ຫ້ອງວ່າການສູນກາງພັກ ລາວ-ຫວຽດນາມ ຜັນຂະຫຍາຍຂໍ້ຕົກລົງຮ່ວມມືສອງຝ່າຍ 2021-2025

ໃນລະຫວ່າງວັນທີ 16-18 ກຸມພາ 2023 ຜ່ານມາ, ສະຫາຍ ທອງສະລິດ ມັງໜໍ່ເມກ ຄະນະເລຂາທິການສູນກາງພັກ, ຫົວໜ້າຫ້ອງວ່າການສູນກາງພັກປະຊາຊົນ ປະຕິວັດລາວ ພ້ອມຄະນະໄດ້ເດີນທາງໄປເຄື່ອນໄຫວຢ້ຽມຢາມ ແລະເຮັດວຽກຢູ່ຫ້ອງວ່າການສູນກາງພັກກອມມູນິດຫວຽດນາມທີ່ນະຄອນຫລວງຮ່າໂນ້ຍ, ສສ ຫວຽດນາມ.

ໃນລະຫວ່າງວັນທີ 16-18 ກຸມພາ 2023 ຜ່ານມາ, ສະຫາຍ ທອງສະລິດ ມັງໜໍ່ເມກ ຄະນະເລຂາທິການສູນກາງພັກ, ຫົວໜ້າຫ້ອງວ່າການສູນກາງພັກ ປະຊາຊົນ ປະຕິວັດລາວ ພ້ອມຄະນະ ໄດ້ເດີນທາງໄປ ເຄື່ອນໄຫວຢ້ຽມຢາມ ແລະ ເຮັດວຽກຢູ່ ຫ້ອງວ່າການສູນກາງພັກ ກອມມູນິດຫວຽດນາມ ທີ່ນະຄອນຫລວງຮ່າໂນ້ຍ, ສສ ຫວຽດນາມ ໂດຍມີສະຫາຍ ເລ ມິງ ຮຶງ ຄະນະເລຂາທິການສູນກາງພັກ, ຫົວໜ້າຫ້ອງວ່າການ ສູນກາງພັກກອມມູນິດຫວຽດນາມພ້ອມດ້ວຍຄະນະ ໃຫ້ກຽດຕ້ອນຮັບ.

ໃນພິທີພົບປະຢ່າງເປັນທາງການຫົວໜ້າຫ້ອງວ່າການສູນກາງພັກລາວ ແລະຫວຽດນາມໄດ້ແຈ້ງສະພາບການທີ່ພົ້ນເດັ່ນຂອງພັກ ແລະຂອງປະເທດຕົນກໍຄືສະພາບການລວມ ຂອງສອງຫ້ອງວ່າການ ສູນກາງພັກ ໂດຍຫຍໍ້ ແລະ ພ້ອມກັນປຶກສາຫາລື ແລກປ່ຽນບົດຮຽນ, ຕີລາຄາການຮ່ວມມື ຂອງສອງຫ້ອງວ່າການ ສູນກາງພັກ ໃນໄລຍະຜ່ານມາ ແນໃສ່ຍົກລະດັບ ຄຸນນະພາບ ຂອງການເປັນເສນາທິການ ຮັບໃຊ້ການນໍາຂອງສອງພັກ ໃຫ້ມີບາດກ້າວໃໝ່. ພ້ອມກັນນີ້, ຍັງໄດ້ມີການລົງນາມ ແຜນການຈັດຕັ້ງ ຜັນຂະຫຍາຍ ບົດບັນທຶກການຮ່ວມມື ສອງຫ້ອງວ່າການ ສູນກາງພັກ ໄລຍະ 2021-2025 ເພື່ອຫັນບົດບັນທຶກຮ່ວມມື ດັ່ງກ່າວເປັນແຜນງານ, ໂຄງການ ແລະມາດຕະການຈັດຕັ້ງປະຕິບັດຕົວຈິງ, ເປັນບ່ອນອີງໃຫ້ບັນດາກົມກອງທີ່ຂຶ້ນກັບຫ້ອງວ່າການສູນກາງພັກນຳໄປຈັດຕັ້ງ ແລະຜັນຂະຫຍາຍເຂົ້າໃນໜ້າທີ່ຂອງຕົນໃຫ້ເກີດປະໂຫຍດສູງສຸດ.

ໃນຕອນບ່າຍວັນດຽວກັນ, ຄະນະຜູ້ແທນຂອງ ຫ້ອງວ່າການສູນກາງພັກຍັງໄດ້ເຂົ້າຢ້ຽມຂໍ່ານັບ ສະຫາຍ ຫງຽນ ຟູ ຈ້ອງ ເລຂາທິການໃຫຍ່ພັກກອມມູນິດຫວຽດນາມ ເພື່ອລາຍງານຜົນສຳເລັດການພົບປະຂອງສອງຫ້ອງວ່າການສູນກາງພັກ ແລະຝາກຄຳຢ້ຽມຢາມຖາມຂ່າວ, ຄໍາອວຍພອນຂອງສະຫາຍ ທອງລຸນ ສີສຸລິດ ເລຂາທິການ ໃຫຍ່ພັກປະຊາຊົນ ປະຕິວັດລາວ ໃນໂອກາດທີ່ ສະຫາຍ ຫງຽນ ຟູ ຈ້ອງ, ໄດ້ຮັບຫລຽນກາລະນຶກ ສະມາຊິກພັກ ກອມມູນິດຫວຽດນາມ ຄົບຮອບ 55 ປີ. ໃນໂອກາດດັ່ງກ່າວ ສະຫາຍເລຂາທິການໃຫຍ່ ພັກກອມມູນິດຫວຽດນາມ ໄດ້ຊົມເຊີຍຜົນສຳເລັດ ໃນທຸກຂົງເຂດວຽກງານ ທີ່ ສປປ ລາວ ຍາດມາໄດ້ ພາຍຫລັງ 2 ປີກວ່າ ແຫ່ງການຈັດຕັ້ງ ປະຕິບັດມະຕິ ກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ ແລະ ໄດ້ຢືນຢັນວ່າ ພັກ, ລັດ ແລະ ປະຊາຊົນຫວຽດນາມ ຍາມໃດກໍຖືສຳຄັນ ສາຍພົວພັນພິເສດຜ່ອງໃສ, ທີ່ເປັນທັງສະຫາຍ ແລະເປັນທັງອ້າຍນ້ອງ, ອຸ້ມຊູຊ່ວຍເຫລືອເຊິ່ງກັນ ແລະກັນໃນການຈັດຕັ້ງປະຕິບັດພາລະກິດປ່ຽນແປງໃໝ່, ພາລະກິດປົກປັກຮັກສາ ແລະພັດທະນາສ້າງສາປະເທດຊາດ. ພ້ອມກັນນັ້ນ,ຍັງໄດ້ຕີລາຄາສູງຕໍ່ການພົວພັນຂອງສອງຫ້ອງວ່າການສູນກາງພັກໃນໄລຍະຜ່ານມາ ແລະ ເນັ້ນໜັກເຖິງພາລະບົດບາດ, ຄວາມສໍາຄັນຂອງວຽກງານຫ້ອງວ່າການໃນການເປັນເສນາທິການຄົ້ນຄວ້າຍຸດທະສາດຮັບໃຊ້ຄະນະບໍລິຫານງານສູນກາງພັກ, ກົມການເມືອງ, ຄະນະເລຂາທິການສູນກາງພັກ, ຜູ້ປະຈຳການຄະນະເລຂາ ແລະເລຂາທິການໃຫຍ່ ໃນການນໍາພາຊີ້ນໍາວຽກງານຂອງທົ່ວພັກ.

ໂອກາດນີ້, ຄະນະຜູ້ແທນຂອງຫ້ອງວ່າການສູນກາງພັກ ປະຊາຊົນປະຕິວັດລາວ ຍັງໄດ້ເຂົ້າຢ້ຽມຂໍ່ານັບ ສະຫາຍ ດິງ ຕຽນ ຢຸ໊ງ ກຳມະການກົມການເມືອງສູນກາງພັກກອມມູນິດ ຫວຽດນາມ, ເລຂາພັກນະຄອນຫລວງຮ່າໂນ້ຍ ແລະເຄື່ອນໄຫວຢ້ຽມຢາມພື້ນຖານການຜະລິດ ແລະເຂດພັດທະນາສະຖາບັນການສຶກສາຢູ່ນະຄອນຫລວງ ຮ່າໂນ້ຍ ກ່ອນຈະເດີນ ກັບປະເທດ.
Cr: ຂ່າວສານປະເທດລາວ

แชร์