ກຸ່ມບໍລິສັດໂຊກໄຊສຳເລັດເຈລະຈາເຂົ້າຊື້ ແພນດ້າມາດ ຊຸບເປີມາເກັດອອນລາຍຂອງ ຟູດແພນດ້າ ລາວ

ນະຄອນຫຼວງວຽງຈັນ, ວັນທີ 22 ກຸມພາ 2023, ກຸ່ມບໍລິສັດໂຊກໄຊ ໄດ້ລົງທຶນເຂົ້າຊື້ ແພນດ້າມາດ ຈາກບໍລິສັດ ເດລີເວີຣີ ຮີໂຣ ດີມາດ ລາວ ຈຳກັດຜູ້ດຽວ ຫວັງເລັ່ງລັດການຫັນປ່ຽນທຸລະກິດ ຊຸບເປິມາເກັດສູ່ອອນລາຍ ເພື່ອໃຫ້ແທດເໝາະກັບການປ່ຽນແປງ ແລະຄວາມຕ້ອງການຂອງສັງຄົມ. ຫຼັງຈາກເຈລະຈາຊື້ ແພນດ້າມາດ ສຳເລັດ, ບໍລິການ ແພນດ້າມາດ ຈະຖືກປ່ຽນຊື່ເປັນ ແພນດ້າມາດ ໂດຍໂຊກໄຊ (pandamart by Sokxay) ພ້ອມດຳເນີນການບໍລິການໃຫ້ກັບລູກຄ້າເປັນປົກກະຕິ ພາຍໃຕ້ໝວດໝູ່ຮ້ານຄ້າ ຫຼື foodpanda shops ໃນ ແອັບ ຟູດແພນດ້າ. ແພນດ້າມາດ ຫຼືຊຸບເປີມາເກັດອອນລາຍທີ່ຫລາຍຄົນຮູ້ຈັກເຊິ່ງເປັນໜຶ່ງໃນການບໍລິການຂອງຟູດແພນດ້າທີ່ມີ ການເຕີບໂຕຢ່າງໄວວາ ນອກຈາກ ບໍລິການຈັດສົ່ງອາຫານ ແລະ ເຄື່ອງໃຊ້. ແພນດ້າມາດ ເລີ່ມໃຫ້ບໍລິການລູກຄ້າໃນລາວຕັ້ງແຕ່ເດືອນ ຕຸລາ 2021 ເປັນຕົ້ນມາ, ເຊິ່ງແຕ່ລະປີໄດ້ມີການເຕີບໃຫຍ່ ແລະ ຂະຫຍາຍໂຕຢ່າງຕໍ່ເນື່ອງໃນການຈັດສົ່ງເຄື່ອງໃຊ້ສອຍເຖີງໜ້າບ້ານທ່ານພາຍໃນ 30 ນາທີ. ການເຂົ້າຊື້ແພນດ້າມາດຂອງກຸ່ມບໍລິສັດໂຊກໄຊ ໃນຄັ້ງນີ້ເຮັດໃຫ້ກຸ່ມບໍລິສັດໂຊກໄຊ ເປັນຊຸບເປີມາເກັດເຈົ້າທຳອິດຂອງລາວທີ່ມີການຈັດສົ່ງອອນລາຍ.

‘’ຂ້າພະເຈົ້າເຊື່ອວ່າ ແພນດ້າມາດ ໂດຍໂຊກໄຊ (pandamart by Sokxay) ຈະເຮັດໃຫ້ຂະແໜງການຊຸບເປີມາເກັດໃນລາວມີການປ່ຽນແປງ ແລະພັດທະນາໄປໃນທາງທີ່ດີຂຶ້ນ, ໂດຍການນໍາໃຊ້ຈຸດເດັ່ນຂອງທັງສອງບໍລິສັດມາປະສົມປະສານກັນ ແລະ ໃຫ້ບໍລິການ ທີ່ສະດວກ ແລະ ທັນສະໄໝໃຫ້ກັບລູກຄ້າກໍຄືຜູ້ຊົມໃຊ້. ກຸ່ມໂຊກໄຊໄດ້ດຳເນີນທຸລະກິດ ຊຸບເປີມາເກັດ ຫຼື ໂຊກໄຊມາດມາຍາວນານ, ມີປະລິມານສິນຄ້າທີ່ຫຼວງຫຼາຍ, ມີຈໍານວນສາຂາຄອບຄຸມທົ່ວນະຄອນຫຼວງ, ສໍາລັບ foodpanda ພວກເຮົາກໍມີລະບົບຂົນສົ່ງທີ່ທັນສະໄໝ, ແອັບພີເຄຊັ້ນ ອອນລາຍທີ່ສະດວກສະບາຍ. ດັ່ງນັ້ນ, ຂ້າພະເຈົ້າຈີ່ງເຊື່ອວ່າການຮ່ວມມືໃນຄັ້ງນີ້ຈະນໍາຜົນປະໂຫຍດມາໃຫ້ກັບຜູ້ຊົມໃຊ້ຢ່າງຫຼວງຫຼາຍ ແລະເຮັດໃຫ້ປະສົບການຊື້ເຄື່ອງຈາກຊຸບເປີມາເກັດຂອງຄົນລາວດີຂຶ້ນກວ່າເກົ່າ’’, ກ່າວໂດຍທ່ານ ທັນຍາລັດ ຈະເລີນສຸກ ຜູ້ອຳນວຍການບໍລິສັດ ເດລີເວີຣີ ຮີໂຣ ດີມາດ ລາວ ຈຳກັດຜູ້ດຽວ.

ທ່ານ ໂຊກໄຊ ສົມໃຈນຶກ (ປະທານກຸ່ມບໍລິສັດໂຊກໄຊ) ໄດ້ໃຫ້ສຳພາດແກ່ນັກຂ່າວວ່າ ‘’ ແພນດ້າມາດເປັນທຸລະກິດໜຶ່ງທີ່ເຕີບໂຕຢ່າງໄວວາດ້ວຍພຶດຕິກຳຂອງຜູ້ບໍລິໂພກໃນລາວໄດ້ມີການປ່ຽນແປງຕາມຍຸກຕາມສະໄໝ ແລະ ດ້ວຍລະບົບທີ່ທັນສະໄໝຂອງ ຟູດແພນດ້າເອງ ທີ່ເປັນສ່ວນເຮັດໃຫ້ ແພນດາມາດປະສົບຜົນສຳເລັດ. ດ້ວຍເຫດດັ່ງກ່າວ ຂ້າພະເຈົ້າໄດ້ເຫັນໂອກາດທີ່ຈະນຳ ແພນດ້າມາດ ເຂົ້າມາເພີ່ມປັບປຸງ ແລະ ຍົກລະດັບທຸລະກິດຊຸບເປີມາເກັດ ທີ່ກຸ່ມບໍລິສັດໂຊກໄຊໄດ້ໃຫ້ບໍລິການກັບຄົນລາວມາຍາວນານ. ການລົງທຶນໃນແພນດ້າມາດໃນຄັ້ງນີ້ ຂ້າພະເຈົ້າເຊື່ອວ່າ ຜູ້ຊົມໃຊ້ຂອງໂຊກໄຊມາດ, ລູກຄ້າເກົ່າ ແລະ ໃໝ່ຂອງແພນດ້າມາດ ຍັງຈະໄດ້ຮັບຄວາມຫຼາກຫຼາຍ ແລະຄວາມສະດວກສະບາຍ. ກຸ່ມບໍລິສັດໂຊກໄຊເອງຈະພະຍາຍາມເພີ່ມຈຳນວນສິນຄ້າເພື່ອໃຫ້ແທດເໝາະກັບຄວາມຕ້ອງການຂອງລູກຄ້າ ແລະພ້ອມດຽວກັນນັ້ນພວກເຮົາຈະເຮັດວຽກໃກ້ຊິດກັບທີມງານຟູດແພນດ້າລາວເພື່ອຮັບປະກັນວ່າລູກຄ້າຍັງໄດ້ຮັບປະສົບການທີ່ດີ ແລະການຈັດສົ່ງທີ່ໄວ ຄືແຕ່ເກົ່າ’’.

ສຳລັບແພນດ້າມາດໂດຍໂຊກໄຊ ຫຼື pandamart by Sokxay ແມ່ນໄດ້ເລີ່ມໃຫ້ບໍລິການແລ້ວແຕ່ຢູ່ໃນໝວດໝູ່ຂອງຮ້ານຄ້າໃນແອັບຟູດແພນດ້າ ແລະຍັງຄົງຄວາມຫຼາກຫຼາຍຂອງສິນຄ້າ ແລະຈັດສົ່ງໃຫ້ກັບລູກຄ້າເປັນປົກກະຕິ.


แชร์