເທດດ້ອຍພັດທະນາ ສາມາດກ້າວໄປພ້ອມກັນກັບປະເທດອື່ນໆ. ພ້ອມກັນນັ້ນ, ທ່ານ ຍັງໄດ້ຢ້ຳຄືນຄຳໝາຍໝັ້ນຂອງ ສປປ ລາວ ໃນການສືບຕໍ່ຈັດຕັ້ງແຜນປະຕິບັດງານໂດຮາ ສໍາລັບປະເທດດ້ອຍພັດທະນາ ລວມທັງຂອບການຮ່ວມມືຕ່າງໆຂອງ ອົງການ ສປຊ ກໍຄືການເຂົ້າຮ່ວມຢ່າງຕັ້ງໜ້າໃນປະຊາຄົມອາຊຽນ, ຂອບການຮ່ວມມື ແລະ ຂໍ້ລິເລິ່ມລະດັບພາກພື້ນອື່ນໆ ເພື່ອໃຫ້ບັນລຸເປົ້າໝາຍການພັດທະ ນາຂອງປະເທດ.
ໃນມື້ດຽວກັນນີ້, ທ່ານ ສະເຫລີມໄຊ ກົມມະສິດ ຍັງໄດ້ພົບປະສອງຝ່າຍກັບ ທ່ານ ນາງ ພາມເມລາ ໂຄກ ແຮມມິວຕັນ (Pamela Coke-Hamilton), ຜູ້ອໍານວຍການບໍລິຫານງານສູນການຄ້າສາກົນ (Executive Director of International Trade Center) ເພື່ອປຶກສາຫາລືກ່ຽວ ກັບການພົວພັນຮ່ວມມືດ້ານການຄ້າ, ການສົ່ງເສີມການລົງທຶນ, ການສ້າງຂີດຄວາມສາມາດຂອງຂະແໜງການການຄ້າ ແລະ ພາກເອກະຊົນ ຂອງ ສປປ ລາວ ເພື່ອກະ ກຽມໃຫ້ແກ່ການຫລຸດພົ້ນອອກຈາກສະຖານະພາບປະ ເທດດ້ອຍພັດທະນາຂອງ ສປປ ລາວ.
ສຳລັບການເຄື່ອນໄຫວໃນວັນທີ 5 ມີນາ, ທ່ານ ສະເຫລີມໄຊ ກົມມະສິດ ພ້ອມຄະນະຜູ້ແທນ ໄດ້ເຂົ້າຮ່ວມພິທີເປີດກອງປະຊຸມລະດັບສູງ ອົງການສະຫະປະຊາຊາດ ວ່າດ້ວຍປະເທດດ້ອຍພັດທະນາ ຄັ້ງທີ 5 ຢ່າງເປັນທາງການ ໂດຍພາຍໃຕ້ການເປັນປະທານຂອງ ທ່ານ ເຊກ ທາມິມ ບິນ ຮາແມດ ອານທານີ (Sheikh Tamim bin Hamad al Thani), ກະສັດແຫ່ງກາຕາ ເຊິ່ງໄດ້ໄດ້ຮຽກຮ້ອງວົງຄະນາຍາດສາກົນຮັບຮອງເອົາມາດຕະການຮອບດ້ານ ເພື່ອໃຫ້ປະເທດດ້ອຍພັດທະນາສາມາດຫລຸດພົ້ນອອກຈາກສະ ຖານະພາບຢ່າງຍືນຍົງ ພ້ອມທັງໄດ້ປະກາດການປະກອບສ່ວນທຶນຈຳນວນ 60 ລ້ານໂດລາ ສຳລັບການຈັດຕັ້ງປະຕິ ບັດແຜນດຳເນີນງານໂດຮາ. ນອກຈາກນັ້ນ, ຍັງມີການກ່າວປາໄສຂອງທ່ານນາງ ຣາບາບ ຟາຕິມາ (Rabab Fatima), ຮອງເລຂາທິການໃຫຍ່ ສປຊ, ຜູ້ຕາງໜ້າຂັ້ນສູງຮັບຜິດ ຊອບວຽກງານຂອງກຸ່ມປະເທດດ້ອຍພັດທະນາ, ກຸ່ມປະເທດກໍາລັງພັດທະນາທີ່ບໍ່ມີີຊາຍແດນຕິດກັບທະເລ ແລະ ກຸ່ມປະເທດເກາະດອນນ້ອຍກໍາລັງພັດທະນາ, ທ່ານເລຂາ ທິການໃຫຍ່ອົງການ ສປຊ, ທ່ານ ນາງ ລາເຊັສຊາຣ ສະໂຕວາ (Lachezar Stoeva), ປະທານສະພາເສດຖະກິດ ແລະ ສັງຄົມ ສປຊ, ທ່ານ ລາຊາລັສ ແມ້ກຄາທີ ຊັກແວລາ, ປະທານາທິບໍດີ ແຫ່ງ ສາທາລະນະລັດມາລາວີ ໃນນາມເປັນປະທານກຸ່ມປະເທດດ້ອຍພັດທະນາ, ທ່ານ ນາງ ເຊກ ຮາຊິນາ (H.E. Sheikh Hasina), ນາຍົກລັດຖະມົນຕີ ແຫ່ງສາທາລະນະລັດ ປະຊາທິປະໄຕ ບັງກະລາເທດ ແລະ ທ່ານ ແມບລຸດ ຄາວຸດສໂຊກລູ (Mevlut Cavusoglu), ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະ ລັດ ຕວັກກີເຍ ໃນນາມເປັນເຈົ້າພາບຈັດກອງປະຊຸມ ສປຊ ວ່າດ້ວຍປະເທດດ້ອຍພັດທະນາ ຄັ້ງທີ 4. ຫລັງຈາກນັ້ນ, ກໍໄດ້ມີການຈັດພິທີລະນຶກວັນຄົບຮອບ 50 ປີ ແຫ່ງການສ້າງຕັ້ງກຸ່ມປະເທດດ້ອຍພັດທະນາອີກດ້ວຍ.

ໃນພາກທ່ຽງ, ທ່ານ ຮອງນາຍົກລັດຖະມົນຕີ ຍັງໄດ້ຮ່ວມກັບນາຍົກລັດຖະມົນຕີ ບັງກະລາເທດ ແລະ ຮອງນາຍົກລັດຖະມົນຕີ, ລັດຖະມົນຕີກະຊວງພື້ນຖານໂຄງລ່າງ ແລະ ໂທລະຄົມມະນາຄົມ ເນປານ ຂຶ້ນກ່າວປາໄສໃນ ກອງປະ ຊຸມປິ່ນອ້ອມລະດັບສູງ ພາຍໃຕ້ຫົວຂໍ້ ການຂ້າມຜ່ານອອກຈາກສະຖານະພາບປະເທດດ້ອຍພັດທະນາ ຢ່າງໂລ່ງລ່ຽນ ແລະ ຍືນຍົງ ຂອງສາມປະເທດ ທີ່ຖຶືກສະເໜີໃຫ້ຫລຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2026. ໃນນັ້ນ, ທ່ານຮອງນາຍົກລັດຖະມົນຕີ ໄດ້ຍົກໃຫ້ເຫັນການວາງເປົ້າໝາຍການພັດທະນາໄລຍະຍາວ ເພື່ອນຳພາປະເທດຊາດຫລຸດພົ້ນອອກຈາກ ສະຖານະພາບດ້ອຍພັດທະນາ ນັບແຕ່ຊຸມປີ 2000 ເປັນຕົ້ນມາ ຈົນສາ ມາດບັນລຸເງື່ອນໄຂການປະເມີນຂອງອົງການ ສປຊ 2 ຄັ້ງຕິດຕໍ່ກັນ ໃນປີ 2018 ແລະ 2021 ຊຶ່ງສົ່ງຜົນໃຫ້ອົງການ ສປຊ ສະເຫນີໃຫ້ ສປປ ລາວ (ລວມທັງປະເທດເນປານ ແລະ ບັງກະລາເທດ) ອອກຈາກສະຖານະພາບດ້ອຍພັດ ທະນາໃນປີ 2026 ພ້ອມທັງເນັ້ນເຖິງຄວາມຈຳເປັນທີ່ທັງສາມປະເທດ ຕ້ອງສືບຕໍ່ໄດ້ຮັບການຮ່ວມມື ແລະ ສະຫນັບສະຫນູນຈາກວົງຄະນາຍາດສາກົນ ເພື່ອຮັບມືກັບວິກິດການຕ່າງໆ ແລະ ເລັ່ງລັດຟື້ນຟູຈາກຜົນກະທົບອັນຫນັກຫນ່ວງ ແລະ ບໍ່ເຄີຍມີມາກ່ອນຈາກການລະບາດຂອງພະຍາດໂຄວິດ-19 ແນໃສ່ສ້າງຄວາມເຂັ້ມແຂງໃນທຸກດ້ານເພື່ອກຽມຄວາມພ້ອມ ໃນການຫລຸດພົ້ນອອກຈາກສະຖາ ນະພາບດັ່ງກ່າວຢ່າງໂລ່ງລ່ຽນ ແລະ ຍືນຍົງ. ກອງປະຊຸມນີ້ ຍັງໄດ້ຖະແຫລງການຮ່ວມ (Joint Statement) ກ່ຽວກັບຄໍາໝາຍໝັ້ນ ແລະ ຂໍ້ຮຽກຮ້ອງຕໍ່ກັບວົງຄະນາຍາດສາກົນ ໃນຂະບວນການຂ້າມຜ່ານ ແລະ ຫລຸດພົ້ນອອກຈາກສະຖານະພາບປະເທດດ້ອຍພັດທະນາ.

ສຳລັບຕອນບ່າຍ, ຄະນະຜູ້ແທນລາວ ໄດ້ໄດ້ເຂົ້າຮ່ວມກອງປະຊຸມພາກອະທິບາຍທົ່ວໄປ ເພື່ອຮັບຟັງການປາໄສຂອງບັນດາຜູ້ນໍາປະເທດຕ່າງໆ ເຊິ່ງໂດຍລວມແມ່ນການສະ ແດງທັດສະນະກ່ຽວກັບການແກ້ໄຂບັນຫາຂອງປະເທດດ້ອຍພັດທະນາ ທີ່ພວມປະເຊີນຢູ່ໃນປະຈຸບັນ ເຊັ່ນ: ການຟື້ນຟູເສດຖະກິດຈາກຜົນກະທົບຂອງການແຜ່ລະບາດຂອງພະຍາດໂຄວິດ-19 ແລະ ສະພາບວິກິດການດ້ານເສດຖະກິດ, ພະລັງງານ ແລະ ອາຫານ ແລະ ຜົນກະທົບຈາກຂໍ້ຂັດແຍ່ງຢູ່ປະເທດອູແກຣນ ໃນປັດຈຸບັນ.

ໃນມື້ດຽວກັນນີ້, ທ່ານຮອງນາຍົກລັດຖະມົນຕີ ຍັງໄດ້ພົບປະສອງຝ່າຍກັບການນຳຂອງບາງປະເທດ ແລະ ບາງອົງການເຊັ່ນ: ທ່ານ ອີແວນ ກີວ ປິນໂຕ (Yvan Gil Pinto), ລັດຖະມົນຕີກະຊວງການຕ່າງປະເທດ ແຫ່ງ ເວເນຊູເອລາ (Venezuela), ທ່ານ ແມບລຸດ ຄາວຸດສໂຊກລູ ລັດຖະມົນຕີກະຊວງການຕ່າງປະເທດ ຕວັກກີເຍ,ທ່ານ ໂຮນເຈີ ເຄີດໂຮມ ນີວເຊັນ (Holger Kirkholm Nielsen), ຜູ້ແທນພິເສດຂອງເດນມາກ (Denmark), ທ່ານ ແອນດຼີວ ມິດເຊວ (Andrew Mitchell) ລັດຖະ ມົນຕີຊີ້ນໍາຂົງເຂດການພັດທະນາ ແລະ ອາຟຣິກກາ ແຫ່ງ ຣາຊາອະນາຈັກອັງກິດ, ທ່ານ ນາງ ອາມິດາ ຊາຊິອາ ອາລິສຈາບານາ (Armida Salsiah Alisjahbana), ຮອງເລຂາທິການໃຫ່ຍອົງການ ສປຊ ທັງເປັນຜູ້ອຳນວຍການບໍລິຫານງານຄະນະກຳມະການເສດຖະກິດ-ສັງຄົມ ຂອງ ອົງການ ສປຊ ປະຈໍາພາກພື້ນອາຊີ-ປາຊິຟິກ (ESCAP) ແລະ ທ່ານ ນາງ ມາມິ ມິຊຶໂທລິ (Mami Mizutori) ຜູ້ຕາງໜ້າພິເສດຂອງເລຂາທິການໃຫ່ຍ, ຜູ້ອຳນວຍການໃຫ່ຍອົງການ ສປຊ ເພື່ອການຫລຸດຜ່ອນຄວາມສ່ຽງຈາກໄພພິບັດ (UNDRR).

ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີຕ່າງປະເທດມີກຳນົດຂຶ້ນກ່າວປາໄສໃນກອງປະຊຸມພາກອະທິບາຍທົ່ວໄປໃນວັນທີ 06 ກຸມພາ 2023. ໃນໄລຍະເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນລາວຍັງຈະໄດ້ເຂົ້າຮ່ວມ ແລະປະກອບຄຳເຫັນກອງປະຊຸມໂຕະມົນ ແລະກອງປະຊຸມປິ່ນອ້ອມຕ່າງໆ, ກອງປະຊຸມລັດຖະ ສະພາສາກົນຂອງບັນດາປະເທດດ້ອຍພັດທະນາ, ກອງປະຊຸມລະດັບລັດຖະມົນຕີສຳລັບການຮ່ວມມືໃຕ້-ໃຕ້, ກອງປະຊຸມພາກເອກະຊົນ, ຊາວໜຸ່ມ, ອົງການຈັດຕັ້ງສັງຄົມຕື່ມອີກ.

แชร์