ຫາລືມາດຕະການຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ

ກອງປະຊຸມລະດັບຊາດກ່ຽວກັບການຈັດຕັ້ງປະຕິບັດມາດຕະການຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍຢ່າງມີປະສິດທິພາບໄດ້ຈັດຂຶ້ນໃນວັນທີ 2-3 ມີນາ 2023 ເພື່ອແລກປ່ຽນບົດຮຽນໃນຫລາຍຫົວຂໍ້ເປັນຕົ້ນພາບລວມ ແລະການຈັດຕັ້ງປະຕິບັດວຽກງານຕ້ານສະກັດກັ້ນກັດການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ.

ກອງປະຊຸມລະດັບຊາດກ່ຽວກັບການຈັດຕັ້ງປະຕິບັດມາດຕະການຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍຢ່າງມີປະສິດທິພາບ ໄດ້ຈັດຂຶ້ນໃນວັນທີ 2-3 ມີນາ 2023 ເພື່ອແລກປ່ຽນບົດຮຽນ ໃນຫລາຍຫົວຂໍ້ເປັນຕົ້ນພາບລວມ ແລະ ການຈັດຕັ້ງປະຕິບັດວຽກງານຕ້ານສະກັດກັ້ນກັດການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ, ການຮ່ວມມື ລະຫວ່າງ ປະເທດທາງອາຍາ, ການຢຶດຊັບສິນ ແລະການດຳເນີນຄະດີກ່ຽວກັບການຟອກເງິນຈາກ ພາຍໃນປະເທດ, ພາກພື້ນ ແລະສາກົນ ແລະບັນຫາສຳຄັນອື່ນໆ.

ໂອກາດນີ້, ທ່ານ ຄຳເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດໄດ້ກ່າວວ່າ: ການຟອກເງິນ ແລະ ການກໍ່ການຮ້າຍແມ່ນໜຶ່ງໃນບັນດາອາຊະຍາກຳຂ້າມຊາດ ເຊິ່ງເປັນບັນຫາທີ່ພົ້ນເດັ່ນ ທີ່ໄດ້ເກີດຂຶ້ນ ແລະ ແຜ່ຫລາຍຢູ່ໃນບັນດາ ປະເທດຕ່າງໆໃນໂລກ ແລະ ກາຍເປັນໄພຂົ່ມຂູ່ ຕໍ່ສະເຖຍລະພາບ ທາງດ້ານການເມືອງ, ການພັດທະນາ ເສດຖະກິດ-ສັງຄົມແຫ່ງຊາດ ຂອງບັນດາປະເທດໃນພາກພື້ນ ແລະ ໃນໂລກ; ອາຊະຍາກຳຟອກເງິນ ແລະ ການສະໜອງທຶນ ໃຫ້ແກ່ການກໍ່ການຮ້າຍ ເປັນອາຊະຍາກໍາ ທີ່ມີການພົວພັນໂດຍກົງ ກັບບັນດາອາຊະຍາກຳຕ່າງໆເຊັ່ນ: ບັນຫາຢາເສບຕິດ, ການຄ້າອາວຸດ, ການຄ້າມະນຸດ, ການພະນັນທີ່ຜິດກົດໝາຍ, ການສໍ້ລາດບັງຫລວງ ແລະ ອາຊະຍາກໍາອື່ນໆ ທີ່ມີການພົວພັນກັບຫລາຍປະເທດ, ຜ່ານລະບົບທະນາຄານ ຫລື ນອກລະບົບທະນາຄານ, ສະຖາບັນການເງິນ ເຊິ່ງຜູ້ກະທໍາຜິດສ່ວນຫລາຍແມ່ນຜູ້ມີອິດທິພົນ, ມີບົດບາດໃນສັງຄົມ. ອາຊະຍາກຳຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ໄດ້ສ້າງຄວາມເສຍຫາຍຢ່າງຫລວງຫລາຍ ແລະຍິ່ງໄປກວ່ານັ້ນ ໄດ້ເຮັດໃຫ້ສັງຄົມມີຄວາມວຸ້ນວາຍບໍ່ມີຄວາມສະຫງົບກາຍເປັນປາກົດການຫຍໍ້ທໍ້ ແລະ ກີດຂວາງການພັດທະນາປະເທດຊາດ.

ທ່ານ ຄຳເພັດ ສົມວໍລະຈິດ ຍັງກ່າວອີກວ່າ: ສະພາບອາຊະຍາກຳຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍເປັນການກະທຳຜິດທີ່ຮ້າຍແຮງໄດ້ເກີດຂຶ້ນ ແລະ ສ້າງຄວາມເສຍຫາຍ ໃຫ້ບັນດາປະເທດໃນພາກພື້ນ ແລະ ໃນໂລກ ລວມທັງ ສປປ ລາວ, ໃນຊຸມປີຜ່ານມາ ການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ໂດຍສະເພາະ ການຟອກເງິນໄດ້ເກີດຂຶ້ນ ແລະ ມີລັກສະນະສະຫລັບສັບຊ້ອນ ແລະ ຮ້າຍແຮງ, ສ່ວນຫລາຍຕິດພັນໂດຍກົງກັບບັນຫາຢາເສບຕິດ ແລະ ມີຄວາມຫຍຸ້ງຍາກໃນການດຳເນີນຄະດີອັນໄດ້ເຮັດໃຫ້ ສປປ ລາວ ມີຄວາມສ່ຽງກ່ຽວກັບການຟອກເງິນ ແລະການສະໜອງທຶນ ໃຫ້ແກ່ການກໍ່ການຮ້າຍນັບມື້ນັບສູງຂຶ້ນ. ດັ່ງນັ້ນຕ້ອງມີວິທີປ້ອງກັນ, ສະກັດກັ້ນ ແລະ ດໍາເນີນການແກ້ໄຂໃຫ້ທັນການ ດ້ວຍກົນໄກການຮ່ວມມືກັນເພື່ອຕອບໂຕ້ຄືນຢ່າງຮີບດ່ວນ ແລະນໍາເອົາອາຊະຍາກອນມາລົງໂທດຕາມກົດໝາຍ.

ໂດຍເຫັນໄດ້ໄພອັນຕະລາຍດັ່ງກ່າວ, ສປປ ລາວ ໄດ້ເພີ່ມທະວີຄວາມເອົາໃຈໃສ່ ແລະຖືເອົາວຽກງານຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ ເປັນວຽກງານໜຶ່ງທີ່ມີຄວາມສຳຄັນ ໂດຍໄດ້ມີມາດຕະການລະດັບຊາດ ແລະ ລະດັບສາກົນ ຢ່າງມີປະສິດທິຜົນ; ວາງຍຸດທະສາດສະເພາະໜ້າ ເເລະຍາວນານພ້ອມທັງໄດ້ສ້າງຕັ້ງອົງກອນເພື່ອຮັບຜິດຊອບໃນການແກ້ໄຂບັນຫາດັ່ງກ່າວຄື: ສ້າງຕັ້ງໜ່ວຍງານຂໍ້ມູນຕ້ານການຟອກເງິນ ໃນປີ 2007, ໄດ້ສ້າງຕັ້ງສຳນັກງານຂໍ້ມູນຕ້ານການຟອກເງິນທີ່ຂຶ້ນກັບທະນາຄານແຫ່ງ ສປປ ລາວ ແລະ ໃນປີ 2014 ໄດ້ສ້າງຕັ້ງ ຄະນະກຳມະການແຫ່ງຊາດເພື່ອຕ້ານການຟອກເງິນ (ຄຕຝງ) ເພື່ອກຳນົດນະໂຍບາຍໃນແຕ່ລະໄລຍະ ແລະເປັນກົນໄກການປະສານງານແຫ່ງຊາດ, ຄະນະກຳມະການກວດກາ ແລະຄວບຄຸມຢາເສບຕິດ, ຄະນະກໍາມະການຕ້ານການຄ້າມະນຸດລະດັບຊາດ.
Cr: ຂ່າວສານປະເທດລາວ

• 03/03/2023