ເມືອງວຽງຄໍາ ເຜີຍແຜ່ເນື້ອໃນສັນຍາສໍາປະທານໂຄງການຂຸດຄົ້ນບໍ່ແຮ່ຄໍາຕົກຂ້ອນ

ອາທິດຜ່ານມານີ້ຢູ່ສະໂມສອນຂອງເມືອງວຽງຄໍາ ແຂວງຫຼວງພະບາງໄດ້ເປີດກອງປະຊຸມເຜີຍແຜ່ເນື້ອໃນສັນຍາສໍາປະທານໂຄງການຂຸດຄົ້ນແຮ່ຄໍາຕົກຂ້ອນແບບທົດລອງ ຢູ່ເມືອງວຽງຄໍາ ໂດຍເປັນປະທານຮ່ວມຂອງ ທ່ານ ສີວອນ ສອນຄໍາຫຼ້າ ປະທານແນວລາວສ້າງຊາດເມືອງທ່ານ ທອງປານ ບຸນສະນິດ ຮອງຫົວໜ້າພະແນກພະລັງງານ ແລະບໍ່ແຮ່, ມີຜູ້ຕາງໜ້າພະແນກການທີ່ກ່ຽວຂ້ອງຂອງແຂວງ, ບໍລິສັດຜູ້ລົງທຶນ, ຫົວໜ້າ-ຮອງຫົວໜ້າຫ້ອງການ, ກົມກອງພາຍໃນເມືອງເຂົ້າຮ່ວມ.

ວາລະກອງປະຊຸມໄດ້ມີການຜ່ານສັນຍາສຳປະທານ ບໍລິສັດໂອໂຕມາກ ຂາອອກ-ຂາເຂົ້າ ຈໍາກັດຜູ້ດຽວ ເປັນບໍລິສັດໜຶ່ງທີ່ໄດ້ຮັບຄັດເລືອກຕາມເງື່ອນໄຂຊຶ່ງໄດ້ເຊັນສັນຍາສໍາປະທານຂຸດຄົ້ນແຮ່ຄໍາຕົກຂ້ອນ ໃນເນື້ອທີ່ 3 ເຮັກຕາ ຢູ່ເຂດບ້ານນໍ້າຊອຍ ແລະ ບ້ານໜອງຄໍາ ເມືອງວຽງຄໍາ ແຂວງຫຼວງພະບາງ, ລວມອາຍຸສັນຍາສໍາປະທານ 18 ເດືອນ, ກອງປະຊຸມຄັ້ງນີ້ເພື່ອເຮັດໃຫ້ບໍລິສັດດຳເນີນໂຄງການມີຄວາມຖືກຕ້ອງ, ສອດຄ່ອງຕາມກົດໝາຍ, ລະບຽບການ; ທັງເປັນການປະກອບພັນທະ ແລະເສີມສ້າງການມີສ່ວນຮ່ວມຂອງອົງການປົກຄອງທ້ອງຖິ່ນ ແລະ ເຮັດໃຫ້ປະຊາຊົນໃນຂອບເຂດທີ່ຕັ້ງຂອງໂຄງການກໍຄືປະຊາຊົນພາຍໃນເມືອງວຽງຄໍາ ໄດ້ຮັບຮູ້ເຂົ້າໃຈເຖິງການພັດທະນາທັງປະກອບສ່ວນເຮັດໃຫ້ບໍລິສັດໄດ້ເຄື່ອນໄຫວວຽກງານຕາມແຜນການ.

ໂອກາດນີ້ຜູ້ເຂົ້າຮ່ວມກອງປະຊຸມໄດ້ປະກອບຄໍາເຫັນເພື່ອເປັນແນວທາງໃນການຈັດຕັ້ງປະຕິບັດໃຫ້ໄດ້ຜົນດີ. ຈາກນັ້ນ, ຄະນະປະທານໄດ້ມີຄໍາເຫັນຊີ້ນຳບາງບັນຫາ ກ່ຽວກັບການຈັດຕັ້ງປະຕິບັດໃຫ້ມີປະສິດຕິພາບຕື່ມອີກ.
ຂ່າວ-ພາບ: ບຸນທັນ ໄຊຍະວົງ

• 06/03/2023