ບໍລິສັດ ຍອດງື່ມພາວເວີ ເຊັນສັນຍາຮ່ວມທຸລະກິດຫວຽດນາມເຊົ່າສາງເກັບນໍ້າມັນເຊື້ອໄຟ

ໃນວັນທີ 3 ມີນາ 2023 ຜ່ານມາ ຢູ່ທີ່ຫ້ອງການຂອງບໍລິສັດທຽນມິງດຶກ ນະຄອນວິ່ງ ແຂວງເຫງະອານ ສສ.ຫວຽດນາມ ໄດ້ມີການເຊັນສັນຍາຮ່ວມທຸລະກິດ ເຊົ່າສາງເກັບນໍ້າມັນເຊື້ອໄຟ ແລະທ່າເຮືອເພື່ອໃຫ້ໂຮງງານກັ່ນຕອງ ແລະ ປຸງແຕ່ງນໍ້າມັນເຊື້ອໄຟ ຍອດງື່ມພາວເວີ ສາມາດນຳເຂົ້ານໍ້າມັນເຊື້ອໄຟ ແລະ ວັດຖຸດິບໃນການປຸງແຕ່ງນໍ້າມັນເຊື້ອໄຟຈາກຕ່າງປະເທດເຂົ້າມາບັນຈຸ, ຈັດເກັບຮັກສາໄວ້ຢູ່ສາງນໍ້າມັນເຊື້ອໄຟຂອງບໍລິສັດທຽນມິງດຶກ ແລະຂົນສົ່ງເຂົ້າສູ່ ສປປ ລາວ.

ໃຫ້ກຽດລົງນາມຝ່າຍບໍລິສັດລາວໂດຍທ່ານ ສົມຫັວງ ຄຸຣຸລັດ, ອຳນວຍການໃຫຍ່ບໍລິສັດ ຍອດງື່ມພາວເວີ ມະຫາຊົນ ສປປ ລາວ ພ້ອມດ້ວຍຄະນະ ແລະໃຫ້ກຽດລົງນາມຝ່າຍບໍລິສັດຫວຽດນາມ ໂດຍທ່ານ ເລແທັງອານ, ອຳນວຍການໃຫຍ່ກຸ່ມບໍລິສັດ ທຽນມິງດຶກ ສສ.ຫວຽດນາມ ພ້ອມດ້ວຍຄະນະສາງນໍ້າມັນເຊື້ອໄຟດັ່ງກ່າວທີ່ສາມາດບັນຈຸນໍ້າມັນເຊື້ອໄຟໄດ້ເປັນຈຳນວນຫຼວງຫຼາຍ, ມີຄວາມປອດໄພ ແລະທັນສະໄໝ.

ບໍລິສັດ ຍອດງື່ມພາວເວີ ມະຫາຊົນ ຍັງໄດ້ເຊັນສັນຍາກັບ ບໍລິສັດ ການຄ້າ ແລະການບໍລິການເຊິນຝູຕ໋າຍ ສສ.ຫວຽດນາມ, ຊຶ່ງລົງນາມໂດຍທ່ານ ຫງວຽນວັນຮ່າ, ຜູ້ອຳນວຍການບໍລິສັດການຄ້າ ແລະ ການບໍລິການເຊິນຝູຕ໋າຍພ້ອມດ້ວຍຄະນະ, ເຊິ່ງເປັນບໍລິສັດຂົນສົ່ງນໍ້າມັນເຊື້ອໄຟ.

ຈຸດປະສົງ ກໍ່ເພື່ອຂົນສົ່ງນໍ້າມັນເຊື້ອໄຟເຂົ້າສູ່ສາງ ສສ.ຫວຽດນາມ ແລະເຂົ້າສູ່ ສປປ ລາວ ເວົ້າລວມ, ເວົ້າສະເພາະແມ່ນແຂວງຊຽງຂວາງເພື່ອປຸງແຕ່ງນໍ້າມັນເຊື້ອໄຟ ແລະ ຈຳໜ່າຍອອກສູ່ຕະຫຼາດພາຍໃນແຂວງຊຽງຂວາງ ແລະບັນດາແຂວງໃກ້ຄຽງໃຫ້ພຽງພໍຕໍ່ການນຳໃຊ້, ທັງເພື່ອໃຫ້ສະດວກ ແລະປອດໄພ.

ໂດຍທັງ 3 ບໍລິສັດ, ໄດ້ຮ່ວມທຸລະກິດນຳກັນທັງເປັນການປົກປັກຮັກສາ ແລະເສີມຂະຫຍາຍວຽກງານການຮ່ວມມືແບບພິເສດ ລາວ-ຫວຽດນາມ, ຫວຽດນາມ-ລາວ ໃຫ້ເລິກເຊິ່ງຂຶ້ນກວ່າເກົ່າ, ໃຫ້ການຊ່ວຍເຫຼືອເຊິ່ງກັນ ແລະກັນ, ນີ້ເປັນອີກໜຶ່ງບາດກ້າວສໍາຄັນ ແລະພ້ອມກັນພັດທະນາໄປເລື້ອຍໆ.

Cr:ໜັງສືພິມເສດຖະກິດການຄ້າ

แชร์