ນະຄອນຫຼວງ ຄອງເຈົ້າຫຼຽນຄຳ ກິລາຍົກນໍ້າໜັກ ຊຽງຂວາງ ພາຣາເກມ 2023

ທັບນັກກິລາຍົກນໍ້າໜັກຄົນພິການ ນະຄອນຫຼວງວຽງຈັນ ກວາດ 5 ຫຼຽນຄຳ, 6 ຫຼຽນເງິນ ລວມ 11 ຫຼຽນ ຄອງເຈົ້າຫຼຽນຄຳ ໃນງານມະຫະກຳກິລາຄົນພິການແຫ່ງຊາດ ຄັ້ງທີ 3 ຫຼື ຊຽງຂວາງ ພາຣາ ເກມ 2023 ທີ່ແຂວງຊຽງຂວາງ ກາຍເປັນນັກກິລາຜູ້ທີ່ມີພອນສະຫວັນດີເດັ່ນ ກຽມຕາງໜ້າທີມຊາດລາວຮ່ວມອາຊຽນ ພາຣາເກມ ຄັ້ງ 12 ທີ່ຈະຈັດຂຶ້ນໃນເດືອນມິຖຸນາ 2023 ທີ່ປະເທດກໍາປູເຈຍ ເປັນເຈົ້າພາບ. ຂະນະທີ່ແຂວງຜົ້ງສາລີ ກໍສ້າງຜົນງານໂດດເດັ່ນເປັນຮອງແຊ໋ມເຈົ້າຫຼຽນຄໍາ ໃນກິລາປະເພດດັ່ງກ່າວຈາກຜົນງານຍາດໄດ້ 2 ຫຼຽນຄຳ, 2 ຫຼຽນເງິນ ແລະ 2 ຫຼຽນທອງ ລວມ 6 ຫຼຽນ.

ການແຂ່ງຂັນກິລາຍົກນໍ້າໜັກ ຊຽງຂວາງ ພາຣາ ເກມ 2023 ມື້ສຸດທ້າຍ ໄດ້ມີຂຶ້ນເມື່ອວັນທີ 15 ກຸມພາ ຜ່ານມາ ທີ່ພະແນກແຜນການ ແລະ ການລົງທຶນ ແຂວງຊຽງຂວາງ ຊຶ່ງມີການຊີງໄຊທັງໝົດ 6 ລາຍການ, ຊຶ່ງໃຫ້ກຽດເຂົ້າຮ່ວມ ແລະ ມອບຫຼຽນຕ່າງໆໂດຍທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ຫຼື ສສກ, ປະທານຄະນະກຳມະການພາຣາແລມປິກແຫ່ງຊາດລາວ ທັງເປັນຮອງປະທານຈັດງານ ຊຽງຂວາງ ພາຣາ ເກມ ແລະ ທ່ານ ບົວເງິນ ຫຸມໄຊຍະພົມ ຮອງເຈົ້າແຂວງຊຽງຂວາງ ທັງເປັນຮອງປະທານຈັດງານ ຊຽງຂວາງ ພາຣາ ເກມ, ມີບັນດາການນຳຂັ້ນແຂວງ ແລະ ທ້ອງຖິ່ນ ຕະຫຼອດຮອດຄະນະນຳ, ຄູຝຶກ, ນັກກິລາ ແລະ ມວນຊົນຊາວແຂວງດັ່ງກ່າວເຂົ້າຮ່ວມ.

ຜ່ານການແຂ່ງຂັນຜົນປະກົດວ່າ: ຮຸ່ນນໍ້າໜັກ 72 ກິໂລກຼາມ ທ້າວ ນ້ອຍ ສີໂສພາ ຈາກນະຄອນ ຫຼວງ ຍາດໄດ້ 2 ຫຼຽນຄຳ ຈາກຜົນການຍົກ 2 ຄັ້ງ ຈາກຄະແນນລວມ ແລະ ຄະແນນສູງສຸດ, ທ້າວ ສົງການ ດວງຫາວິໄລ ຈາກແຂວງໄຊສົມບູນ ໄດ້ 2 ຫຼຽນເງິນ ຈາກຄະແນນລວມ ແລະ ຄະແນນສູງສຸດ, ທ້າວ ສົມທອງ ຫຼ້າມະນີ ຈາກແຂວງຜົ້ງສາລີ ໄດ້ 2 ຫຼຽນທອງ ຈາກຄະແນນລວມ ແລະ ຄະແນນສູງສຸດ; ຮຸ່ນນໍ້າໜັກ 80 ກິໂລກຼາມ ທ້າວ ພຸດທະວົງ ສີສະແຫວງສຸກ ຈາກແຂວງຄໍາມ່ວນ ຍາດໄດ້ 2 ຫຼຽນຄຳ ຈາກຜົນການຍົກ 2 ຄັ້ງ ຈາກຄະແນນລວມ ແລະ ຄະແນນສູງສຸດ ແລະ ທ້າວ ຄຳສຸກ ໄຊ ຈາກແຂວງຜົ້ງສາລີ ໄດ້ 2 ຫຼຽນເງິນ ຈາກຄະແນນລວມ ແລະ ຄະແນນສູງສຸດ; ຮຸ່ນນໍ້າໜັກ 59 ກິໂລກຼາມ ທ້າວ ແນ໋ ຄຳຟອງ ຈາກແຂວງໄຊສົມບູນ ຍາດໄດ້ 1 ຫຼຽນຄຳ ຈາກຄະແນນສູງສຸດ ແລະ 1 ຫຼຽນເງິນ ຈາກຄະແນນລວມ, ທ້າວ ຄຳນ້ອຍ ບາດາກ ຈາກແຂວງເຊກອງ ຍາດໄດ້ 1 ຫຼຽນເງິນ ຈາກຄະແນນລວມ ແລະ ທ້າວ ຄຳເກັ່ງ ພົມມະວົງ ຈາກແຂວງສະຫວັນນະເຂດ ໄດ້ 1 ຫຼຽນທອງ ຈາກຄະແນນລວມ ແລະ ໃນຮຸ່ນດຽວກັນ ຫຼຽນຄຳ ຄະແນນສູງສຸດ ເປັນຂອງທ້າວ ຈັນທອມ ຈາກນະຄອນຫຼວງ ແລະ ຫຼຽນເງິນຄະແນນສູງສຸດ ແມ່ນທ້າວ ຄຳພິວ ທັນຍະສິດ ຈາກແຂວງຜົ້ງສາລີ. ສ່ວນຮຸ່ນນໍ້າໜັກ 65 ກິໂລກຼາມ ທ້າວ ສຸກ ທະວຽງ ຈາກແຂວງຜົ້ງສາລີ ຍາດໄດ້ 2 ຫຼຽນຄຳ ຈາກຜົນການຍົກ 2 ຄັ້ງ ຈາກຄະແນນລວມ ແລະ ຄະແນນສູງສຸດ, ທ້າວ ສຸດໃຈ ສາຍຕີ ຈາກນະຄອນຫຼວງ ໄດ້ 2 ຫຼຽນເງິນ ຈາກຄະແນນລວມ ແລະ ຄະແນນສູງສຸດ, ທ້າວ ສີ ຢ່າງ ຈາກແຂວງໄຊສົມບູນ ໄດ້ 2 ຫຼຽນທອງ ຈາກຄະແນນລວມ ແລະ ຄະແນນສູງສຸດ.

ການແຂ່ງຂັນກິລາຍົກນໍ້າໜັກ ຊຽງຂວາງ ພາຣາ ເກມ 2023 ຊຶ່ງມີການຊີງໄຊກັນທັງໝົດ 16ຫຼຽນຄຳ ມີນັກກິລາຈາກ 13 ແຂວງ ແລະ 1 ນະຄອນຫຼວງ, ມີນັກກິລາຊາຍ 44 ຄົນ ແລະ ນັກກິລາຍິງ 6 ຄົນ ອັນດັບທີ 1 ແມ່ນນະຄອນຫຼວງວຽງຈັນ ຄອງເຈົ້າຫຼຽນຄຳ ໂດຍສາມາດຍາດໄດ້ 5 ຫຼຽນຄຳ, 6 ຫຼຽນເງິນ; ອັນດັບທີ 2 ແຂວງຜົ້ງສາລີ ຍາດໄດ້ 2 ຫຼຽນຄຳ, 2 ຫຼຽນເງິນ ແລະ 2 ຫຼຽນທອງ, ອັນດັບທີ 3 ຮ່ວມ ແຂວງຄຳມ່ວນ ແລະ ແຂວງວຽງຈັນ ຍາດໄດ້ 2 ຫຼຽນຄຳ ແລະ 2 ຫຼຽນເງິນ ເທົ່າກັນ, ອັນດັບທີ 4 ແຂວງເຊກອງ 2 ຫຼຽນຄໍາ, 1 ຫຼຽນເງິນ ແລະ 1 ຫຼຽນທອງ ແລະອັນດັບທີ 5 ແຂວງບໍລິຄໍາໄຊ ຍາດໄດ້ 2 ຫຼຽນຄຳ ແລະ ແຂວງໄຊສົມບູນ 1 ຫຼຽນຄໍາ, 3 ຫຼຽນເງິນ ແລະ 2 ຫຼຽນທອງ.
ໂດຍ ສົງການ ພັນແພງດີ

แชร์