ບໍລິສັດ GULF ໄດ້ລົງທຶນຮ່ວມກັນພັດທະນາ ເຂື່ອນປາກແບ່ງ ແລະເຂື່ອນປາກລາຍ

ໃນວັນທີ 22 ກຸມພາ 2023 ຜ່ານມານີ້, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ, ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ອະມອນ ອຽມສີພົງ, ຮອງປະທານອາວຸໂສຜູ້ບໍລິຫານບໍລິສັດ GULF ພັດທະນາດ້ານພະລັງງານ ຈຳກັດ, ພ້ອມດ້ວຍຄະນະ, ໂດຍມີຫົວໜ້າກົມການເງິນຕ່າງປະເທດ, ຫົວໜ້າກົມໜີ້ສິນສາທາລະນະ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.



ຜູ້ບໍລິຫານບໍລິສັດ GULF ພັດທະນາດ້ານພະລັງງານ ຈຳກັດ ໄດ້ລາຍງານກ່ຽວກັບວຽກງານທີ່ບໍລິສັດກຳລັງດຳເນີນຢູ່ ສປປ ລາວ ໃນຂະແໜງພະລັງງານນັບຕັ້ງແຕ່ປີ 2015 ເປັນຕົ້ນມາ. ໃນນັ້ນ, ແມ່ນໜຶ່ງໃນຜູ້ຖືຫຸ້ນຂອງບໍລິສັດຜະລິດ–ໄຟຟ້າລາວ ມະຫາຊົນ (EDL-Generation Public Company) ເປັນຜູ້ຖືຮຸ້ນອັນດັບທີ 11 ລາຍໃຫຍ່ຂອງ EDL-Gen, ຖືຮຸ້ນຢູ່ 7.766.666 ຮຸ້ນຂອງທັງໝົດ.

ຄຽງຄູ່ກັນນັ້ນ, GULF ໄດ້ລົງທຶນຮ່ວມກັນພັດທະນາ ແລະດຳເນີນໂຄງການເຂື່ອນໄຟຟ້າໃນເຂດແມ່ນໍ້າຂອງ ເຊັ່ນ: ເຂື່ອນປາກແບ່ງ, ເຂື່ອນປາກລາຍດ້ວຍກຳລັງການຕິດຕັ້ງທັງໝົດ 1.600 ເມກາວັດ, ຊຶ່ງທັງສອງໂຄງການເຂື່ອນໄຟຟ້າໄດ້ສຳເລັດການລົງນາມໃນບົດບັນທຶກຂໍ້ຕົກລົງອັດຕາຄ່າໄຟຟ້າ (Tariff MOU) ກັບອົງການໄຟຟ້າຝ່າຍຜະລິດແຫ່ງປະເທດໄທ (EGAT).

ສໍາລັບການສະໜອງກະແສໄຟຟ້າໃຫ້ປະເທດໄທ ແລະໃນຫວ່າງບໍ່ດົນມານີ້ໄດ້ມີການເຊັນສັນຍາສຳປະທານ CA ໂຄງການເຂື່ອນໄຟຟ້ານໍ້າຂອງປາກລາຍ, ຄາດວ່າຈະເຂົ້າສູ່ສັນຍາຊື້-ຂາຍໄຟຟ້າ (PPA) ກັບ EGAT ໃນໄວໆນີ້.
.
Cr: ກະຊວງການເງິນ

แชร์