ບັນດາແຂວງ-ນະຄອນຫລວງ ໄດ້ຮັບລົດບັນທຸກຮັບໃຊ້ວຽກຕອບໂຕ້ໄພພິບັດສຸກເສີນ

ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະ ຊວງປ້ອງກັນປະເທດ, ປະທານຄະນະກຳມະການຄຸ້ມຄອງໄພພິບັດຂັ້ນສູນກາງ ພ້ອມຄະນະ ໄດ້ມອບລົດບັນທຸກ 6 ລໍ້ 18 ຄັນ ພ້ອມອາໄຫລ່ລົດບັນທຸກ 18 ຊຸດ ໃຫ້ບັນດາແຂວງ (ແຂວງລະ 1 ຄັນ) ແລະ ນະຄອນ ຫລວງວຽງຈັນ ເພື່ອຮັບໃຊ້ເຂົາໃນວຽກງານການຕອບໂຕ້ໄພພິບັດສຸກເສີນ, ເຊິ່ງພິທີມອບ-ຮັບ ໄດ້ຈັດຂຶ້ນ ໃນໂອກາດໄຂກອງປະຊຸມຄະນະກຳມະການຄຸ້ມຄອງໄພພິບັດທົ່ວປະເທດ ປະຈຳປີ 2022 ໃນວັນທີ 17 ກຸມພາຜ່ານມາ ທີ່ນະຄອນຫລວງວຽງຈັນ.

ໂອກາດນີ້ ທ່ານ ນາງ ວິມາລາ ຄູນທະລັງສີ ຫົວໜ້າພະແນກຄວບຄຸມ ແລະ ຟື້ນຟູຫລັງໄພພິບັດ, ກົມສັງຄົມສົງເຄາະ, ກອງເລຂາຄະນະກໍາມະການຄຸ້ມຄອງໄພພິບັດຂັ້ນສູນກາງ ໄດ້ໃຫ້ຮູ້ວ່າ: ລົດບັນທຸກທີ່ນຳມາມອບຄັ້ງນີ້ ພາຍໃຕ້ໂຄງການຊ່ວຍເຫລືອນອກໂຄງການ, ເປັນໂຄງການຊ່ວຍເຫລືອລ້າຈາກລັດຖະບານຍີ່ປຸ່ນ ເຊິ່ງໂຄງການດັ່ງກ່າວນີ້ ແມ່ນປະຕິບັດຕາມເອກະສານໂຄງການ ແລກປ່ຽນລະຫວ່າງລັດຖະບານ ສປປ ລາວ ແລະສະຖານທູດຍີ່ປຸ່ນ ປະຈຳ ສປປ ລາວ ສະບັບລົງວັນທີ 23 ທັນວາ 2019 ທີ່ໄດ້ມີການມອບໃຫ້ກະຊວງແຮງງານ ແລະສະຫວັດດີການສັງຄົມ ຕາງໜ້າລັດຖະບານ ລົງນາມຮັບເອົາການຊ່ວຍເຫລືອໂດຍກົມສັງຄົມສົງເຄາະໃນນາມຕາງໜ້າກະຊວງ ຮສສ ປະສານສົມທົບກັບ ບໍລິສັດ ຄາວຣ (Crown Agents) ເຊິ່ງເປັນບໍລິສັດທີ່ລັດຖະບານຍີ່ປຸ່ນມອບໝາຍໃຫ້ເປັນຜູ້ຕາງໜ້າລັດຖະບານຍີ່ປຸ່ນ ໃນການຈັດຊື້ ພາຫະນະ-ອຸປະກອນ ກຽມພ້ອມ ແລະ ຕອບໂຕ້ໄພພິບັດ ໃນມູນຄ່າ 1 ຕື້ເຢນ ນີ້ ຕາມແຜນເອກະພາບກັນແມ່ນໄດ້ຈັດຊື້ພາຫະນະ ແລະ ອຸປະກອນເຊັ່ນ: ລົດກະບະໂຟວິນ 20 ຄັນ ພ້ອມ ອາໄຫລ່ລົດກະບະ 20 ຊຸດ; ລົດບັນທຸກເຄື່ອງຊ່ວຍເຫຼືອ 6 ລໍ້ 18 ຄັນ ພ້ອມອາໄຫລ່ລົດບັນທຸກ 18 ຊຸດ ແມ່ນມອບໃຫ້ບັນດາແຂວງ ແລະ ນະຄອນຫລວງ; ລົດໂຮງໝໍ ໂຟວິນ (4WD Ambulance) 10 ຄັນ ພ້ອມອາໄຫລ່ລົດໂຮງໝໍ 6 ຊຸດ (ລົດນີ້ ແມ່ນຈະໄດ້ມອບໃຫ້ທາງກະຊວງສາທາ ແລະກະຊວງປ້ອງກັນປະເທດ).

ພ້ອມກັນນີ້, ຍັງມີລົດບັນທຸກຕິດເຄື່ອງຕອງນໍ້າ 3 ຄັນ, ພ້ອມ ອາໄຫລ່ສໍາຮອງ ເຄື່ອງຕອງນໍ້າ 2 ຊຸດ ແລະ ເຄື່ອງກອງນໍ້າແບບຄົວເຮືອນ 300 ອັນ, ພ້ອມ ໄສ້ຕອງນໍ້າສໍາຮອງ 600 ຊຸດ (ຈະໄດ້ມອບໃຫ້ກະຊວງສາທາລະນະສຸກ); ລົດໂຟກລິບ (Folk lift) 2 ຄັນ ພ້ອມອາໄຫລ່ 2 ຊຸດ; ເຕັ້ນຊຸມຊົນ 30 ດາງ ພ້ອມອາໄຫລ່ 30 ຊຸດ; ຜ້າບັດ 200 ອັນ; ເຕັ້ນຄອບຄົວ 300 ດາງ ພ້ອມອາໄຫລ່ເຕັ້ນ 300 ຊຸດ (ມອບປະຈໍາຢູ່ສາງຫລັກ 17 ຂອງກະຊວງ ຮສສ ); ເຮືອກູ້ໄພ 100 ລໍາ ພ້ອມອາໄຫລ່ 100 ຊຸດ; ຈັກຕິດທ້າຍເຮືອ 100 ຊຸດ ແລະ ລໍ້ລາກເຮືອ 52 ຄັນ (ມອບໃຫ້ກະຊວງປ້ອງກັນປະເທດ); ລົດຈັກ (Off- Road Motorcycle) 10 ຄັນ (ມອບກະຊວງແຮງງານ ແລະ ສະຫວັດດີການສັງຄົມ).

ບັນດາພາຫະນະ ແລະ ອຸປະກອນດັ່ງກ່າວ, ແມ່ນຢູ່ໃນຂະບວນ ຈັດຊື້ ແລະນໍາເຂົ້າຂອງລັດ ຖະບານຍີ່ປຸ່ນ, ມີພາຫະນະ ແລະອຸປະກອນບາງອັນແມ່ນໃນການສໍາເລັດນໍາເຂົ້າ ແລະມອບໃຫ້ພາກ ສ່ວນທີ່ກ່ຽວຂ້ອງແລ້ວ, ຄາດວ່າບັນດາພາຫະນະອຸປະກອນດັ່ງກ່າວນີ້ ຈະສໍາເລັດໃນການມອບພາຫະທັງໝົດໃນທ້າຍປີ 2023 ນີ້.
ຂປລ. ຂໍ້ມູນ: ກະຊວງ ຮສສ

แชร์