ສປປ ລາວ ສຸມໃສ່ແກ້ໄຂການຂາດໂພຊະນາການເພື່ອບັນລຸເປົ້າໝາຍການພັດທະນາແບບຍືນຍົງ

ກອງປະຊຸມແຫ່ງຊາດ ດ້ານໂພຊະນາການ ຄັ້ງທີ VIII ແລະ ກອງປະຊຸມຄະນະກຳມະການແຫ່ງຊາດ ດ້ານໂພຊະນາການ ປະຈຳປີ 2022 ໄຂຂຶ້ນ ໃນວັນທີ 21 ກຸມພາ 2023 ທີ່ນະຄອນຫຼວງວຽງຈັນ ໃນຫົວຂໍ້ "ໂພຊະນາການເພື່ອການພັດທະນາແບບຍືນຍົງ" ເພື່ອປຶກສາຫາລືເຖິງສິ່ງທ້າທາຍ ແລະທົບທວນຄືນເຖິງຄວາມກ້າວໜ້າໃນການແກ້ໄຂບັນຫາການຂາດໂພຊະນາການໃນ ສປປ ລາວ ແລະ ເອກະພາບແຜນບຸລິມະສິດສໍາລັບປີ 2023 ໂດຍການເປັນປະທານຂອງທ່ານ ກິແກ້ວ ໄຂ ຄໍາພິທູນ ຮອງນາຍົກລັດຖະມົນຕີ, ທັງເປັນປະທານຄະນະກໍາມະການໂພຊະນາການແຫ່ງຊາດ, ທ່ານ ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ, ທ່ານ ໄນແອນ ລີໂອນາດ ຮັກສາການເອກອັກຄະລັດຖະທູດສະຫະພາບເອີຣົບ ປະຈຳ ສປປ ລາວ ແລະທ່ານ ເພຍ ເຣເບລໂລ ບຣິດໂຕ ຕາງໜ້າອົງການອຸຍນີເຊບ.

ໂອກາກນີ້ທ່ານ ກິແກ້ວ ໄຂຄໍາພິທູນ ໄດ້ກ່າວວ່າ: ປີ 2030 ໄດ້ໃກ້ເຂົ້າມາແລ້ວ, ຊຶ່ງເປັນປີທີ່ພວກເຮົາໄດ້ວາງເປົ້າໝາຍໃຫ້ບັນລຸການພັດທະນາແບບຍືນຍົງ,ການປັບປຸງໂພຊະນາການເປັນໜຶ່ງໃນບຸລິມະສິດທີ່ ສປປ ລາວ ໄດ້ເອົາໃຈໃສ່ເປັນພິເສດເນື່ອງຈາກວ່າມີຜົນຕໍ່ຄວາມຢູ່ດີກິນດີ, ການເຕີບໂຕ,ພັດທະນາຂອງເດັກນ້ອຍ, ຊຸມຊົນ ແລະ ປະເທດຊາດ. ກອງປະຊຸມຄັ້ງນີ້ມີຄວາມໝາຍຄວາມສໍາຄັນຫລາຍທີ່ຈະຖືເອົາຄວາມສໍາເລັດດ້ານໂພຊະນາການ ໃນປີ 2022 ແລະ ຄິດກ້າວໄປຂ້າງໜ້າເພື່ອແກ້ໄຂການຂາດໂພຊະນາການຢູ່ ສປປ ລາວ ໃນປີ 2023 ແລະ ປີຕໍ່ໆໄປ.

ທ່ານ ດຣ ບຸນແຝງ ພູມມະໄລສິດ ໃຫ້ຮູ້ວ່າ: ສປປ ລາວ ໄດ້ຮັບຮອງແຜນປະຕິບັດງານແຫ່ງຊາດດ້ານໂພຊະນາການສະບັບໃໝ່ (NPAN 2021-2025) ທີ່ໄດ້ມີການເຜີຍແຜ່ໃນເດືອນ ພະຈິກ ປິ 2021, ປີ 2022 ເປັນປີທີ່ທໍາອິດຈັດຕັ້ງປະຕິບັດແຜນດັ່ງກ່າວ ແລະ ມີຄວາມຄືບໜ້າໃນການແກ້ໄຂບັນຫາທາງດ້ານໂພຊະນາການຢ່າງຮອບດ້ານ, ເຖິງຢ່າງໃດກໍຕາມການຂາດສານອາຫານກໍຍັງສືບຕໍ່ເປັນບັນຫາທີ່ສຳຄັນໃນການພັດທະນາເສດຖະກິດ-ສັງຄົມຂອງຊາດ. ການລົງທຶນໃສ່ດ້ານໂພຊະນາການໄດ້ເພີ່ມຂຶ້ນຊຶ່ງຈະເຮັດໜ້າທີ່ສໍາຄັນໃນການບັນລຸເປົ້າໝາຍຕ່າງໆ 2 ຕົວຊີ້ບອກ ທາງດ້ານໂພຊະນາການທີ່ສະພາຮັບຮອງເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ ສະໄໝທີ IX. ຄະນະກຳມະ ການແຫ່ງຊາດດ້ານໂພຊະນາການ, ກອງເລຂາຂັ້ນສູນກາງ ແລະທ້ອງຖິ່ນໃນ 17 ແຂວງ ແລະ 1 ນະຄອນຫລວງ, 148 ເມືອງ ໄດ້ມີການເຄື່ອນໄຫວຢ່າງເປັນປົກກະຕິ ແລະມີການປັບປຸງລາຍຊື່ຄະນະກຳມະການຄືນ, ແຕ່ລະຂະແໜງການໄດ້ປັບປຸງກົນໄກການປະສານງານລວມທັງຂໍ້ຕົກລົງຄະນະກຳມະການໂພຊະນາການຂັ້ນແຂວງ-ເມືອງ.

ສໍາລັບແຜນງານໜຶ່ງດຽວທີ່ມີສ່ວນຮ່ວມຫລາຍຂະແໜງການເພື່ອປັບປຸງໂພຊະນາການເຊິ່ງມີຫລາຍພາກສ່ວນຈັດຕັ້ງປະຕິບັດເປັນຕົ້ນແມ່ນໂຄງການຫລຸດຜ່ອນຄວາມທຸກຍາກ ແລະການຂາດສານອາຫານໃນເຂດຊົນນະບົດ (ກະຊວງກະສິກໍາ ແລະ ປ່າໄມ້), ໂຄງການເຂົ້າເຖິງການບໍລິການດ້ານສາທາລະນະສຸກ ແລະໂພຊະນາການ (ກະຊວງສາທາລະນະສຸກ), ໂຄງການຂະຫຍາຍການສະໜອງນໍ້າປະປາ, ສຸຂາພິບານ ແລະສຸຂານາໄມ (ກະຊວງໂຍທາທິການ ແລະຂົນສົ່ງ), ໂຄງການການສຶກສາກ່ອນໄວຮຽນ (ກະຊວງສຶກສາທິການ ແລະກິລາ), ແລະກອງທຶນຫລຸດຜ່ອນຄວາມທຸກຍາກ (ກະຊວງກະສິກໍາ ແລະປ່າໄມ້).
ຂປລ. ພາບ-ຂ່າວ: ມະນີທອນ, ຂັນໄຊ

แชร์