ສາທາ ຮ່ວມກັບອົງການຈັດຕັ້ງສາກົນ ເຝິກອົບຮົມການຮັບຟັງຫາງສຽງສັງຄົມໃຫ້ກັບສື່ມວນຊົນ

ກະຊວງສາທາ ຮ່ວມກັບອົງການຈັດຕັ້ງສາກົນທີ່ກ່ຽວຂ້ອງໃນ ສປປ ລາວ ຈັດກອງປະຊຸມຝຶກອົບຮົມແລກປ່ຽນບົດຮຽນກັບສື່ມວນຊົນສູນກາງເພື່ອຖອດຖອນບົດຮຽນ ແລະຜັນຂະຫຍາຍແນວທາງການຮັບມືກັບການລະບາດທີ່ອາດເກີດຂຶ້ນໃໝ່ ແລະນໍາມາໃຫ້ມີການເຜີຍແຜ່ໃນແບບລວມດຽວກັນ.

ໃນວັນທີ 22 ກຸມພາ 2023ນີ້ທີ່ພັດທະຄານ ແລະສວນອາຫານຊົມວີວ ເມືອງວັງວຽງ ແຂວງວຽງຈັນ ສູນສື່ສານເພື່ອສຸຂະພາບ ແລະສຸຂະສຶກສາກະຊວງສາທາລະນະສຸກຮ່ວມກັບອົງການ WTO, UNICEF ໄດ້ຈັດຝຶກອົບຮົມດ້ານການຕິດຕາມຫາງສຽງສັງຄົມເພື່ອໃຊ້ເປັນຂໍ້ມູນໃນການປັບປຸງການຕອບໂຕ້ພະຍາດໂຄວິດ-19 ແລະຂະບວນການສັກວັກຊີນໃນ ສປປ ລາວ ພາຍໃຕ້ການເປັນປະທານຂອງທ່ານ ທ່ານ ດຣ ອິນປົງ ທົງພະຈັນ ຮອງຫົວໜ້າສູນສື່ສານເພື່ອສຸຂະພາບ ແລະສຸຂະສຶກສາ,ມີຕົວແທນຈາກອົງການສາກົນ ແລະສື່ມວນຊົນຈາກສູນກາງທຸກຂະແໜງການເຂົ້າຮ່ວມ.

ຈຸດປະສົງຫຼັກຂອງກອງປະຊຸມແມ່ນເພື່ອສະເໜີຜົນໄດ້ຮັບ ແລະປະສົບການຂອງບັນດາແຂວງທົ່ວປະເທດໃນປີ 2022, ໂດຍສະເພາະໃນແຂວງທີ່ມີອັດຕາການສັກຢາກັນພະຍາດໂຄວິດ-19 ຕໍ່າ;ທົບທວນຄືນທິດສະດີການປ່ຽນແປງພຶດຕິກຳ,ນຳສະເໜີການຕິດຕາມຫາງສຽງສັງຄົມແບບປົກກະຕິ ແລະແບບອອນລາຍ ແລະ ປະໂຫຍດຂອງເຄື່ອງມືດັ່ງກ່າວເຊັ່ນ: ການປັບປຸງຂໍ້ຄວາມ ແລະ ການສື່ສານເພື່ອຕອບໂຕ້ ແລະ ການລາຍງານສະພາບທີ່ມີປະສິດທິພາບຫຼາຍຂຶ້ນ; ຝຶກຊ້ອມການຮັບຟັງຫາງສຽງສັງຄົມ ແລະ ສຶກສາຄວາມເປັນໄປໄດ້ໃນການນຳເອົາເຄື່ອງມື ແລະບົດຮຽນນີ້ໄປໝຸນໃຊ້ໃນແຕ່ລະໜ່ວຍງານ; ພ້ອມຊອກຫາແຫຼ່ງຂໍ້ມູນຕ່າງໆຂອງກະຊວງສາທາລະນະສຸກນອກ ເໜືອຈາກສູນຂ່າວສານເພື່ອສຸຂະພາບ ແລະ ສຸຂະສຶກສາ ເພື່ອການເຝົ້າລະວັງຈາກຂໍ້ມູນຫຼາຍແຫຼ່ງ (multisource surveillance) ແລະສຳຫຼວດຊ່ອງວ່າງດ້ານຂໍ້ມູນທີ່ບັນດາຂະແໜງການຂອງກະຊວງສາທາລະນະສຸກ ແລະໜ່ວຍງານອື່ນໆທີ່ກ່ຽວຂ້ອງຈະສາມາດໄດ້ຜົນປະໂຫຍດຈາກການຮັບຟັງຫາງສຽງສັງຄົມ ເພື່ອຫາຂໍ້ສະຫຼຸບຮ່ວມກັນສຳລັບການຈັດຕັ້ງປະຕິບັດຂັ້ນຕອນຕໍ່ໄປ.

ການຝຶກອົບຮົມແລກປ່ຽນບົດຮຽນຄັ້ງນີ້ມີຫຼາຍຫົວຂໍ້ເນັ້ນໜັກເຊັ່ນ: ການຈັດຕັ້ງປະຕິບັດວຽກງານການສື່ສານເພື່ອຫຼຸດຜ່ອນຄວາມສ່ຽງໃນການກັນພະຍາດ ແລະ ການສົ່ງເສີມການສັກວັກຊີນກັນພະຍາດໂຄວິດ-19, ສັງລວມການຈັດຕັ້ງປະຕິບັດວຽກງານການສື່ສານເພື່ອຫຼຸດຜ່ອນຄວາມສ່ຽງ ໃນການກັນພະຍາດ ແລະການສົ່ງເສີມການສັກວັກຊີນກັນພະຍາດໂຄວິດ-19 ຂັ້ນແຂວງ, ການສື່ສານເພື່ອຫຼຸດຜ່ອນຄວາມສ່ຽງ ແລະ ການມີສ່ວນຮ່ວມກັບຊຸມຊົນ: ສິ່ງທ້າທາຍໃນການສ້າງຄວາມຕ້ອງການຂອງວັກຊີນກັນພະຍາດໂຄວິດ-19 ແລະວັກຊີນຮອບປົກກະຕິ, ປະເມີນຄືນຕໍ່ກັບບົດຮຽນທີ່ໄດ້ຮຽນມາ ແລະ ສະຫຼຸບຍຸດທະສາດ ແລະ ຂະບວນການຈັດຕັ້ງປະຕິບັດຕໍ່ໄປຂອງແຕ່ລະພາກສ່ວນ ພາຍໃຕ້ການມີສ່ວນຮ່ວມໃນການສົນທະນາແລກປ່ຽນຂອງແຕ່ລະພາກສ່ວນທີ່ເຂົ້າຮ່ວມຝຶກອົບຮົມໂດຍດໍາເນີນໄປຮອດວັນທີ 24 ກຸມພາ 2023.

แชร์