ມະຫະກໍາບຸນຊ້າງ ຄັ້ງທີ 16 ປິດລົງຢ່າງເປັນທາງການ

ມະຫະກໍາບຸນຊ້າງ ຄັ້ງທີ 16 ປະຈໍາປີ 2023 ໄດ້ສໍາເລັດລົງຢ່າງເປັນທາງການໃນວັນທີ 20 ກຸມພາ 2023 ພາຍຫລັງທີ່ໄດ້ເປີດພິທີຢ່າງເປັນທາງການມາເປັນເວລາ 3 ວັນ ຢູ່ທີ່ເດີ່ນສະໜາມຫລວງ, ເຂົ້າຮ່ວມປິດງານມີ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ມີປະຊາຊົນບັນດາເຜົ່າເຂົ້າຮ່ວມ.

ທ່ານ ບຸນແທນ ທິແກ້ວ ເຈົ້າເມືອງໄຊຍະບູລີ ໄດ້ລາຍງານວ່າ: ມະຫະກໍາບຸນຊ້າງໄດ້ດໍາເນີນໄປດ້ວຍບັນຍາກາດເບີກບານມ່ວນຊື່ນ ແລະມີຫລາກຫລາຍກິດຈະກໍາທີ່ສະແດງເຖິງຮີດຮອງປະເພນີ, ວັດທະນະທໍາອັນດີງາມ ແລະ ວິຖີການດໍາລົງຊີວິດຂອງປະຊາຊົນບັນດາເຜົ່າຂອງແຂວງໄຊຍະບູລີ ທີ່ຕິດພັນກັບຊ້າງມາແຕ່ອະດີດຕະ ການ, ມີການຈັດວາງສະແດງສິນຄ້າຜົນຜະລິດທາງດ້ານກະສິກໍາ, ຫັດຖະກໍາ ແລະອຸດສາຫະກໍາປຸງແຕ່ງທີ່ເປັນທ່າແຮງ ແລະຜົນງານຂອງບັນດາ 11 ເມືອງພາຍໃນແຂວງ, ຫົວໜ່ວຍທຸລະກິດຂອງພາກລັດ, ເອກະຊົນທັງພາຍໃນ ແລະ ຕ່າງປະເທດ, ຕົວແທນຂອງຊາວບ້ານເຂົ້າຮ່ວມທັງໝົດ 289 ຮ້ານ ຊຶ່ງມີມູນຄ່າສິນຄ້າປະມານ 8 ກວ່າຕື້ກີບ, ໃນນັ້ນມາຈາກພາຍໃນຈໍານວນ 180 ຮ້ານ ແລະຕ່າງປະເທດ 89 ຮ້ານ, ມາຈາກເມືອງ 11 ເມືອງ, ພະແນກການ 5 ຮ້ານ, ຈາກຕ່າງແຂວງ 4 ຮ້ານໂດຍໄດ້ເປີດໃຫ້ທ່ຽວຊົມແຕ່ວັນທີ 13 ກຸມພາ 2023 ເປັນຕົ້ນມາ.

ສໍາລັບກິດຈະກໍາທີ່ສໍາຄັນໃນມະຫະກໍາບຸນຊ້າງຄັ້ງນີ້, ມີການສະແດງສິລະປະວັນນະຄະດີ ທັງໝົດ 24 ຄະນະຈໍານວນ 72 ລາຍການ, ໄດ້ຈັດພິທີຕັກບາດຖວາຍສັງຄະທານພະສົງ 19 ອົງ (ວັນທີ 17 ກຸມພາ 2023), ໄດ້ຈັດພິທີບາສີສູ່ຂວັນຊ້າງ, ມີຊ້າງເຂົ້າຮ່ວມທັງໝົດ 75 ໂຕ (ເຂົ້າຮ່ວມຂະບວນແຫ່ຊ້າງ 51 ໂຕ), ມີຂະບວນກ້ອນແຫ່ຂອງ 11 ເມືອງເຂົ້າຮ່ວມໃນພິທີ, ຊົມການສະແດງກິດຈະກໍາຂອງຊ້າງຄໍາຮູ້ລວມທັງໝົດມີ 38 ລາຍການ, ຊົມການສະແດງໂດດຈ້ອງຈາກກອງພັນທະຫານອາກາດກະຊວງປ້ອງກັນປະເທດ. ນອກຈາກນີ້ແຕ່ລະວັນຍັງໄດ້ເປີດໃຫ້ແຂກໄດ້ມາຊົມການສະແດງຂອງຊ້າງຄໍາຮູ້, ບໍລິການຂີ່ຊ້າງ, ທ່ຽວຊົມຕະຫລາດນັດວາງສະແດງສິນຄ້າຍາມຄໍ່າຄືນກໍໄດ້ຊົມການສະແດງສິລະປະວັນນະຄະດີຂອງເມືອງ, ບ້ານ ແລະຈາກປະເທດໃກ້ຄຽງ.

ຈາກນັ້ນທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ໄດ້ໃຫ້ກຽດກ່າວປິດມະຫະກໍາບຸນຊ້າງ ຄັ້ງທີ 16 ປະຈໍາປີ 2023 ຢ່າງເປັນທາງການ ແລະມອບລາງວັນໃຫ້ແກ່ຊ້າງງາມ, ລາງວັນພາບຸບເຟຊ້າງ ຕື່ມອີກ.

Cr: ຂ່າສານປະເທດລາວ

แชร์