ພູເບ້ຍ ມາຍນິງ ຮ່ວມຕົວແທນຈາກກົມຕ່າງໆ ລົງກວດກາພື້ນທີ່ການຜະລິດກະສິກຳ ໂຄງການ 8 ບ້ານເປົ້າໝາຍ

ໃນວັນທີ 1 ມີນາ 2023 ພະແນກກະສິກໍາ ແລະປ່າໄມ້ ແຂວງໄຊສົມບູນ ຮ່ວມກັບໂຄງການປັບປຸງຊີວິດການເປັນຢູ່ແບບຍືນຍົງ SLP ຂອງ ບໍລິສັດພູເບ້ຍ ມາຍນິງ ຈຳກັດ ລົງສຳຫຼວດພື້ນທີ່ການຜະລິດກະສິກຳ ຂອງໂຄງການວຽກງານການຜະລິດກະສິກຳສະອາດ, ກະສິກຳອິນຊີ ແລະ ກະສິກຳທີ່ດີ ໃນ 8 ບ້ານເປົ້າໝາຍມີບ້ານນໍ້າຍອນ, ບ້ານນໍ້າໂມ້, ບ້ານທົ່ງຄຸນ, ບ້ານທົ່ງຮັກ, ບ້ານນໍ້າຈັ້ງ, ບ້ານອ່າວເໜືອ, ບ້ານອ່າວກາງ ແລະ ບ້ານອ່າວໃຕ້ ໂດຍການນຳພາຂອງ ທ່ານ ບຸນທອນ ປັນແກ້ວ, ຮອງຫົວໜ້າພະແນກກະສິກຳ ແລະປ່າໄມ້ແຂວງທັງເປັນຄະນະປະສານງານຂັ້ນແຂວງຂອງໂຄງການປັບປຸງຊີວິດການເປັນຢູ່ແບບຍືນຍົງ SLP ຂອງ ບໍລິສັດພູເບ້ຍມາຍນິງ ຈຳກັດ ມີທ່ານ ອິນປອນ ເທບເພັດລືສື, ຮອງຫົວໜ້າພະແນກພັດທະນາຊຸມຊົນຂອງບໍລິສັດພູເບ້ຍ ມາຍນິງ ຈຳກັດ ພ້ອມດ້ວຍທີມງານທີ່ມາຈາກກະຊວງກະສິກຳ ແລະປ່າໄມ້ ຕະຫຼອດຮອດວິຊາການຈາກພາກສ່ວນທີ່ກ່ຽວຂ້ອງເຂົ້າຮ່ວມ.

ໃນໂອກາດທີ່ລົງສຳຫຼວດພື້ນທີ່ການຜະລິດກະສິກຳ ຂອງໂຄງການວຽກງານການຜະລິດ ກະສິກຳສະອາດ, ກະສິກຳອິນຊີ ແລະກະສິກຳທີ່ດີ ໃນ 8 ບ້ານເປົ້າໝາຍໃນຄັ້ງນີ້ ທ່ານ ບຸນທອນ ປັນແກ້ວ ໄດ້ໃຫ້ຮູ້ວ່າ: ຈຸດປະສົງກໍເພຶ່ອເປັນການສຶກສາຄົ້ນຄ້ວາຕໍ່ບັນຫາຜົນການພະລິດກະສິກຳຂອງປະຊາຊົນ ແລະ ລົງເລິກຕໍ່ກັບບັນຫາສັດຕູພືດຂອງປະຊາຊົນ ໃນປີ 2023 ນີ້ ກ່ຽວກັບເລຶ່ອງປ້ອງກັນສັດຕູພືດທີ່ທຳລາຍພືດຜັກ ເປັນຕົ້ນແມ່ນ: ບົ້ງ, ຕັກກະແຕນ, ແມງແຄງ ແລະເພ້ຍທີ່ເຮັດໃຫ້ພືດຜັກຂອງປະຊາຊົນບໍ່ໄດ້ຮັບຜົນພະລິດເທົ່າທີ່ຄວນດັ່ງນັ້ນຈຶ່ງໄດ້ປະສານສົມທົບກັບພາກສ່ວນທີ່ກ່ຽວຂ້ອງລົງພື້ນທີ່ທຳການຜະລິດກະສິກຳຕົວຈິ່ງ ພ້ອມທັງເກັບກຳຂໍ້ມູນຈາກຊາວສ່ວນຜູ້ທີ່ໄດ້ຮັບຜົນກະທົບຕໍ່ການຜະລິດຊຶ່ງຈະໄດ້ນຳເອົາບັນຫາຕ່າງໆທີ່ຊາວສ່ວນໄດ້ພົບພໍ້ໄປປຶກສາຫາລື ໃຫ້ມີເນື້ອໃນເລິກເຊິງ ແລະ ປະກົດຜົນເປັນຈິງ ແລະ ຈະໄດ້ເນັ້ນໜັກໃນ ດ້ານເຕັກນິກວິຊາການໃຫ້ແກ່ຊາວສວນ, ການປ້ອງກັນ-ທຳລາຍສັດຕູພືດ, ເຕັກນິກໃນການເຮັດຝຸ່ນບົ່ມ, ຝຸ່ນຊີວະພາບ ແລະ ວິທີການບົວລະບັດຮັກສາ ເພຶ່ອເຮັດໃຫ້ການຜະລິດກະສິກຳຂອງຊາວສວນໄດ້ຮັບໝາກຜົນທີ່ດີ,ມີຄຸນນະພາບທັງຮັບປະກັນດ້ານຄວາມປອດໄພຕໍ່ສຸຂະພາບຜູ້ຜະລິດ ແລະຜູ້ບໍລິໂພກ ແລະ ສາມາດຕອບສະໜອງຕໍ່ທ້ອງຕະຫຼາດພາຍໃນແຂວງ ແລະຕ່າງແຂວງໄດ້ໃນອານາຄົດ. ທັງນີ້ກໍເພຶ່ອເປັນການຊຸກຍູ້, ສົ່ງເສີມການຜະລິດກະສິກຳເປັນສິນຄ້າທີ່ຕິດພັນກັບທິດສີຂຽວຍືນຍົງທັງເປັນການແກ້ໄຂຊີວິດການເປັນຢູ່ຂອງເຂົາເຈົ້າໃຫ້ມີຊີວິດການເປັນຢູ່ທີດີຂຶ້ນ.
ບກ: ທ່ານ ຄຳສາວ ເລຶອງຄຳທິບ. ພາບ-ຂ່າວ: ຄຳໝັ້ນ ພຽງພິລາ

แชร์