ປະກາດແຕ່ງຕັ້ງຫົວໜ້າອົງການໄອຍະການປະຊາຊົນ ແຂວງສະຫວັນນະເຂດຜູ້ໃໝ່

ພິທີປະກາດແຕ່ງຕັ້ງທ່ານ ຄຳແດງ ຂັນຕະມາລາ ວ່າການຫົວໜ້າອົງການໄອຍະການປະຊາຊົນ ແຂວງສະຫວັນນະເຂດຂຶ້ນເປັນຫົວໜ້າອົງການໄອຍະການປະຊາຊົນ ແຂວງ ສະຫວັນນະເຂດ ຜູ້ໃໜ່ຕາມຕົກລົງຂອງ ທ່ານຫົວໜ້າອົງການໄອຍະການປະຊາຊົນສູງສຸດ ສະບັບເລກທີ 086/ອອປສ, ລົງວັນທີ 17/02/2023 ຈັດຂຶ້ນໃນວັນທີ 20 ກຸມພາຜ່ານມາໂດຍມີທ່ານ ຄໍາເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ ແລະທ່ານ ກົງແກ້ວ ມີວໍລະຈັກ ປະທານສະພາປະຊາຊົນແຂວງ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ຄຳນຸທອນ ສູນວິເລີດ ຮອງຫົວໜ້າກົມຈັດຕັ້ງ-ພະນັກງານ ອົງການໄອຍະການປະຊາຊົນສູງສຸດໄດ້ໃຫ້ຮູ້ວ່າ: ການປະກາດການຈັດຕັ້ງຄັ້ງນີ້, ແມ່ນຄວາມຮຽກຮ້ອງຕ້ອງການໜ້າທີ່ການເມືອງ ທັງສະເພາະໜ້າ ແລະ ຍາວນານ, ເປັນການກໍ່ສ້າງພະນັກງານ ໄປຕາມທິດນໍາຂອງພັກ, ເປັນການສ້າງຄວາມເຂັ້ມແຂງດ້ານການຈັດຕັ້ງອົງການໄອຍະການປະຊາຊົນຢູ່ທ້ອງຖິ່ນໃຫ້ມີຄວາມໜັກແໜ້ນ ແລະເຂັ້ມແຂງເພື່ອຮັບປະກັນການປະຕິບັດພາລະບົດບາດ, ສິດ ແລະໜ້າທີ່ຂອງອົງການໄອຍະການປະຊາຊົນໃນການຕິດຕາມກວດກາການເຄົາລົບ, ປະຕິບັດກົດໝາຍ ແລະສັ່ງຟ້ອງຜູ້ຖືກຫາຂຶ້ນສານຕາມກົດໝາຍຢ່າງສັກສິດ.

ໂອກາດນີ້, ທ່ານ ຄໍາເພັດ ສົມວໍລະຈິດ ໄດ້ເນັ້ນໃຫ້ຄະນະພັກ-ຄະນະນໍາ ອົງການໄອຍະການປະຊາຊົນແຂວງ, ເຂດໂດຍສະເພາະສະຫາຍທີ່ໄດ້ຮັບໜ້າທີ່ໃໝ່ໃຫ້ຍົກສູງບົດບາດການນຳພາຂອງພັກຕໍ່ວຽກງານໄອຍະການປະຊາຊົນ, ກຳແໜ້ນພາລະບົດບາດສິດ ແລະໜ້າທີ່ຂອງອົງການໄອຍະການປະຊາຊົນ, ຝຶກຝົນຫລໍ່ຫລອມຕົນເອງໃນທຸກດ້ານ, ປະຕິບັດໜ້າທີ່ວຽກງານຂອງຕົນດ້ວຍຄວາມຮັບຜິດ ຊອບ, ປະສານສົມທົບ ກັບອົງການຈັດຕັ້ງ, ສາຍຕັ້ງ ສາຍຂວາງ, ມີທັດສະນະມະຫາຊົນ, ມີຄວາມສາມັກຄີເປັນເອກະພາບພາຍໃນພັກ ແລະພາຍນອກເປັນຢ່າງດີ, ຮັກແພງພະນັກງານ, ເອົາໃຈໃສ່ວຽກງານພະນັກງານຂອງພັກ; ຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ,ຕິດຕາມກວດກາການດໍາເນີນຄະດີຢາເສບຕິດຢ່າງເຂັ້ມງວດ,ສ້າງກົນໄປການປະສານສົມທົບກັບອົງການຈັດຕັ້ງຕ່າງໆເພື່ອຮັບປະກັນການປະຕິບັດພາລະບົດບາດຂອງ ອົງການໄອຍະການປະຊາຊົນ; ເສີມຂະຫຍາຍຄວາມມີຫົວຄິດປະດິດສ້າງ, ຄວາມເປັນເຈົ້າການ, ເຮັດແທ້ທຳຈິງ, ເຮັດລ້ອນໜ້າທີ່ການເມືອງຂອງຕົນເປັນຢ່າງດີ; ສູ້ຊົນຈັດຕັ້ງປະຕິບັດແຜນການກໍ່ສ້າງ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕິດພັນກັບການຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ດ້ວຍຄໍາຂວັນ 3 ມີ 4 ຮັບປະກັນ ຂອງອົງການໄອຍະການປະຊາຊົນສູງສຸດວາງອອກ; ສ້າງອົງການໄອຍະການປະຊາຊົນໃຫ້ມີແບບແຜນເຂັ້ມງວດ, ກ້າວໜ້າ, ທັນສະໄໝ, ສົມເປັນເຄື່ອງມືຜະເດັດການກຳມະຊີບຂອງພັກຕາມທິດສັງຄົມນິຍົມ.

ໃນໂອກາດດຽວກັນນີ້, ທ່ານ ຄໍາເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດພ້ອມຄະນະຍັງໄດ້ເຂົ້າຢ້ຽມຂໍ່ານັບທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ເພື່ອລາຍງານຈຸດປະສົງໃນການລົງເຄື່ອນໄຫວວຽກງານຢູ່ແຂວງສະຫວັນນະເຂດໃນຄັ້ງນີ້.
ຂປລ. ຂ່າວ ອອປສ

แชร์