ເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 4 ຂອງ ສພຊ ແລະສະພາປະຊາຊົນ ນວ

ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 1 ນະຄອນຫລວງວຽງຈັນ ແລະສະມາຊິກສະພາປະຊາຊົນ ນະຄອນຫລວງວຽງຈັນ (ສສນວ) ປະຈໍາເຂດເລືອກຕັ້ງເມືອງຫາດຊາຍຟອງ ນະຄອນຫລວງວຽງຈັນ ລົງພົບປະຜູ້ມີສິດເລືອກຕັ້ງ ແລະເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ນວ ຊຸດທີ II ຢູ່ເມືອງຫາດຊາຍຟອງ ໃນວັນທີ 27 ກຸມພາ 2023 ຜ່ານມາ, ມີຄະນະປະຈໍາ-ຄະນະພັກເມືອງ, ກຸ່ມ, ພະນັກງານກໍ່ສ້າງຮາກຖານ, ນາຍບ້ານ ແລະປະຊາຊົນເຂົ້າຮ່ວມ.

ການລົງເຄື່ອນໄຫວພົບປະຜູ້ມີສິດເລືອກຕັ້ງ ແລະເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະສະພາປະຊາຊົນ ນວ ຊຸດທີ II ຂອງ ສສຊ-ສສນວ ໃນຄັ້ງນີ້ປະກອບມີ 2 ຈຸຄື: ຈຸທີ 1 ນໍາໂດຍ ທ່ານ ນາງ ວາລີ ເວດສະພົງ ສສຊ ຊຸດທີ IX ປະຈໍາເຂດເລືອກຕັ້ງທີ 1 ນວ, ຮອງປະທານສະພາການຄ້າ ແລະອຸດສາຫະກໍາແຫ່ງຊາດລາວ, ຄະນະບໍລິຫານງານສະມາຄົມມິດຕະພາບລາວ-ຫວຽດນາມຂັ້ນສູນກາງ, ທ່ານ ລໍາເພັດ ຄໍາຄໍ້ຮົມພັນ ສສນວ ຊຸດທີ II ຮອງຫົວໜ້າຄະນະສະມາຊິກ ສສນວ ປະຈໍາເຂດເລືອກຕັ້ງເມືອງຫາດຊາດຟອງ, ຫົວໜ້າຫ້ອງການຊັບພະຍາ ກອນທໍາມະຊາດ ແລະສິ່ງແວດລ້ອມເມືອງເຊິ່ງໄດ້ລົງຢູ່ຈຸດ ບ້ານດອນດູ່, ບ້ານທ່ານາ, ບ້ານບໍ່ໂອ, ບ້ານພ້າວ, ບ້ານກາງ, ບ້ານສົມໂຮງ, ບ້ານແກ້ງຍາງ, ບ້ານດອນຂາຊ້າຍ, ບ້ານຫາດດອກແກ້ວ, ບ້ານນາທາມ ແລະບ້ານແກ້ງປາຢ້າງ. ສ່ວນຈຸທີ 2 ນໍາໂດຍ ທ່ານ ນາງ ສົມປະເສີດ ສີຫາລາດ ສສຊ ປະຈໍາເຂດເລືອກຕັ້ງທີ 1 ນວ ຮອງປະທານອົງການແນວລາວສ້າງຊາດ ນວ, ທ່ານ ສຸກສະຫວັນ ບຸດຕະວົງ ສສນວ ຊຸດທີ II ຫົວໜ້າຄະນະສະມາຊິກສະພາປະຊາຊົນ ປະຈໍາເຂດເລືອກຕັ້ງເມືອງຫາດຊາດຟອງ ຮອງເລຂາພັກເມືອງ, ປະທານກວດກາພັກ-ລັດເມືອງ ໄດ້ລົງຈຸບ້ານໂຄກຊາຍ, ບ້ານສີຖານໃຕ້, ບ້ານທ່າແຂກ, ບ້ານຫາດຊາຍຟອງເໜືອ ແລະບ້ານຫາດຊາຍຟອງໃຕ້.

ການລົງເຄື່ອນໄຫວຄັ້ງນີ້, ບັນດາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນວ ໄດ້ພັດປ່ຽນກັນນໍາສະເໜີເນື້ອໃນທີ່ສຳຄັນຕ່າງໆທີ່ຖືກຄົ້ນຄວ້າ, ພິຈາລະນາ ແລະຮັບຮອງເອົາໃນກອງປະຊຸມສະພາແຫ່ງຊາດ ແລະ ສະພາປະຊາຊົນ ນວ ຕາມພາລະບົດບາດ, ສິດ ແລະໜ້າທີ່. ທັງນີ້, ກໍເພື່ອເປັນການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ມະຕິກອງປະຊຸມຂອງສະພາແຫ່ງຊາດ ແລະ ສະພາປະຊາຊົນ ນວ ໃຫ້ຖັນແຖວພະນັກງານ-ລັດຖະກອນ, ທະຫານ, ຕຳຫລວດ ແລະປະຊາຊົນຜູ້ມີສິດເລືອກຕັ້ງໄດ້ເຊື່ອມຊຶມ, ຮັບຮູ້ເຂົ້າໃຈຢ່າງກວ້າງຂວາງ ແລະທົ່ວເຖິງ,ທັງເປັນການພົບປະຜູ້ມີສິດເລືອກຕັ້ງນໍາເອົາຄໍາສະເໜີຄວາມຂັດຂ້ອງໝອງໃຈ ເພື່ອຊ່ວຍຄົ້ນຄວ້າຫາທາງແກ້ໄຂຮ່ວມກັບພາກສ່ວນທີ່ກ່ຽວຂ້ອງໃຫ້ຜູ້ມີສິດເລືອກຕັ້ງມີຄວາມກະຈ່າງແຈ້ງຕໍ່ບັນຫາຕ່າງໆ.

แชร์