ສູນກາງແນວລາວສ້າງຊາດເປີດນໍາໃຊ້ແອັບພຸດທະສາດສະໜາລາວ Lao Bud

ກົມພຸດທະສາດສະໜາ ສູນກາງແນວລາວສ້າງຊາດຮ່ວມກັບບໍລິສັດລາວນີວເພ ເທັກໂນໂລຊີ ຈອຍເວັນເຈີ ຈໍາກັດເປີດນໍາໃຊ້ແອັບພຸດທະສາດສະໜາລາວໃນຕອນບ່າຍວັນທີ 23 ກຸມພາ 2023 ທີ່ສູນກາງແນວລາວສ້າງຊາດ ນະຄອນຫຼວງວຽງຈັນ, ໂດຍການເຂົ້າຮ່ວມຮ່ວມຂອງພະອາຈານໃຫຍ່ ບຸນມາ ສີມາພົມ ປະທານສູນກາງອົງການພຸດທະສາດສະໜາສໍາພັນແຫ່ງ ສປປລາວ ແລະ ທ່ານ ສິນລາວົງ ຄຸດໄພທູນ ປະທານສູນກາງແນວລາວສ້າງຊາດ, ມີທ່ານ ມອນໄຊ ລາວມົວຊົ່ງ ເລຂານະຄະບໍລິ ຫານງານສູນກາງຊາວໜຸ່ມປະຊາຊົນປະຕິວັດລາວ, ທ່ານ ຄະນອງລິດ ສີສົມບູນ ຫົວໜ້າກົມສາດສະໜາສູນກາງແນວລາວສ້າງຊາດ,ທ່ານ ເມກສະຫວ່າງ ພົມມາລີ ຜູ້ອໍານວຍການໃຫຍ່ບໍລິສັດ ນີວເພ ເທັກໂນໂລຊີ ຈອຍເວັນເຈີ ຈໍາກັດພ້ອມດ້ວຍພະເຖລານູເຖລະ ແລະແຂກຮັບເຊີນເຂົ້າຮ່ວມຢ່າງພ້ອມພຽງ.

ທ່ານ ຄະນອງລິດ ສີສົມບູນ ຫົວໜ້າກົມສາດສະໜາ ສູນກາງແນວລາວສ້າງຊາດມີຄໍາເຫັນວ່າ: ຈຸດປະສົງຂອງການສ້າງແອັບ ພຸດທະສາດສະໜາຄັ້ງນີ້ເພື່ອເປັນການເຜີຍແຜ່ພຸດທະສາດສະໜາລາວໃຫ້ມີລັກສະນະກວ້າງຂວາງ ທັງສ້າງເງື່ອນໄຂສະດວກໃນການເຂົ້າເຖິງແຫລ່ງຂໍ້ມູນຄວາມຮູ້ທັງດ້ານພຸດທະສາດສະໜາ ເນື່ອງຈາກໄດ້ສັງລວມເອົາບົດໄຫວ້ ຮີດສິບສອງ ຄອງສິບສີ່, ການເທດສະໜາສັງສອນ ແລະ ນິຕິກໍາຕ່າງໆ ທີ່ກ່ຽວເຖິງວຽກງານພຸດທະສາດສະໜາຂອງລາວ ແລະ ໃນອະນາຄົດຍັງຈະສືບຕໍ່ນໍາເອົາພະໄຕຼປີດົກສະບັບພາສາປາລີ ແລະ ພາສາລາວທີ່ເປັນຫລັກທໍາຄໍາສອນຂອງພຸດທະສາດສະໜາເຂົ້າໃສ່ໃນແອັບດັ່ງກ່າວ ເຊິ່ງຈະເຮັດໃຫ້ຜູ້ທີ່ບໍ່ມີເວລາເຮັດບຸນສິນກິນທານການອຸປະຖໍາການປະຕິສັງຂອນວັດວາອາຮາມແມ່ນສາມາດເຂົ້າເບິ່ງແອັບນີ້ໄດ້ຢ່າງສະດວກສະບາຍ, ພ້ອມທັງປະກອບສ່ວນໂຄສະນາການທ່ອງທ່ຽວໂດຍສະເພາະແມ່ນການທ່ອງທ່ຽວທາງດ້ານວັດທະນະທຳ-ຮີດຄອງປະເພນີຂອງຊາດເຮົາອອກສູ່ສາກົນ ແລະພາກພື້ນເນື່ອງຈາກແອັບນີ້ໄດ້ສັງລວມເອົາບັນດາວັດ ແລະປູຊະນີຍະສານອັນເກົ່າແກ່ຂອງລາວເຮົາ;ຊ່ວຍຍົກສູງບົດບາດການເຄື່ອນໄຫວຂອງອົງການພຸດທະສາສະໜາສຳພັນ ແຫ່ງ ສປປ ລາວ, ເນື່ອງຈາກທຸກການເຄື່ອນໄຫວຂອງຄະນະບໍລິຫານງານສູນກາງອົງການພຸດທະສາດສະໜາສໍາພັນແຫ່ງ ສປປ ລາວ ກໍ່ຄືການຈັດງານບຸນປະເພນີຕ່າງໆ ສາມາດນຳລົງມາໃສ່ແອັບນີ້ລວມເຖິງການລະດົມທຶນ ເພື່ອປະຕິສັງຂອນວັດວາອາຮາມ, ສາສະນະສະຖານຕ່າງໆ ລວມທັງການຊ່ວຍເຫຼືອສັງຄົມສົງເຄາະອື່ນໆ.

ຫົວໜ້າກົມສາດສະໜາ ສູນກາງແນວລາວສ້າງຊາດມີຄໍາເຫັນຕື່ມວ່າ: ແອັບພຸດທະສາສະໜາລາວມີຊື່ເປັນພາສາອັງກິດວ່າ: Lao Bud, ເປັນແອັບທີ່ເປັນພາສາລາວແຕ່ສາມາດນຳເອົາຂໍ້ມູນທີ່ເປັນພາສາຕ່າງປະເທດມາລົງໃສ່ໄດ້, ປະກອບມີໜ້າສຳຄັນຕົ້ນຕໍຈຳນວນໜື່ງ ຄື: ໜ້າຫລັກ ຫລືໜ້າທໍາອິດ,ໜ້າພຣະພຸດທະສາສະໜາ, ໜ້າຮີດຄອງປະເພນີ ແລະໜ້າຂໍ້ມູນຂອງຜູ້ນຳໃຊ້ແອັບ; ໃນໜ້າຫລັກແມ່ນໄດ້ນຳສະເໜີກ່ຽວກັບປະຕິທິນ, ບຸນປະເພນີໃນແຕ່ລະໄລຍະ, ການທ່ຽວຊົມວັດອອນລາຍ ແລະ ປະຫວັດການຄົ້ນຫາ. ສ່ວນໜ້າພຣະພຸດທະສາສະໜາແມ່ນຈະໄດ້ນໍາ ສະເໜີການໄຫວ້ພະ, ການສູດມົນ, ສະເພາະຫ້ອງອ່ານແມ່ນຈະນຳເອົາພຣະໄຕປິດົກ, ຄວາມໄຫວ້ພຣະລາວເດີມ, ຄວາມໄຫວພຣະສົງສໍາມະເນນລາວ.

แชร์