ລາວ-ຈີນ ສືບຕໍ່ຮ່ວມມືດ້ານວຽກງານການຄ້າ-ການສົ່ງອອກ

ໃນວັນທີ 20 ກຸມພາ 2023 ທີ່ກະຊວງອຸດສາຫະກຳ ແລະການຄ້ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະການຄ້າຕ້ອນຮັບຄະນະຜູ້ແທນ ສປ ຈີນ ຊຶ່ງນໍາໂດຍທ່ານ Li Chenyang ຫົວໜ້າພະແນກການຄ້າແຂວງຢູນນານພ້ອມດ້ວຍຄະນະເຂົ້າຮ່ວມປຶກສາຫາລືສືບຕໍ່ຮ່ວມມືດ້ານວຽກງານການຄ້າ-ການສົ່ງອອກ.

ຊຶ່ງຈຸດປະສົງ ເພື່ອປຶກສາຫາລື ແລະແລກປ່ຽນບົດຮຽນກ່ຽວກັບການຍົກລະດັບການຮ່ວມມືດ້ານການຄ້າສອງຝ່າຍເປັນຕົ້ນການຊຸກຍູ້ການສົ່ງອອກສິນຄ້າກະສິກຳຂອງ ລາວ ໄປ ສປ ຈີນ,ການເພີ່ມທະວີການຮ່ວມມືກ່ຽວກັບການຄ້າຂ້າມຊາຍແດນ ແລະການອຳນວຍຄວາມສະດວກໃນການຂົນສົ່ງສິນຄ້າຜ່ານແດນ, ການຮ່ວມມືສ່ວນໃຫຍ່ແມ່ນຮູບແບບການຄ້າຊາຍແດນ.

ໃນໂອກາດດັ່ງກ່າວ, ທ່ານ ມະໄລທອງ ກົມມະສິດ ໄດ້ສະແດງຄວາມຕ້ອນຮັບອັນອົບອຸ່ນຕໍ່ທ່ານ Li Chenyang ພ້ອມດ້ວຍຄະນະທີ່ໄດ້ມາຢ້ຽມຢາມແລະເຮັດວຽກຢູ່ ສປປ ລາວ ຊຶ່ງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບແລະການຮ່ວມມືອັນດີງາມທີ່ມີມາແລ້ວນັ້ນໃຫ້ນັບມື້ຂະຫຍາຍຕົວກ້າວເຂົ້າສູ່ລວງເລິກ, ໃນໂອກາດນີ້ ທ່ານ ມະໄລທອງ ກົມມະສິດ ຍັງໄດ້ສະແດງຄວາມຂອບໃຈຕໍ່ການຮ່ວມມື ແລະຊ່ວຍເຫຼືອຂອງລັດຖະບານ ສປ ຈີນ ທີ່ໄດ້ໃຫ້ການຊ່ວຍເຫຼືອ ສປປ ລາວ ມາໂດຍຕະຫຼອດຊຶ່ງເປັນການສະແດງເຖິງການເປັນຄູ່ຮ່ວມຊາຕາກໍາ ລາວ-ຈີນ.

ສິນຄ້າຫຼັກທີ່ ສປປ ລາວ ນໍາເຂົ້າໃນປີ 2022 ປະກອບມີ: ອຸປະກອນກົນຈັກ (ນອກຈາກເຄື່ອງກົນຈັກພາຫະນະ), ເຄື່ອງໃຊ້ໄຟຟ້າ ແລະ ອຸປະກອນໄຟຟ້າ, ຊິ້ນສ່ວນອາໄຫຼ່ລົດ, ເຫຼັກ ແລະເຫຼັກກ້າ ແລະ ອື່ນໆ. ສິນຄ້າຫຼັກທີ່ ສປປ ລາວ ສົ່ງອອກໃນປີ 2022 ປະກອບມີ: ຄຳປະສົມ, ຄຳແທ່ງ, ໝາກກ້ວຍ, ແຮ່ທອງແຮ່ເຫຼັກ, ຜະລິດຕະພັນໄມ້ແລະເຟີນີເຈີ້, ເຈ້ຍ ແລະເຄື່ອງທີ່ເຮັດດ້ວຍເຈ້ຍ, ຝຸ່ນ (ປຸ໋ຍ), ຢາງພາລາ, ໝາກໄມ້ (ໝາກໂມ, ໝາກນອດ, ໝາກຂາມ) ແລະອື່ນໆ.

ສປ ຈີນ ເປັນຄູ່ຄ້າອັນດັບ 2 ຂອງ ສປປ ລາວ ຊຶ່ງເຫັນໄດ້ໃນໄລຍະ 5 (2018-2022) ທີ່ຜ່ານມາມູນຄ່າການຄ້າສອງຝ່າຍສາມາດບັນລຸໄດ້ 15.9 ຕື້ໂດລາ,ສະເລ່ຍເພີ່ມຂຶ້ນ 15,63%/ປີ
ຂ່າວ:ກະຊວງ ຄອ,ພາບ:ແສງຈັນ

แชร์