ຊາວໜຸ່ມກະຊວງ ຖວທ ສະຫລຸບການຈັດຕັ້ງປະຕິບັດວຽກງານປະຈຳປີ

ຄະນະບໍລິຫານງານຊາວໜຸ່ມ ກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ (ຖວທ) ຈັດກອງປະຊຸມສະຫລຸບການຈັດຕັ້ງປະຕິບັດວຽກງານຂອງຄະນະບໍລິຫານງານຊາວໜຸ່ມ ປະຈຳປີ 2022 ແລະ ວາງ ທິດທາງແຜນການປີ 2023 ໃນວັນທີ 23 ກຸມພາ 2023 ນີ້,ໃຫ້ກຽດເຂົ້າຮ່ວມມີທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ, ມີບັນດາຊາວໜຸ່ມ ອ້ອມຂ້າງກະຊວງ ຖວທ ເຂົ້າຮ່ວມ.

ໃນກອງປະຊຸມ, ທ່ານ ບົວໄລ ພານຸວົງ ເລຂາຄະນະບໍລິຫານງານຊາວໜຸ່ມກະຊວງ ຖວທ ລາຍງານໃຫ້ຮູ້ວ່າ: ໃນໄລຍະ 1 ປີຜ່ານມາ ຄະນະບໍລິຫານງານຊາວໜຸ່ມກະຊວງ ຖວທ ໄດ້ເອົາໃຈໃສ່ນຳພາ-ຊີ້ນຳການຈັດຕັ້ງ ຊາວໜຸ່ມຮາກຖານ ທີ່ຂຶ້ນກັບກະຊວງ ຖວທ ເປັນເຈົ້າການເຄື່ອນໄຫວນຳພາ-ຊີ້ນຳສຶກສາອົບຮົມການເມືອງ-ແນວ ຄິດ ໃຫ້ສະມາຊິກຊາວໜຸ່ມ-ເຍົາວະຊົນ ທີ່ຢູ່ໃນຂັ້ນຄຸ້ມຄອງຂອງຕົນຢ່າງເປັນປົກກະຕິ-ຕໍ່ເນື່ອງ, ເປັນເຈົ້າການປະຕິ ບັດຕາມໜ້າທີ່ການເມືອງ, ຂອບເຂດສິດ ແລະ ໜ້າທີ່ຂອງຕົນ ທີ່ໄດ້ຮັບມອບໝາຍຈາກການຈັດຕັ້ງພັກ-ລັດ, ຄະນະບໍລິຫານງານຊາວໜຸ່ມກະຊວງ ຖວທ ດ້ວຍຄວາມຮັບຜິດຊອບສູງ, ເຊິ່ງສາມາດຕີລາຄາໄດ້ວ່າ: ພາຍໃຕ້ການນຳພາ-ຊີ້ນຳ ຂອງຄະນະບໍລິຫານງານພັກກະຊວງ ຖວທ ແລະ ຄະນະບໍລິຫານງານຊາວໜຸ່ມທຸກຂັ້ນຍັງຮັກສາໄດ້ສະຖຽນລະພາບທາງດ້ານການເມືອງ ພາຍໃນການຈັດຕັ້ງຊາວໜຸ່ມຮາກຖານຂັ້ນຄຸ້ມຄອງຂອງຕົນຢ່າງໜັກແໜ້ນ ແລະເຂັ້ມແຂງ,ເຊິ່ງສະແດງອອກໃນຜົນສຳເລັດຂອງໜ້າທີ່ການເມືອງທີ່ໄດ້ຮັບມອບໝາຍ, ຄວາມສາມັກຄີເປັນເອກະພາບ ພາຍໃນ ແລະ ຮັກສາໄດ້ຄວາມສະຫງົບປອດໄພເປັນຢ່າງດີ, ສະມາຊິກຊາວໜຸ່ມມີຄວາມຈູບຈ້າວຫ້າວຫັນ ພ້ອມ ກັນປະກອບສ່ວນເຂົ້າໃນທຸກຂະບວນການ ທີ່ການຈັດຕັ້ງພັກ-ລັດ ແລະ ຊາວໜຸ່ມຂັ້ນເທິງວາງອອກໃນແຕ່ລະໄລຍະ ຢ່າງເປັນຂະບວນຟົດຟື້ນ ແລະ ພ້ອມພຽງຮຽງໜ້າ ອອກແຮງແຂ່ງຂັນກັນສ້າງຜົນງານ ເພື່ອຂໍ່ານັບຮັບຕ້ອນສອງວັນ ປະຫວັດສາດຂອງສອງຊາດລາວຫວຽດນາມ ແລະ ວັນສຳຄັນຕ່າງໆຂອງຊາດ ແລະ ຂອງພັກ ເຊິ່ງເຫັນໄດ້ຢ່າງ ປະຈັກຕາໃນທຸກຂົງເຂດເຊັ່ນ: ຂົງເຂດຖະແຫລງຂ່າວ, ວັດທະນະທຳ ແລະ ທ່ອງທ່ຽວ ລ້ວນແຕ່ເຮັດຫລ້ອນໜ້າທີ່ ການເມືອງຂອງພັກ-ລັດ ມອບໝາຍໃຫ້ຢ່າງຈົບງາມ. ພ້ອມນັ້ນ, ທ່ານ ບົວໄລ ພານຸວົງ ຍັງໄດ້ຍົກໃຫ້ເຫັນດ້ານດີ, ດ້ານອ່ອນ-ຂໍ້ຄົງຄ້າງ ແລະບົດຮຽນທີ່ຖອດຖອນໄດ້ໃນໄລຍະຜ່ານມາຕື່ມອີກ.

ໂອກາດນີ້, ທ່ານ ໂພສີ ແກ້ວມະນີວົງ ໄດ້ສະແດງຄວາມຊົມເຊີຍຕໍ່ຜົນສຳເລັດໃນການຈັດຕັ້ງປະຕິບັດວຽກງານຂອງຄະນະບໍລິຫານງານຊາວໜຸ່ມໃນໄລຍະຜ່ານມາ, ພ້ອມທັງ ເນັ້ນໃຫ້ຊາວໜຸ່ມຕ້ອງໄດ້ເພີ່ມທະວີຄວາມເອົາໃຈທາງດ້ານການເມືອງແນວຄິດໃຫ້ເປັນເອກະພາບຕໍ່ກັບແນວທາງນະໂຍບາຍຂອງ ພັກ-ລັດ, ມີຄວາມເຊື່ອໝັ້ນຕໍ່ການນໍາພາຂອງ ພັກ-ລັດ, ໝາຍວ່າຕ້ອງມີຄວາມສາມັກຄີເປັນເອກະພາບຢ່າງແໜ້ນແຟ້ນ, ເປັນກ້ອນກຳລັງອັນແຂງແກ່ນ, ຕ້ອງຮູ້ຈຳແນກມິດ ແລະສັດຕູ, ເອົາໃຈໃສ່ຍົກສູງຄວາມຮູ້ຄວາມສາມາດ, ໝາຍວ່າຢາກໃຫ້ເອົາໃຈໃສ່ຄົ້ນຄວ້າສຶກສາຮໍ່າຮຽນຍົກສູງລະດັບຄວາມຮູ້ຄວາມສາມາດຮອບດ້ານ ເປັນຕົ້ນ ດ້ານວິຊາສະເພາະ, ດ້ານພາສາ ແລະເຕັກໂນໂລຊີທີ່ທັນສະໄໝ,ພ້ອມທັງໃຫ້ເອົາໃຈໃສ່ກໍ່ສ້າງບຸກຄາລະກອນໃຫ້ສອດຄ່ອງກັບໜ້າວຽກຕົວຈິງ,ຍົກລະດັບຄວາມຮູ້ຄວາມສາມາດຂອງ ພະນັກງານ-ລັດຖະກອນ ທາງດ້ານວິຊາສະເພາະ ເພື່ອຮັບໃຊ້ໜ້າທີ່ການເມືອງ ໄປຕາມທິດພະນັກງານສືບທອດປ່ຽນແທນແຕ່ລະໄລຍະ, ຄວາມສາມາດ ວິຊາສະເພາະ ຜູ້ໜຶ່ງຕ້ອງເຮັດໄດ້ຫລາຍວຽກ ຍ້ອນປັດຈຸບັນໂກຕ້າພະນັກງານ-ລັດຖະກອນ ມີຈຳກັດຫລາຍ ເພື່ອກະກຽມບຸກ ຄະລາກອນຜູ້ທີ່ມີມາດຖານເງື່ອນໄຂ ເພື່ອສະມັກເຂົ້າໃນຄະນະບໍລິຫານງານຊາວໜຸ່ມກະຊວງຊຸດໃໝ່ ຄືຊຸດທີ IX ໃນປີ 2024; ເພີ່ມທະວີຄວາມເອົາໃຈໃສ່ໃນການໄກ້ສິດຕິດແທດນຳພາ-ຊີ້ນຳ, ຊ່ວຍເຫລືອກໍ່ສ້າງກຳລັງຊາວໜຸ່ມ, ໝູນໃຊ້ກຳລັງແຮງຊາວໜຸ່ມເຂົ້າໃນວຽກງານຢ່າງເຕັມສ່ວນ ເພື່ອສ້າງຄວາມເຂັ້ມແຂງທາງດ້ານຄວາມຮູ້, ຄວາມສາມາດ ແລະ ການນຳພາຮອບດ້ານໃຫ້ແກ່ຊາວໜຸ່ມ, ຕ້ອງກ້າໃຫ້ໂອກາດ, ກ້າມອບໝາຍວຽກງານທີສຳຄັນໃຫ້ແກ່ຊາວໜຸ່ມໄປຈັດຕັ້ງປະຕິບັດ ແລະ ຕ້ອງໄດ້ຊ່ວຍຕິດຕາມກວດກາແນະນຳຢ່າງໃກ້ສິດ ເພື່ອເປັນການສ້າງຊາວໜຸ່ມໃຫ້ກາຍເປັນຜູ້ສືບທອດທີ່ເຂັ້ມແຂງທີ່ຈະສືບທອດພາລະກິດໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມສີວິໄລໃນອາະນາຄົດ, ຄົ້ນຄວ້າລົງ ເລິກສ້າງຂະບວນການກິດຈະກໍາໃຫຍ່ຂອງຊາວໜຸ່ມໃຫ້ມີບັນຍາກາດຟົດຟື້ນເໝາະສົມບົນພື້ນຖານປະຢັດມັດທະ ຍັດ; ສືບຕໍ່ເປັນເຈົ້າການໃນການຊ່ວຍປຸກລະດົມຂົນຂວາຍການອະນຸລັກ ແລະປົກປັກຮັກສາພ້ອມທັງໂຄສະນາສົ່ງເສີມເອກະລັກຮີດຄອງປະເພນີອັນດີງາມຂອງຊາດໃຫ້ມີຄວາມຍືນຍົງ. ພ້ອມກັນນັ້ນ, ກໍຕີຖອຍສິ່ງຫຍໍ້ທໍ້ທີ່ເກີດຂຶ້ນ ໃນຖັນແຖວຊາວໜຸ່ມພວກເຮົາ ເຊັ່ນ: ຕ້ານການຫລິ້ນກິນຟູມເຟືອຍ,ສິ່ງອະບາຍຍະໝຸກ, ສິ່ງເສບຕິດ, ການພະນັນ ແລະປາກົດການຫຍໍ້ທໍ້ຕ່າງໆ ທີ່ກໍາລັງເປັນໄພຄຸກຄາມຊາວໜຸ່ມໃນຍຸກໂລກາພິວັດໃຫ້ຫລຸດໜ້ອຍຖອຍລົງ.
ຂ່າວ: ທະນູທອງ
ພາບ: ຂັນໄຊ

แชร์