ຄຳມ່ວນ ສະຫລຸບຕີລາຄາຂະບວນແຂ່ງຂັນຮັກຊາດ ແລະພັດທະນາ

ວັນທີ 28 ກຸມພາ 2023 ຜ່ານມາ, ແຂວງຄໍາມ່ວນ ຈັດກອງປະຊຸມສະຫລຸບຕີລາຄາຄືນຂະບວນການແຂ່ງຂັນຮັກຊາດ ແລະ ພັດທະນາ ໄລຍະ 5 ປີຜ່ານມາ (2016-2020) ແລະ ສືບຕໍ່ເປີດຂະບວນການແຂ່ງຂັນຮັກຊາດ ແລະ ພັດທະນາ 5 ປີຕໍ່ໜ້າ (2021-2025) ໂດຍການເປັນປະທານຂອງ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ,ມີພະນັກງານອາວຸໂສບຳນານ, ມີການນຳຂັ້ນແຂວງ, ຂັ້ນເມືອງ, ບັນດາພະແນກການ ແລະພາກສ່ວນກ່ຽວຂ້ອງພາຍໃນແຂວງເຂົ້າຮ່ວມ.

ທ່ານນາງ ອາລີ ບົວຈູມ ຫົວໜ້າພະແນກພາຍໃນແຂວງ ໄດ້ໃຫ້ຮູ້ວ່າ: ໃນໄລຍະຜ່ານມາຄະນະພັກ, ອົງການປົກຄອງທຸກຂັ້ນໄດ້ເປັນເຈົ້າການນໍາພາ-ຊີ້ນໍາ ຈັດຕັ້ງປະຕິບັດບັນດາຄາດໝາຍ ທີ່ວາງໄວ້ໃນມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງ ເພື່ອແຂ່ງຂັນກັນ ສ້າງຂະບວນການພັດທະນາ ແລະ ແກ້ໄຂຄວາມທຸກຍາກ ຂອງປະຊາຊົນຢູ່ຊົນນະບົດ ພາຍໃຕ້ຄໍາຂວັນ ຮັກຊາດ ແລະ ພັດທະນາ ໃຫ້ເປັນຂະບວນການຟົດຟື້ນຕໍ່ເນື່ອງ ເພື່ອຮັບປະກັນໃຫ້ໄດ້ຕາມ 4 ຄາດໝາຍລວມ ຂອງການແຂ່ງຂັນ ຄື: ໃຫ້ໄວ, ໃຫ້ດີ, ໃຫ້ຫລາຍ ແລະ ໃຫ້ຖືກກົດໝາຍ ຕາມເນື້ອໃນ 4 ດ້ານ ຂອງການແຂ່ງຂັນ ຮັກຊາດ ແລະ ພັດທະນາ, ສ້າງບ້ານພັດທະນາ ແລະ ຜັນຂະຫຍາຍວຽກງານ 3 ສ້າງ ເຂົ້າສູ່ລວງເລິກໃນທົ່ວແຂວງ ຄື: ການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານເປັນຫົວໜ່ວຍພັດທະນາ ຕິດແໜ້ນກັບການກໍ່ສ້າງຮາກຖານການເມືອງ, ການພັດທະນາເສດຖະກິດ, ວັດທະນະທໍາ-ສັງຄົມ ແລະ ປ້ອງກັນຊາດ-ປ້ອງກັນຄວາມສະຫງົບ ເພື່ອສ້າງໃຫ້ຂະບວນການແຂ່ງຂັນ ຮັກຊາດ ແລະພັດທະນາ ບັນລຸຕາມ 4 ເນື້ອໃນ 4 ຄາດໝາຍ ຂອງການແຂ່ງຂັນ.

ຄະນະພັກ-ອົງການປົກຄອງຂັ້ນແຂວງ ໄດ້ແຕ່ງຕັ້ງຄະນະຊີ້ນໍາ ວຽກງານແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ເພື່ອນໍາພາເປີດຂະບວນການ ແຂ່ງຂັນ ຕາມພະແນກການ, ອົງການທຽບເທົ່າພະແນກຂັ້ນແຂວງ ແລະ ບັນດາເມືອງ, ປຸກລະດົມ, ຊຸກຍູ້, ຕິດຕາມຂະບວນການ ເປັນແຕ່ລະໄລຍະ ພ້ອມທັງຫັນເອົາພະນັກງານຂັ້ນພະແນກການລົງຊຸກຍູ້ ຢູ່ຮາກຖານຂັ້ນບ້ານ, ນໍາພາສ້າງແຜນການ, ໂຄງການ ແລະ ນໍາພາເຮັດຕົວຈິງ. ພ້ອມນັ້ນ, ກໍສຸມທຶນຮອນເຂົ້າໃສ່ການສ້າງບ້ານພັດທະນາ, ສ້າງບ້ານໃຫຍ່ໃຫ້ມີສີສັນ ຄືກັບຕົວເມືອງນ້ອຍໃນຊົນນະບົດ ແລະ ໄດ້ຮັບຜົນສໍາເລັດໃນຫລາຍດ້ານ, ສະຫລຸບ, ຕີລາຄາ, ປະເມີນຜົນຂະບວນການແຂ່ງຂັນ ຮັກຊາດ ແລະ ພັດທະນາ, ສ້າງບ້ານພັດທະນາ, ຜັນຂະຫຍາຍວຽກງານ 3 ສ້າງເຂົ້າສູ່ລວງເລິກ ເຊິ່ງສາມາດຄັດເລືອກໄດ້ຜົນງານ, ຍ້ອງຍໍ, ບຸກຄົນຄອບຄົວຕົວແບບ, ກົມກອງລວມໝູ່, ບ້ານ, ພະນັກງານ-ລັດຖະກອນ ທີ່ໄດ້ປະກອບສ່ວນ ເຂົ້າໃນຂະບວນແຂ່ງຂັນ ຮັກຊາດ, ສ້າງບ້ານພັດທະນາ ຕິດພັນກັບການກໍ່ສ້າງຮາກຖານການເມືອງ, ພັດທະນາຊົນນະບົດ ເພື່ອແກ້ໄຂຄວາມທຸກຍາກ ຂອງປະຊາຊົນ ຊຶ່ງມີຜົນສໍາເລັດ ແລະ ໄດ້ຮັບການຍ້ອງຍໍແຕ່ລະຂັ້ນ.

ຜ່ານການສະຫລຸບຕີລາຄາ ແລະ ປະເມີນຂະບວນການແຂ່ງຂັນຮັກຊາດ, ສ້າງບ້ານພັດທະນາ ແລະ ຜັນຂະຫຍາຍວຽກງານ 3 ສ້າງເຂົ້າສຸ່ລວງເລິກ ສາມາດສັງລວມການຍ້ອງຍໍຜົນງານ 5 ປີ (2016-2020)ໃຫ້ບຸກຄົນ ແລະ ກົມກອງ, ຄອບຄົວຕົວແບບ ແລະ ບັນດາເມືອງ ທົ່ວແຂວງຄໍາມ່ວນ, ສະເໜີຍ້ອງຍໍແຕ່ລະປະເພດທັງໝົດ 7.023 ທ່ານ ແລະ 55 ກົມກອງ ແລະ 2 ບ້ານ. ໃນນັ້ນ, ຫລຽນໄຊແຮງງານຊັ້ນ I ຈໍານວນ 54 ທ່ານ ແລະ 4 ກົມກອງ, ຫລຽນໄຊແຮງງານຊັ້ນ II ຈໍານວນ 143 ທ່ານ ແລະ 6 ກົມກອງ, ຫລຽນໄຊແຮງງານຊັ້ນ III ຈໍານວນ 319 ທ່ານ ແລະ 5 ກົມກອງ, 2 ບ້ານ, ຫລຽນກາແຮງງານ 341 ທ່ານ ແລະ 3 ກົມກອງ, ໃບຍ້ອງຍໍລັດຖະບານ 691 ທ່ານ ແລະ 11 ກົມກອງ ແລະ ໃບຍ້ອງຍໍທ່ານເຈົ້າແຂວງຈໍານວນ 5.477 ທ່ານ ແລະ 26 ກົມກອງ.

ໂອກາດນີ້, ທ່ານເຈົ້າແຂວງຄໍາມ່ວນ ໄດ້ເນັ້ນໃຫ້ບັນດາພະນັກງານການນໍາຫລັກແຫລ່ງໃນແຕ່ລະຂັ້ນ ປຸກລະດົມກໍາລັງແຮງຂອງມະຫາຊົນ ໃຫ້ເຂົ້າມາມີສ່ວນຮ່ວມໃນຂະບວນການພັດທະນາໂດຍການສຸມທຸກເຫື່ອແຮງ ແລະ ສະຕິປັນຍາໃຫ້ມີຜົນສໍາເລັດ, ເພີ່ມທະວີຄວາມເປັນເຈົ້າການໃນການນໍາພາ-ຊີ້ນໍາຂອງອົງການຈັດຕັ້ງທຸກຂັ້ນ ເພື່ອເປັນໄມ້ຫລາວັດແທກຜົນສໍາເລັດ, ເພີ່ມທະວີຂະບວນການຮັກຊາດ ແລະ ພັດທະນາຕາມ 4 ຄາດໝາຍໃຫ້ດີກວ່າເກົ່າໂດຍການສະກັດກັ້ນປະກົດຫຍໍ້ທໍ້ໃນສັງຄົມ, ສ້າງຕົວແບບທີ່ດີ ເພື່ອໃຫ້ຂະແໜງການອື່ນສາມາດນໍາໄປເປັນບົດຮຽນໄດ້ເຊັ່ນ: ບຸກຄົນດີເດັ່ນ, ບ້ານດີເດັ່ນ, ອົງການຈັດຕັ້ງດີເດັ່ນ, ນັກທຸລະກິດດີເດັ່ນ ແລະ ອື່ນໆ ເຊິ່ງເຫັນວ່າຈະຕ້ອງໄດ້ເຮັດໃຫ້ມັນແທດເຖິງກວ່າເກົ່າ ແລະ ເປັນຮູບປະທໍາກວ່າເກົ່າ. ທັງນີ້, ກໍເພື່ອຍູ້ແຮງກໍາລັງການຜະລິດພາຍໃນແຂວງໃຫ້ມີຄວາມເຂັ້ມແຂງ ແລະ ປຸກຈິດສໍານຶກໃຫ້ປະຊາຊົນພາຍໃນແຂວງ ມາຜະລິດພາຍໃນໃຫ້ຫລາຍຂຶ້ນ ເພື່ອຫລຸດຜ່ອນການນໍາເຂົ້າ, ພ້ອມນັ້ນ ກໍຕ້ອງໄດ້ມີການຕິດຕາມ, ກວດກາ ແລະ ຊຸກຍູ້ຂະ ບວນແຂ່ງຂັນຮັກຊາດ ແລະພັດທະນາໃຫ້ມີຄວາມຖືກຕ້ອງ ແລະສອດຄ່ອງກັບສະພາບຄວາມເປັນຈິງ.
ຂ່າວ-ພາບ: ແດງສະຫວັດ

แชร์