ປກສ ຍ້ອງຍໍທັບນັກກິລາຢ່າງສົມກຽດ ຫຼັງສ້າງຜົນງານບັນລຸຄາດໝາຍ ຊຽງຂວາງເກມ

ກະຊວງປ້ອງກັນຄວາມສະຫງົບ ຫຼື ປກສ ໄດ້ຈັດພິທີມອບຫຼຽນໄຊພິລະອາດຫານ ຊັ້ນ III ຈຳນວນ 59 ຫຼຽນ, ຫຼຽນກາກະຊວງ ປກສ ຈຳນວນ 69 ຫຼຽນ, ໃບຍ້ອງຍໍກະຊວງ ປກສ ຈຳນວນ 39 ໃບ ແລະໃບຍ້ອງຍໍກົມໃຫຍ່ການເມືອງ ປກສ ຈຳນວນ 17 ໃບ ພ້ອມເງິນໂບນັດໃຫ້ທັບນັກກິລາ ປກສ ຊຸດສ້າງຜົນງານບັນລຸຄາດໝາຍຄວ້າ ຫຼຽນຄໍາ 23 ຫຼຽນ, ຫຼຽນເງິນ 17 ຫຼຽນ ແລະຫຼຽນທອງ 29 ຫຼຽນ ລວມ 69 ຫຼຽນ ຈັດຢູ່ອັນດັບທີ 6 ງານມະຫະກໍາກິລາແຫ່ງຊາດ ຄັ້ງທີ 11 ຫຼື ຊຽງຂວາງເກມ ທີ່ແຂວງຊຽງຂວາງເປັນເຈົ້າພາບ ລະຫ່ວາງວັນທີ 13-22 ທັນວາ 2022.

ພິທີສະຫຼຸບຜົນງານໃຫ້ຄະນະນັກກິລາ ກະຊວງ ປກສ ທີ່ສໍາເລັດການແຂ່ງຂັນໃນ ຊຽງຂວາງເກມ ໄດ້ມີຂຶ້ນ ເມື່ອວັນທີ 22 ກຸມພາຜ່ານມາ ທີ່ກອງກິລາກົມໂຄສະນາອົບຮົມ ກົມໃຫຍ່ການເມືອງ ປກສ ບ້ານໂນນສະຫວ່າງ ເມືອງໄຊເຊດຖາ ນະຄອນຫຼວງວຽງຈັນ, ໂດຍການເຂົ້າຮ່ວມ ແລະມອບການຍ້ອງຍໍຂອງ ທ່ານ ພົຕ ວັນທອງ ກອງມະນີ ຮອງລັດຖະມົນຕີກະຊວງປ້ອງກັນຄວາມສະຫງົບ, ຫົວໜ້າກົມໃຫຍ່ການເມືອງທັງເປັນຫົວໜ້າຄະນະຮັບຜິດຊອບຊີ້ນໍາລວມກິລາ ກະຊວງ ປກສ, ມີຄະນະພັກ-ຄະນະນໍາກະຊວງ, ຄູຝຶກ, ນັກກິລາ ແລະແຂກຮັບເຊີນເຂົ້າຮ່ວມ.

ໂອກາດນີ້, ທ່ານ ພັອ ສອນພະຈັນ ທໍາມະວົງ ຫົວໜ້າກົມໂຄສະນາອົບຮົມກົມໃຫຍ່ການເມືອງ ປກສ, ຄະນະຮັບຜິດຊອບຊີ້ນໍາລວມກິລາ ກະຊວງ ປກສ ໄດ້ລາຍງານໃຫ້ຮູ້ວ່າ: ສໍາລັບກະຊວງ ປກສ ໄດ້ແຕ່ງຕັ້ງຄະນະຮັບຜິດຊອບຊີ້ນຳລວມ, ອະນຸກໍາມະການຕ່າງໆ, ຄູຝຶກ ແລະ ນັກກິລາ ທັງໜົດ ຈໍານວນ 119 ສະຫາຍ ພ້ອມທັງຄົ້ນຄວ້າຄັດເລືອກເອົາ 11 ປະເພດກິລາເຂົ້າຮ່ວມແຂ່ງຂັນ ຊຶ່ງຕິດພັນກັບວຽກງານວິຊາສະເພາະເປັນຕົ້ນຕໍ, ໄດ້ກໍານົດຄາດໝາຍຫຼຽນຄໍາ 12 ຫຼຽນ ແລະ ຈັດອັນດັບບໍ່ໃຫ້ຫຼຸດທີ 10 ຂອງຕາຕະລາງຫຼຽນລາງວັນ. ໃນນັ້ນ, ມີກິລາຍິງປືນ, ກະຕໍ້, ປັນຈັກສີລັດ, ແລ່ນ-ລານ, ເປຕັງ, ມວຍລາວ, ມວຍສາກົນ, ມວຍປໍ້າ, ຍິງທະນູ, ກັອບ ແລະກິລາເທຄວັນໂດ ຜ່ານການແຂ່ງຂັນທັບນັກກິລາກະຊວງ ປກສ ສາມາດຍາດໄດ້ທັງໜົດ 69 ຫຼຽນ ໃນນັ້ນ, ມີຫຼຽນຄໍາ 23 ຫຼຽນ, ຫຼຽນເງິນ 17 ຫຼຽນ ແລະຫຼຽນທອງ 29 ຫຼຽນ.

ໃນພິທີດັ່ງກ່າວ, ກໍໄດ້ມອບນະໂຍບາຍປະເພດຕ່າງໆ ໃຫ້ຄະນະຮັບຜິດຊອບ, ຄູຝຶກ, ນັກກິລາ ແລະບໍລິສັດຫ້າງຮ້ານທີ່ໃຫ້ການອຸປະຖໍາຊຸກຍູ້ນັກກິລາທີ່ເຂົ້າຮ່ວມງານມະຫະກໍາກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ, ໃນນັ້ນ ກະຊວງ ປກສ ໄດ້ມອບຫຼຽນໄຊພິລະອາດຫານ ຊັ້ນ III ຈຳນວນ 59 ຫຼຽນ, ຫຼຽນກາກະຊວງ ປກສ ຈຳນວນ 69 ຫຼຽນ, ໃບຍ້ອງກະຊວງ ປກສ ຈຳນວນ 39 ໃບ ແລະໃບຍ້ອງຍໍກົມໃຫຍ່ການເມືອງ ປກສ ຈຳນວນ 17 ໃບ.

ພາບ-ຂ່າວ: ແກ້ວ ອຸເພັດ
ຮຽບຮຽງໂດຍ ສົງການ ພັນແພງດີ

แชร์