ປະກາດເລື່ອນຊັ້ນໃຫ້ນາຍ ແລະພົນຕໍາຫຼວດ

ວັນທີ 1 ມີນາ 2023 ກົມໃຫຍ່ການເມືອງ ປກສ ປະກາດເລື່ອນຊັ້ນໃຫ້ນາຍ ແລະພົນຕໍາຫຼວດ ໂດຍເປັນປະທານ ແລະໃຫ້ກຽດປະດັບຊັ້ນຂອງ ພົຈວ ຄໍາສາຍ ຈັນທະວົງ ຄະນະພັກກະຊວງ ຮອງຫົວໜ້າກົມໃຫຍ່ການເມືອງ ປກສ, ມີຄະນະພັກ-ຄະນະບັນຊາກົມໃຫຍ່, ກົມກອງອ້ອມຂ້າງພ້ອມດ້ວຍນາຍ ແລະພົນຕໍາຫຼວດທີ່ໄດ້ຮັບການເລື່ອນຊັ້ນເຂົ້າຮ່ວມ.

ພັອ ນ. ໄລທອງ ໄຊຍະສອນ ຮອງຫ້ອງການເມືອງ ກົມໃຫຍ່ການເມືອງ ປກສ ໄດ້ຜ່ານຂໍ້ຕົກລົງສະບັບເລກທີ 279/ປກສ, 280/ປກສ, 281/ປກສ, ລົງວັນທີ 20 ກຸມພາ 2023, ເລກທີ 801/ກມປສ, ລົງວັນທີ 15 ກຸມພາ 2023 ວ່າດ້ວຍການເລື້ອນຊັ້ນໃຫ້ນາຍ ແລະພົນຕໍາຫຼວດ ກົມໃຫຍ່ການເມືອງ ປກສ 34 ສະຫາຍ, ຍິງ 12 ສະຫາຍ. ໃນນີ້, ເລື່ອນຊັ້ນ ພັຕ ຂຶ້ນ ພັທ 7 ສະຫາຍ, ຍິງ 1 ສະຫາຍ; ຮອ ຂຶ້ນ ພັຕ 9 ສະຫາຍ, ຍິງ 1 ສະຫາຍ; ຮທ ຂຶ້ນ ຮອ 15 ສະຫາຍ, ຍິງ 9 ສະຫາຍ; ສອ ຂຶ້ນ ວທ 1 ສະຫາຍ ແລະ ສຕ ຂຶ້ນ ສທ 2 ສະຫາຍ, ຍິງ 1 ສະຫາຍ.

ໃນໂອກາດດັ່ງກ່າວທ່ານຮອງຫົວໜ້າກົມໃຫຍ່ການເມືອງ ປກສ ໄດ້ສະແດງຄວາມຍ້ອງຍໍຊົມເຊີຍຕໍ່ນາຍ ແລະພົນຕໍາຫຼວດຜູ້ທີ່ມີມາດຖານເງື່ອນໄຂຄົບຖ້ວນ ແລະໄດ້ຮັບການເລື່ອນຊັ້ນໃນຄັ້ງນີ້ ພ້ອມທັງເນັ້ນໜັກໃຫ້ເອົາໃຈໃສ່ກໍາແໜ້ນແນວທາງນະໂຍບາຍຂອງພັກ, ມີຄວາມບຸກບືນຫ້າວຫັນໃນການຈັດຕັ້ງປະຕິບັດໜ້າທີ່ການເມືອງຂອງຕົນ, ມີທັດສະນະທີ່ໜັກແໜ້ນ, ມີປະຊາທິປະໄຕ ເປັນເອກະພາບໃນໝູ່ຄະນະ, ເອົາໃຈໃສ່ຈັດຕັ້ງປະຕິບັດລະບຽບກົດໝາຍຢ່າງເຂັ້ມງວດ,ເອົາໃຈໃສ່ຊອກຮູ້ຮໍ່າຮຽນເພື່ອເຮັດໃຫ້ຕົນເອງມີຄວາມຮູ້-ຄວາມສາມາດ ປະກອບສ່ວນເຂົ້າໃນວຽກງານປ້ອງກັນຄວາມສະຫງົບໃຫ້ເຕີບໃຫຍ່ເຂັ້ມແຂງຂຶ້ນເລື່ອຍໆ.
ພາບ-ຂ່າວ: ຈັນດີ

แชร์