ເຖິງຈະຮັບຈ້າງເກັບຜັກເປັນອາຊີບແຕ່ກໍພູມໃຈ

ການຢຶດຖືອາຊີບໃດໆກໍຕາມຖ້າຫາກບໍ່ເລືອກວຽກເຮັດງານທຳກໍເຮັດໃຫ້ເຮົາມີລາຍຮັບມີເງິນໃຊ້ໃນແຕ່ລະວັນ ແລະຖ້າຫາກປະຢັດມັດທະຍັດໃຊ້ຈ່າຍສະເພາະສິ່ງທີ່ຈຳເປັນ ກໍຈະເຮັດໃຫ້ຊີວິການເປັນຢູ່ດີຂຶ້ນເລື້ອຍໆ ທັງເຮັດໃຫ້ຄອບຄົວມີຄວາມຜາສຸກຄືດັ່ງ ນາງ ອຸໄລລັດ ສິນທະລາດ ປະຊາຊົນ ບ້ານທ່າແຂກ ເມືອງຫາດຊາຍຟອງ ນະຄອນຫຼວງວຽງຈັນ ທີ່ຢຶດຖືອາຊີບຮັບຈ້າງເກັບຜັກເປັນລາຍໄດ້ໃນແຕ່ລະວັນເຮັດໃຫ້ລາວມີຄວາມພໍໃຈກັບອາຊີບທີ່ສຸດຈະລິດ, ປັດຈຸບັນຈາກລາຍໄດ້ໃນການຮັບຈ້າງເກັບຜັກແຕ່ລະວັນບວກເກັບເງິນເດືອນຂອງສາມີ (ຜູ້ເປັນຜົວ) ໄດ້ເຮັດໃຫ້ຄອບຄົວມີຄວາມຢູ່ດີກິນດີ ແລະມີທຶນເກັບແຮໄວ້ຈຳນວນໜຶ່ງ.

ນາງ ອຸໄລລັດ ສິນທະລາດ ກ່າວວ່າ: ຕົນເອງຢຶດຖືອາຊີບຮັບຈ້າງເກັບຜັກຕາມສວນຜັກຕ່າງໆ ເຂດບ້ານຖິ່ນເພຍ ເມືອງຫາດຊາຍຟອງ, ປັດຈຸບັນຕົນເອງມາຮັບຈ້າງເກັບຜັກຫົມຢູ່ສວນຂອງ ປ້າ ນອມ ພົມພັກດີ ຊຶ່ງການຮັບຈ້າງແມ່ນອີງຕາມລາຄາການຊື້-ຂາຍຂອງຕະຫຼາດ ຖ້າຜັກຢູ່ໃນໄລຍະລາຄາຖືກຈະໄດ້ຄ່າແຮງງານຖືກລົງຊຶ່ງປະມານ 15-20 ພັນກີບຕໍ່ໝື່ນ ແຕ່ຖ້າຫາກວ່າໄລຍະໃດລາຄາພືດຜັກແພງ ກໍໄດ້ຄ່າແຮງງານສູງຂຶ້ນຕາມລາຄາພືດຜັກຕາມທ້ອງຕະຫຼາດຊຶ່ງໃນໄລຍະນີ້ລາຄາຜັກຫົມແມ່ນ 50 ພັນກີບຕໍ່ໝື່ນ, ໄດ້ຄ່າແຮງງານ 20 ກີບຕໍ່ໝື່ນ, ໃນໄລຍະນີ້ລາຄາຜັກຫົມແມ່ນລາຄາຖືກຍ້ອນວ່າມີຫຼາຍຄົນປູກ ແລະບ່ອນໃດກໍເຮັດໄດ້ຈຶ່ງເຮັດໃຫ້ຜັກມີຈຳນວນຫຼາຍສົ່ງຜົນໃຫ້ລາຄາຖືກລົງ.

ນາງ ອຸໄລລັດ ສິນທະລາດ ກ່າວອີກວ່າ: ອາຊີບຂອງຕົນ ບໍ່ໄດ້ວາງແຜນ, ບໍ່ໄດ້ຄິດຫຍັງຫຼາຍຊຶ່ງໃນແຕ່ລະວັນຈະມີເຈົ້າຂອງສວນຜັກຕິດຕໍ່ຫາທາງໂທລະສັບຖ້າວ່າງກໍຕອບຕົກລົງທັນທີແຕ່ການຮັບຈ້າງໂດຍສ່ວນໃຫຍ່ແມ່ນຢູ່ໃນຂອບເຂດບ້ານຂອງຕົນ ຫຼືບ້ານໃກ້ຄຽງ ໂດຍສ່ວນໃຫຍ່ແມ່ນຢູ່ເຂດກຸ່ມບ້ານຖິ່ນເພຍ, ຖ້າຫາກມື້ໃດມີຜົນຜະລິດຫຼາຍແມ່ນຈະໄປເປັນທີມງານ ປະມານ 3-4 ຄົນ, ຄວາມສາມາດໃນການເກັບແຕ່ລະວັນຈະເກັບໄດ້ປະມານ 4-5 ໝື່ນ, ສະເລ່ຍຈະໄດ້ຄ່າແຮງງານປະມານ 80.000 -100.000 ກີບຕໍ່ວັນ. ແຕ່ຖ້າວ່າໄລຍະໃດທີ່ຜັກແພງ ກໍໄດ້ຄ່າແຮງງານເພີ່ມຂຶ້ນ ໂດຍສະເພາະແມ່ນເກັບຜັກຫອມປ້ອມ ມີບາງໄລຍະລາຄາສູງເຖິງ 400.000-500.000 ກີບຕໍ່ໝື່ນ, ເຈົ້າຂອງສວນກໍຈະຄິດໄລ່ຄ່າແຮງງານໃຫ້ 50 ພັນກີບຕໍ່ມື້ ເນື່ອງຈາກເປັນຜັກທີ່ເກັບຍາກ, ຕົ້ນນ້ອຍ ກວ່າຈະໄດ້ນໍ້າໜັກຮອດໝື່ນ ກໍໃຊ້ເວລາດົນ.

ນາງ ອຸໄລລັດ ສິນທະລາດ ໄດ້ສ້າງຄອບຄົວມາ 7 ປີແລ້ວ ຊຶ່ງສາມີຂອງລາວເປັນພະນັກງານ-ລັດຖະກອນ ມີລູກນຳກັນ 3 ຄົນ, ຄູ່ຜົວ-ເມຍຕ້ອງໄດ້ອອກແຮງເພີ່ມ ເພື່ອຫາລາຍໄດ້ເຂົ້າຄອບຄົວ ໂດຍສະເພາະວັນພັກທາງລັດຖະການ (ວັນເສົາ-ອາທິດ) ຜູ້ເປັນຜົວກໍໃຊ້ເວລາວ່າງມາຮັບຈ້າງເກັບຜັກຊ່ວຍກັນເພື່ອຫາລາຍໄດ້ເພີ່ມ, ຈາກລາຍໄດ້ຮັບຈ້າງເກັບຜັກໃນແຕ່ລະວັນບວກເກັບເງິນເດືອນຂອງຜູ້ເປັນຜົວເຮັດໃຫ້ຄອບຄົວມີເງິນເກັບແຮໄວ້ໃຊ້ຈ່າຍໃນຍາມຈຳເປັນ ແລະສົ່ງເສີມໃຫ້ລູກໄດ້ຮຽນໜັງສື.

ນາງ ອຸໄລລັດ ສິນທະລາດ ກ່າວດ້ວຍສຳນຽງສຽງທີ່ອ່ອນຫວານວ່າ: ເຖິງວ່າຕົນເອງຈະມີອາຊີບຮັບຈ້າງເກັບຜັກແຕ່ກໍມີຄວາມພາກພູມໃຈໂດຍທີ່ບໍ່ໄດ້ລົງທຶນເຂົ້າໃນການຜະລິດ, ບໍ່ມີຄວາມສ່ຽງແຕ່ຢ່າງໃດ ແລະບໍ່ກັງວົນວ່າ ຕະຫຼາດຈະເປັນແນວໃດ, ມີຄົນມາເກັບຊື້ ຫຼືບໍ່?, ຕົນເອງເຮັດອາຊີບນີ້ໄດ້ 2-3 ປີແລ້ວ, ປັດຈຸບັນແມ່ນກຳລັງຮັບຈ້າງເກັບຜັກຫົມຢູ່ສວນຂອງປ້ານອມພົມພັກດີຢູ່ບ້ານທ່າແຂກ ເມືອງຫາດຊາຍຟອງປີນີ້ປ້ານອມ ນອກຈາກປູກຜັກຫົມແລ້ວຍັງປູກພືດຜັກຫຼາຍຊະນິດໜູນວຽນຕາມລະດູການເຊັ່ນ: ຜັກບົ້ງ, ຫອມຫອມປ້ອມ, ໝາກແຕງ, ໝາກເຫຼັ່ນ ແລະອື່ນໆ ເພື່ອສະໜອງໃຫ້ແມ່ຄ້າທີ່ມາເກັບຊື້ຢູ່ສວນນຳໄປຂາຍຕໍ່ຕາມທ້ອງຕະຫຼາດທົ່ວໄປ.

แชร์