ວາງສີລາລືກກໍ່ສ້າງລະບົບບໍາບັດນໍ້າເປື້ອນ ແລະຂີ້ຕະເລດອາຈົມ ຢູ່ນະຄອນປາກເຊ

ວັນທີ 22 ກຸມພາ 2023, ໄດ້ພິທີວາງສີລາລືກໂຄງການກໍ່ສ້າງລະບົບບໍາບັດນໍ້າເປື້ອນແບບບໍ່ລວມສູນ ແລະບໍາບັດຂີ້ຕະເລດອາຈົມຢູ່ນະຄອນປາກເຊ ແຂວງຈໍາປາສັກ ພາຍໃຕ້ໂຄງການສ້າງຄວາມອາດສາມາດໃນການຄຸ້ມຄອງນໍ້າເປື້ອນ ແລະຂີ້ເຫຍື້ອສໍາລັບປັບປຸງສິ່ງແວດລ້ອມຢູ່ນະຄອນປາກເຊ ແຂວງຈຳປາສັກ.

ພິທີຈັດຂຶ້ນຢູ່ບ້ານປາກເຊ ນະຄອນປາກເຊໂດຍໃຫ້ກຽດເຂົ້າຮ່ວມຂອງທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີກະຊວງໂຍທາທິການ ແລະຂົນສົ່ງ(ຍທຂ), ທ່ານ ສົມບູນ ເຮືອງວົງສາ ຮອງເຈົ້າແຂວງໆຈໍາປາສັກ, ທ່ານ ນາງ ມຽນ ຈີນ ຄີມ ຫົວໜ້າອົງການຮ່ວມມືສາກົນ KOICA ສ.ເກົາຫຼີ ປະຈໍາ ສປປ ລາວ, ທ່ານ ໂຣວັນ ເຟຣເຊີ ຫົວໜ້າຫ້ອງການສະຖາບັນເຕີບໂຕສີຂຽວປະຈໍາ ສປປ ລາວ, ທ່ານ ບົວລີ ເພັດສົງຄາມ ເຈົ້ານະຄອນປາກເຊ, ທ່ານ ແກ້ວລັດຕະນະ ສີຫາວົງ ຮອງປະທານສະພາປະຊາຊົນແຂວງ, ທ່ານ ຈັນວິສຸກ ວັນສີລິ ຫົວໜ້າພະແນກໂຍທາທິການ ແລະ ຂົນສົ່ງແຂວງ, ທ່ານ ວັນສະແຫວງ ອຸດທະຈັກ ຮອງຫົວໜ້າກົມນໍ້າປະປາ ກະຊວງ ຍທຂ. ມີບັນດາທ່ານການນໍາຈາກຂັ້ນສູນກາງ, ຈາກກະຊວງ ຍທຂ, ການນຳຂອງແຂວງ, ການນໍາພະແນກການອ້ອມຂ້າງແຂວງ, ລັດວິສາຫະກິດນ້ໍາປະປາແຂວງ, ນະຄອນປາກເຊ, ນາຍບ້ານ 5 ບ້ານທີ່ນອນໃນໂຄງການ, ບໍລິສັດທີ່ປຶກສາ, ບໍລິສັດຜູ້ຮັບເໝົາກໍ່ສ້າງ ແລະແຂກຖືກເຊີນເຂົ້າຮ່ວມ.

ໃນພິທີທ່ານ ວັນສະແຫວງ ອຸດທະຈັກ ຮອງຫົວໜ້າກົມນໍ້າປະປາກະຊວງ ຍທຂ ລາຍງານວ່າ: ໂຄງການດັ່ງກ່າວນີ້ຈັດຕັ້ງປະຕິບັດຢູ່ນະຄອນຫຼວງວຽງຈັນ ແລະ ນະຄອນປາກເຊ ແຂວງຈຳປາສັກ ໂດຍໄດ້ຮັບການຊ່ວຍເຫຼືອລ້າຈາກລັດຖະບານ ສ.ເກົາຫຼີ ໂດຍຜ່ານອົງການຮ່ວມມືສາກົນ KOICA, ມູນຄ່າທັງໝົດ 6,78 ລ້ານໂດລາສະຫະລັດ, ໄລຍະການຈັດຕັ້ງປະຕິບັດໂຄງການ ເລີ່ມແຕ່ປີ 2019 - 2023 (ໄລຍະເວລາທັງໝົດ 3 ປີ 9 ເດືອນ) ເພື່ອເສີມສ້າງຄວາມອາດສາມາດໃນການຄຸ້ມຄອງນໍ້າເປື້ອນ ແລະ ຂີ້ເຫຍື້ອ ສໍາລັບປັບປຸງສິ່ງແວດລ້ອມຕົວເມືອງ ທັງປັບປຸງຄວາມອາດສາມາດໃຫ້ແກ່ກົມນໍ້າປະປາ ກະຊວງ ຍທຂ, ອົງການຈັດຕັ້ງທີ່ກ່ຽວຂ້ອງ ຢູ່ນະຄອນຫຼວງວຽງຈັນ ແລະ ນະຄອນປາກເຊ ໃນການຄຸ້ມຄອງ ແລະ ພັດທະນາວຽກງານສຸຂາພິບານໃຫ້ກາຍເປັນຕົວເມືອງສີຂຽວ; ປັບປຸງການເຂົ້າເຖິງການບໍລິການເກັບມ້ຽນຂີ້ເຫຍື້ອ ແລະການຫັນເອົາຂີ້ເຫຍື້ອໃຫ້ກາຍເປັນທຸລະກິດ; ປັບປຸງການເຂົ້າເຖິງການບໍລິການ ແລະ ການຄຸ້ມຄອງວຽກງານສຸຂາພິບານ ໂດຍສະເພາະແມ່ນການບໍາບັດນໍ້າເປື້ອນເຊິ່ງວຽກກໍ່ສ້າງລະບົບບໍາບັດນໍ້າເປື້ອນ ແລະລະບົບບໍາບັດຂີ້ຕະເລດແມ່ນກິດຈະກໍາໜຶ່ງຂອງໂຄງການໂດຍແມ່ນສະຖາບັນເຕີບໂຕສີຂຽວສາກົນເປັນຜູ້ຈັດຕັ້ງປະຕິບັດເຊິ່ງກົມນໍ້າປະປາ ກະຊວງ ຍທຂ ເປັນຜູ້ຄຸ້ມຄອງ. ງົບປະມານສໍາລັບວຽກກໍ່ສ້າງລະບົບບໍາບັດນໍ້າເປື້ອນ ແລະລະບົບບໍາບັດຂີ້ຕະເລດຢູ່ນະຄອນປາກເຊ ມີມູນຄ່າ 1.048.524 ໂດລາສະຫະລັດ.

ທ່ານ ວັນສະແຫວງ ອຸດທະຈັກ ກ່າວຕື່ມວ່າ: ຂອບເຂດ ແລະໜ້າວຽກຂອງໂຄງການປະກອບມີ 5 ບ້ານ ເຊິ່ງມີລະບົບບໍາບັດນໍ້າເປື້ອນແບບບໍ່ລວມສູນ 4 ຈຸດ ກວມເອົາປະຊາກອນ ໃນພື້ນທີ່ທັງໝົດ 9 ພັນກວ່າຄົນ ແລະ ມີໂຮງງານບໍາບັດຂີ້ຕະເລດ 1 ໂຮງງານ. ມີກໍ່ສ້າງລະບົບບໍາບັດນໍ້າເປື້ອນແບບບໍ່ລວມສູນ 4 ຈຸດ ຄື: ຈຸດບ້ານປາກເຊ - ບ້ານທົ່ງ; ຈຸດບ້ານໂພນກຸງ - ຮ່ອງຂະຍອມ; ຈຸດຕະຫຼາດດາວເຮືອງ ແລະຈຸດບ້ານພະບາດ, ມີຄວາມອາດສາມາດບໍາບັດນໍ້າເປື້ອນ 770 ແມັດກ້ອນ/ວັນ. ສ່ວນຂອບເຂດວຽກລາຍລະອຽດ ມີການກໍ່ສ້າງ - ຕິດຕັ້ງລະບົບທໍ່, ອ່າງຕົກຕະກອນ, ອ່າງບໍາບັດແບບຈຸລິນຊີ, ອ່າງກັ່ນຕອງ, ອ່າງບໍາບັດດ້ວຍທັນຍາພືດ, ຕິດຕັ້ງປໍ້າດູດນໍ້າ ແລະ ລະບົບໄຟຟ້າ. ກໍ່ສ້າງໂຮງງານບໍາບັດຂີ້ຕະເລດ ປະກອບມີອ່າງຖອກອາຈົມ, ອ່າງບໍາບັດແບບຕາກແຫ້ງ, ອ່າງບໍາບັດດ້ວຍທັນຍາພືດ ແລະລະບົບໄຟຟ້າຢູ່ສະໜາມຂີ້ເຫຍື້ອ ຫຼັກ 17. ທັງນີ້ກໍເພື່ອເຮັດໃຫ້ນໍ້າເປື້ອນໃນຕົວເມືອງແລະຊຸມຊົນໄດ້ຖືກບໍາບັດ 50% ໃນທົ່ວປະເທດ ໃນປີ 2030; ເພື່ອບັນລຸຈຸດປະສົງຂອງການພັດທະນາແບບຍົງຍືນ, ເພື່ອປັບປຸງສະພາບແວດລ້ອມໃນຕົວເມືອງເຮັດໃຫ້ຕົວເມືອງມີຄວາມສະອາດງາມຕາ ປາສະຈາກກິ່ນເໝັນ ແລະ ຫຼຸດຜ່ອນເຊື້ອພະຍາດທີ່ເກີດຈາກນໍ້າເປື້ອນ ແລະເພື່ອປັບປຸງຊີວິດການເປັນຢູ່ຂອງປະຊາຊົນບັນດາເຜົ່າທີ່ອາໄສຢູ່ໃນຕົວເມືອງໃຫ້ດີຂຶ້ນ ແລະມີສຸຂະພາບເຂັ້ມແຂງດີ.

ຕໍ່ມາຫົວໜ້າຫ້ອງການສະຖາບັນເຕີບໂຕສີຂຽວປະຈໍາ ສປປ ລາວ, ຫົວໜ້າອົງການຮ່ວມມືສາກົນ KOICA ສ.ເກົາຫຼີ ປະຈໍາ ສປປ ລາວ, ຮອງລັດຖະມົນຕີກະຊວງ ຍທຂ ແລະຮອງເຈົ້າແຂວງກໍໄດ້ຜັດປ່ຽນກັນມີຄໍາເຫັນ. ຈາກນັ້ນກໍມີການແຖບຜ້າ ແລະວາງສີລາລືກ ເພື່ອເປັນສັນຍາລັກຂອໃການຈັດຕັ້ງປະຕິບັດໂຄງການ.
Cr: medialaos

แชร์