ລັດຖະມົນຕີ ຖວທ ຕ້ອນຮັບຫົວໜ້າສູນວັດທະນະທຳຈີນ ປະຈຳລາວ

ຂປລ. ໃນວັນທີ 2 ກຸມພານີ້ ທີ່ນະຄອນຫຼວງວຽງຈັນ, ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ) ໄດ້ຕ້ອນຮັບທ່ານ ນາງ ຫຼີຢີ່ຜິງ ຫົວໜ້າສູນວັດທະນະທຳຈີນ ປະຈຳ ສປປ ລາວ ພ້ອມຄະນະເພື່ອລາຍງານແຜນກິດຈະກຳຂອງສູນວັດທະນະທຳຈີນ ປະຈຳ ສປປ ລາວ ໃນປີ 2023.

ໃນໂອກາດນີ້, ທ່ານ ນາງ ສວນສະຫວັນ ວິຍະເກດ ກໍໄດ້ສະແດງຄວາມຍີນດີຕ້ອນຮັບ ແລະຊົມເຊີຍຜົນງານການຈັດຕັ້ງປະຕິບັດໜ້າທີ່ໃນໄລຍະຜ່ານມາຂອງທ່ານ ນາງ ຫຼີຢີ່ຜິງ ກໍຄືພະນັກງານພາຍໃນສູນວັດທະນະທຳຈີນ ປະຈຳລາວ ຖືເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍມິດຕະພາບ, ການຮ່ວມມືແບບຄູ່ຮ່ວມຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ລວມເຖິງການເປັນຄູ່ຮ່ວມຊາຕາກຳສັງຄົມນິຍົມ ລະຫວ່າງ ລາວ-ຈີນ, ຈີນ-ລາວ ໂດຍສະເພາະແມ່ນໃນຂົງເຂດວັດທະນະທຳໃຫ້ນັບມື້ແໜ້ນແຟ້ນຍິ່ງຂຶ້ນ.

ພ້ອມນີ້, ທ່ານ ນາງ ຫຼີຢີ່ຜິງ ກໍໄດ້ສະແດງຄວາມຂອບໃຈຕໍ່ທ່ານລັດຖະມົນຕີ ກະຊວງຖະແຫຼງຂ່າວ,ວັດທະນະທຳ ແລະທ່ອງທ່ຽວທີ່ໄດ້ໃຫ້ການຕ້ອນຮັບໃນຄັ້ງນີ້,ພ້ອມທັງຖືໂອກາດນີ້ລາຍງານໂດຍຫຍໍ້ກ່ຽວກັບແຜນກິດຈະກຳຂອງສູນວັດທະນະທຳຈີນ ປະຈຳ ສປປ ລາວ ໃນປີ 2023 ໃຫ້ທ່ານລັດຖະມົນຕີໄດ້ຮັບຊາບ.
Cr:ໜັງສືພິມປະຊາຊົນ

• 03/03/2023