ໄລຍະ 30 ປີ ໂຮງຮຽນກຽດຕິສັກນາໆຊາດມີນັກຮຽນສໍາເລັດການສຶກສາ 14 ຮຸ່ນ

ເມື່ອບໍ່ດົນມານີ້, ໂຮງຮຽນກຽດຕິສັກນາໆຊາດ ໄດ້ສະເຫລີມສະຫລອງວັນສ້າງຕັ້ງຄົບຮອບ 30 ປີ, ຈາກຈຸດເລີ່ມຂອງໂຮງຮຽນທີ່ເປີດການຮຽນ-ການສອນຄັ້ງທໍາອິດ ມີນັກຮຽນພຽງ 20 ກວ່າຄົນ, ແຕ່ປັດຈຸບັນ ມີນັກຮຽນລາວ ແລະ ຕ່າງປະເທດ ເຂົ້າມາຮໍ່າຮຽນ 1.000 ກວ່າຄົນ ເຊິ່ງໄດ້ກາຍເປັນໂຮງຮຽນນານາຊາດທີ່ມີຊື່ສຽງ, ໄດ້ຮັບຄວາມນິຍົມ ອັນດັບຕົ້ນຂອງປະເທດ ແລະ ເປັນທີ່ຮັບຮູ້ໃນແຖວໜ້າຂອງອາຊຽນ, ມາຮອດປັດຈຸບັນ, ມີນັກຮຽນສໍາເລັດການສຶກສາທັງໝົດ 14 ລຸ້ນ ໃນນັ້ນມີນັກຮຽນທີ່ຮຽນຈົບພາກພາສາອັງກິດ 500 ກວ່າຄົນ, ຍິງ 280 ກວ່າຄົນ, ໄດ້ຮັບທຶນການສຶກສາໄປຮຽນຕໍ່ຕ່າງປະເທດທັງໝົດ 400 ກວ່າຄົນໃນ 25 ປະເທດ.

ທ່ານ ນາງ ປອ ຈັນສະຫງ່າ ວະລາກອນ ຜູ້ອໍານວຍການໂຮງຮຽນກຽດຕິສັກນາໆຊາດໄດ້ໃຫ້ຮູ້ວ່າ: ຜົນສຳເລັດຕະຫລອດໄລຍະ 30 ປີນີ້, ຈະເກີດຂຶ້ນບໍ່ໄດ້ຖ້າທຸກໆພາກສ່ວນ, ທຸກໆທ່ານ, ຄູອາ ຈານ, ພໍ່ແມ່ຜູ້ປົກຄອງ, ນັກຮຽນ ແລະ ພະນັກງານທີ່ກ່ຽວຂ້ອງບໍ່ໃຫ້ການສະໜັບສະໜູນ. ພ້ອມທັງ ຢືນຢັນວ່າ ຈະຕັ້ງໜ້າເອົາໃຈໃສ່ສ້າງບຸກຄະລາກອນ ແລະ ລູກຫລານຂອງ ສປປ ລາວ ໃຫ້ມີຄວາມຮູ້, ຄວາມສາມາດ ແລະ ມີທັກສະສູງທຽບເທົ່າກັບພາກພື້ນ ແລະ ສາກົນ; ຈະສືບຕໍ່ປະຕິບັດ 5 ຫລັກມູນຂອງກະຊວງສຶກສາທິການ ແລະ ກິລາ ວາງອອກ; ຈະນໍາພານັກຮຽນເຂົ້າຮ່ວມແຂ່ງຂັນລະດັບພື້ນ ແລະ ສາກົນໃຫ້ຫລາຍຂຶ້ນເພື່ອຍາດເອົາລາງວັນອັນຊົງກຽດມາສູ່ປະເທດຊາດ, ຍົກລະດັບ ແລະພັດທະນາຮອບດ້ານດ້ວຍປະລິມານ ແລະຄຸນພາບສູງກວ່າເກົ່າ, ເຮັດໃຫ້ມີຜົນສໍາເລັດໃຫຍ່ຫລວງກວ່າເກົ່າບໍ່ວ່າຈະຢູ່ເວທີພາຍໃນ, ພາກພື້ນ ແລະ ສາກົນ.

ໃນສົກປີ 2023-2024 ນີ້, ໂຮງຮຽນກຽດຕິສັກນາໆຊາດ ໄດ້ຮັບອະນຸຍາດຈາກກະຊວງສຶກສາທິການ ແລະກິລາ ເປີດສອນຫລັກສູດວິຊາຊີບຊັ້ນຕົ້ນ, ຊັ້ນກາງ ແລະ ຊັ້ນສູງພາສາລາວ ໃນ 3 ສາຂາຄື: ຄຸ້ມຄອງການຂົນສົ່ງ ແລະ ລະບົບການສະໜອງແບບຕ່ອງໂສ້, ການຄຸ້ມຄອງທຸລະກິດແບບຂາຍຍ່ອຍທີ່ທັນສະໄໝ ແລະ ເຕັກໂນໂລຊີທຸລະກິດດີຈິຕອນ. ນອກຈາກນັ້ນ, ໂຮງຮຽນຍັງໄດ້ຮ່ວມມືກັບວິທະຍາໄລ ແຄຣມບິດນາໆຊາດເປີດສອນຫລັກສູດລະດັບປະລິນຍາຕີ ໂດຍໃຊ້ຫລັກສູດຂອງວິທະຍາໄລແຄຣມບິດນາໆຊາດ ເຊິ່ງມີຫລາຍກວ່າ 25 ສາຂາວິຊາຮຽນ ໃຫ້ນັກຮຽນສາມາດເລືອກຮຽນຕາມສາຂາທີ່ມັກ.

ຄຽງຄູ່ກັບການຮຽນ-ການສອນ ໃນໄລຍະຜ່ານມານັ້ນ, ໂຮງຮຽນກຽດຕິສັກນາໆຊາດ ຍັງໄດ້ນຳພານັກຮຽນເຂົ້າຮ່ວມການແຂ່ງຂັນລະດັບອາຊຽນ, ສາກົນ ທັງໝົດ 12 ປະເທດຄື: ເຂົ້າຮ່ວມການແຂ່ງຂັນນັກວິທະຍາສາດຜູ້ໜຸ່ມນ້ອຍທັງໝົດ 5 ຄັ້ງ ຈັດຕັ້ງໂດຍ ອົງການລັດຖະມົນຕີອາຊີຕາເວັນອອກ ສຽງໃຕ້ (SEAMEO), ແລກປ່ຽນວັດທະນະທໍາ ແລະ ເຕັກນິກອາຊຽນ, ການສ້າງຫຸ່ນຍົນ, ການແຂ່ງຂັນຄະນິດສາດ ແລະ ວິທະຍາສາດໂອລິມປິກສາກົນ, ການແຂ່ງຂັນໂຕ້ວາທີ, ແຂ່ງຂັນຖາມ-ຕອບພາສາຍີ່ປຸ່ນ, ແຂ່ງຂັນສິລະປະກຳແຫ່ງຊາດ, ການແຂ່ງຂັນ Microsoft Office Specialist, ແຂ່ງຂັນ ຖາມ-ຕອບຄວາມຮູ້ກ່ຽວກັບອາຊຽນ ແລະ ອື່ນໆ. ໃນນັ້ນ, ນັກຮຽນຈາກໂຮງຮຽນກຽດຕິສັກນາໆຊາດກໍຍາດໄດ້ລາງວັນລະດັບພາກພື້ນອາຊຽນໃນວິຊາຄະນິດສາດ.

ສ່ວນກິດຈະກໍາປະກອບສ່ວນຊ່ວຍເຫລືອສັງຄົມ ແລະ ຜູ້ດ້ອຍໂອກາດໂຮງຮຽນກຽດຕິສັກ ນາໆຊາດ ກໍໄດ້ປະກອບສ່ວນທຶນຮອນຫລາຍຮ້ອຍລ້ານຮ່ວມກັບສະມາຄົມນັກຮຽນ, ຄູອາຈານ ແລະ ຜູ້ປົກຄອງ ໄດ້ຈັດງານຫາລາຍໄດ້ໃນທຸກໆປີ ເພື່ອປະກອບສ່ວນຊ່ວຍໂຮງຮຽນທີ່ຍັງຂາດເຂີນ ແລະຊ່ວຍສັງຄົມລວມເປັນເງິນທັງໝົດ 600 ກວ່າລ້ານກີບ.

แชร์