ເຈົ້າໜ້າທີ່ພາສີພະແນກ ພສປ ຕິດຕາມ-ກວດກາລົດນໍາເຂົ້າບໍ່ຖືກຕ້ອງມາດຳເນີນຄະດີ

ໃນວັນທີ 15 ກຸມພາ ທີ່ຜ່ານມາ, ເຈົ້າໜ້າທີ່ພາສີພະແນກສືບສວນ-ສອບສວນ ແລະປາບປາມການລັກລອບໜີພາສີ (ພສປ) ປະຈໍາຈຸດປະສານງານນາເຕີຍ, ໄດ້ຮັບແຫຼ່ງຂ່າວຈາກພົນລະເມືອງດີວ່າ: ມີລົດລາກ 22 ລໍ້ບັນທຸກລົດຈົກ 2 ຄັນມາແຕ່ແຂວງບໍ່ແກ້ວແລ່ນມາຕາມເສັ້ນທາງເມືອງຫຼວງນ້າທາ-ເມືອງນາໝໍ້ ແຂວງອຸດົມໄຊ.

ເຈົ້າໜ້າທີ່ພາສີພະແນກ ພສປ, ຈຶ່ງໄດ້ອອກຕິດຕາມ ແລະກວດກາ, ຜ່ານການກວດກາເຫັນວ່າ: ບໍ່ມີເອກະສານອະນຸຍາດນຳເຂົ້າ, ເປັນລົດນໍາໃຊ້ບໍ່ຖືກເປົ້າໝາຍ, ບໍ່ມີເອກະສານເສຍພາສີ-ອາກອນ ແລະພັນທະອື່ນໆ. ດັ່ງນັ້ນ, ຈຶ່ງໄດ້ນໍາເອົາລົດທັງ 2 ຄັນມາມອບໃຫ້ພາສີປະຈຳແຂວງຫຼວງນໍ້າທາ, ເພື່ອດຳເນີນຂັ້ນຕອນຕາມກົດໝາຍ ແລະ ລະບຽບການຕໍ່ໄປ.

ສ່ວນໃນວັນທີ 18 ກຸມພາ 2023 ຜ່ານມານີ້, ເຈົ້າໜ້າທີ່ພາສີພະແນກສືບ-ສອບສວນ ແລະປາບປາມກາລັກລອບໜີພາສີ (ພສປ) ປະຈຳຈຸດປະສານງານນາເຕີຍ, ໄດ້ສົມທົບກັບເຈົ້າໜ້າທີ່ປະຈຳດ່ານພາສີສາກົນບໍ່ເຕັນ, ຕິດຕາມ ແລະກວດກາຕາມແຫຼ່ງຂ່າວລາຍງານວ່າ: ມີລົດຈິບຍີ່ຫໍ້ BENZ ສີດຳ ແລະລົດເກັງຍີ່ຫໍ້ CAMRY ສີດຳ (ບໍ່ຕິດປ້າຍທະບຽນ) ຈອດຢູ່ໃນເຂດເສດຖະກິດພິເສດບໍ່ເຕັນແດນງາມ, ຜ່ານການກວດກາເບື້ອງຕົ້ນເຫັນວ່າ: ເປັນລົດລັກລອບນຳເຂົ້າແບບບໍ່ຖືກຕ້ອງ, ບໍ່ມີເອກະສານອະນຸຍາດນຳເຂົ້າເສຍພາສີ-ອາກອນ.

ດັ່ງນັ້ນ, ຈຶ່ງໄດ້ນຳລົດທັງ 2 ຄັນມາມອບໃຫ້ພາສີປະຈຳແຂວງຫຼວງນໍ້າທາເພື່ອດໍາເນີນຂັ້ນຕອນຕາມກົດໝາຍ ແລະລະບຽບການຕໍ່ໄປ.
ຂ່າວ: ກະຊວງການເງິນ.

แชร์