ບໍລິສັດ ໂຕໂຢຕ້າລາວ ຈໍາກັດ ໄດ້ຮັບໃບຢັ້ງຢືນຜູ້ປະກອບການມາດຕະຖານ ເອອີໂອ

ພິທີມອບໃບຢັ້ງຢືນຜູ້ປະກອບການມາດຕະຖານ ເອອີໂອ(AEO) ໃຫ້ແກ່ບໍລິສັດ ໂຕໂຢຕ້າ ລາວ ຈໍາກັດ ຈັດຂຶ້ນໃນວັນທີ 23 ກຸມພາ 2023 ນີ້, ທີ່ກະຊວງການເງິນ ໂດຍມີທ່ານ ສັນຕິພາບ ພົມວິຫານ ລັດຖະມົນຕີກະ ຊວງການເງິນ, ທ່ານ ມະໂນທອງ ວົງໄຊ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ໂຄບະຢະຊິ ເຄັນອິຈິ ເອກອັກຄະລັດຖະທູດຍີ່ປຸ່ນ ປະຈໍາ ສປປ ລາວ, ຄະນະກົມພາສີ ກະຊວງການເງິນ, ຜູ້ອໍານວນການບໍລິສັດ ໂຕໂຢຕ້າ ລາວ ຈໍາກັດ ແລະຜູ້ຕາງໜ້າຈາກພາກສ່ວນກ່ຽວຂ້ອງເຂົ້າຮ່ວມ.

ໂຄງການ Authorized Economic Operator (AEO) ຫລືແຜນງານຜູ້ປະກອບກອບການ AEO ແມ່ນໂຄງການທີ່ສຸມໃສ່ບັນດາບໍລິສັດ ຫລືຜູ້ປະກອບການທີ່ນອນໃນຕ່ອງໂສ້ທຸລະກິດເຊັ່ນ: ຜູ້ນຳເຂົ້າ, ຜູ້ສົ່ງອອກ, ຜູ້ບໍລິການແຈ້ງພາສີ, ຜູ້ບໍລິການຂົນສົ່ງລວມເຖິງຜູ້ບໍລິການສາງໃຫ້ມີຄວາມປອດໄພໃນຕ່ອງໂສ້ທຸລະກິດ-ຫລີກລ່ຽງການກໍ່ການ ຮ້າຍ ແລະ ປົກປ້ອງສັງຄົມຢູ່ໃນລະດັບສາກົນເຊັ່ນ: ອົງການການຄ້າໂລກ, ອົງການພາສີໂລກ, ມີຂໍ້ກຳນົດຊັດເຈນ ກ່ຽວກັບການຈັດຕັ້ງປະຕິບັດໂຄງການ AEO ໃນພາກພື້ນ ແລະ ສາກົນ, ຊຶ່ງໄດ້ມີການລິເລີ່ມໂຄງການ AEO ທີ່ໂດດເດັ່ນໃນອາຊີ ໂດຍສະເພາະຢູ່ ສປ ຈີນ, ຮົງກົງ, ໃຕ້ຫວັນ, ຍີ່ປຸ່ນ, ເກົາຫລີ ແລະຢູ່ອາຊຽນຂອງພວກເຮົາກໍມີ 8 ປະເທດໄດ້ລິເລີ່ມໂຄງການ AEO ເຊັ່ນ: ປະເທດ ສິງກະໂປ, ມາເລເຊຍ, ອິນໂດເນເຊຍ, ຟິລິປິນ, ບຣູໄນ, ໄທ, ຫວຽດນາມ ແລະ ສປປ ລາວ. ສ່ວນກຳປູເຈຍ ແລະ ມຽນມາ ແມ່ນຢູ່ໃນຂັ້ນຕອນກະກຽມໂຄງການ, ພ້ອມ ກັນນີ້, ອາຊຽນຍັງໄດ້ເລີ່ມ ໂຄງການ AEO MRA (Mutual recognition Agreement) ຊຶ່ງເປັນໂຄງການຮັບຮູ້ຜູ້ປະ ກອບການເຊິ່ງກັນ ແລະ ກັນຂອງປະເທດຜູ້ເຂົ້າຮ່ວມໂຄງການ AEO.

ພ້ອມດຽວກັນນີ້, ສປປ ລາວ ກໍຢູ່ໃນຂັ້ນຕອນຂໍລົງນາມໃນສັນຍາດັ່ງກ່າວ ຈາກກະຊວງການຕ່າງປະເທດ, ຄາດວ່າພາຍໃນໄຕມາດທີ 1 ຂອງປີ 2023 ຈະໄດ້ຮ່ວມໃນໂຄງການ AEO MRA ຂອງອາຊຽນໂດຍເນັ້ນໃສ່ການສ້າງຜູ້ປະກອບການມາດຕະຖານ AEO ພາຍໃນປະເທດໃຫ້ໄດ້ຫລາຍກ່ອນແລ້ວຈຶ່ງກ້າວໄປສູ່ຮັບຮູ້ຜູ້ປະກອບການເຊິ່ງກັນ ແລະກັນ.

ສຳລັບບໍລິສັດ ໂຕໂຢຕ້າ ລາວ ຈໍາກັດ ເປັນບໍລິສັດທຳອິດຂອງ ສປປ ລາວ, ທີ່ໄດ້ຮັບໃບຢັ້ງຢືນຜູ້ປະກອບການມາດຕະຖານ AEO ທັງນີ້, ກໍຍ້ອນວ່າບໍລິສັດສາມາດຢັ້ງຢືນໄດ້ວ່າມີການປະຕິບັດຕາມກົດໝາຍ, ມີຄວາມສອດຄ່ອງໃນການປະຕິບັດກົດໝາຍ, ບໍລິສັດມີຄວາມສາມາດລາຍງານລະບົບຄວບຄຸມພາຍໃນອົງກອນແກ່ເຈົ້າໜ້າທີ່ພາສີຜູ້ປະເມີນ, ຢັ້ງຢືນຄວາມຄ່ອງຕົວ, ຄວາມສາມາດທາງດ້ານການເງິນຂອງບໍລິສັດ, ບໍລິສັດມີລະບົບປ້ອງ ກັນຄວາມປອດໄພ ແລະຜ່ານເກນການປະເມີນໃນທຸກເງື່ອນໄຂ.

ສ່ວນຜົນປະໂຫຍດຜູ້ປະກອບການໄດ້ຮັບໃບຢັ້ງຢືນຜູ້ປະກອບການມາດຕະຖານ AEO ຈະໄດ້ຮັບຄວາມ ໄວ້ວາງໃຈຈາກພາກລັດ, ການກວດປ່ອຍສິນຄ້າໄວຂຶ້ນ, ຫລຸດຜ່ອນເວລາ, ຄ່າຝາກສາງ, ສາມາດເຂົ້າເຖິງຂໍ້ມູນສຳຄັນ, ເປັນບໍລິສັດທີ່ໜ້າເຊື່ອຖືໃນລະດັບປະເທດ ແລະພາກພື້ນ, ພາບພົດຂອງອົງກອນດີຂຶ້ນ, ຫລຸດຜ່ອນເວລາ ກວດປ່ອຍ, ປະຢັດຕົ້ນທຶນ. ພ້ອມດຽວກັນນັ້ນ, ການຄວບຄຸມທາງພາສີແມ່ນໃນຮູບແບບທາງອ້ອມ.

ສ່ວນຜູ້ປະກອບການທົ່ວໄປທີ່ຈະຖືກກວດສອບທັງສິນຄ້າ, ເອກະສານກ່ຽວກັບການການແຈ້ງພາສີ ແລະ ຖືກກວດສອບຄືນຫລັງການແຈ້ງພາສີ ແລະ ບໍ່ໄດ້ຮັບຜົນປະໂຫຍດຈາກໂຄງການເອອີໂອ, ພ້ອມກັນນັ້ນ, ການຄວບຄຸມທາງພາສີແມ່ນໃນຮູບແບບທາງກົງ.
Cr: ກະຊວງການເງິນ

แชร์