ມຸ່ງໝັ້ນສ້າງຄວາມເຊື່ອໝັ້ນ ແລະຄວາມສຸກ ສູ່ສັງຄົມ

   ພັກ-ລັດຖະບານ ແລະອົງການປົກຄອງທ້ອງຖິ່ນຍາມໃດກໍ່ໃຫ້ຄວາມສຳຄັນຕໍ່ການແກ້ໄຂຄວາມທຸກຍາກຂອງປະຊາຊົນ,ໂດຍຖືເປັນໜ້າທີ່ບູລິມະສິດອັນດັບຕົ້ນເພື່ອສ້າງເງື່ອນໄຂເຮັດໃຫ້ປະຊາຊົນມີຢູ່ມີກິນ, ຮັ່ງມີຜາສຸກ ແລະກ້າວໄປເຖິງການນໍາພາປະເທດຊາດຫຼຸດພົ້ນອອກຈາກຄວາມດ້ອຍພັດທະນາຕາມຄາດ ໝາຍທີ່ໄດ້ວາງໄວ້ດ້ວຍຫຼາຍວິທີການ,ໜຶ່ງໃນນັ້ນແມ່ນການຍາດແຍ່ງການລົງທຶນທັງພາຍໃນ ແລະຕ່າງປະເທດເວົ້າລວມ, ເວົ້າສະເພາະໂຄງການໄຟຟ້າຖ່ານ ຫີນຫົງສາມີມູນຄ່າການລົງທຶນເຖິງ 3.710 ລ້ານໂດລາສະຫະລັດ, ເປັນການລົງທຶນຮ່ວມ ກັນລະຫວ່າງລາວ-ໄທທີ່ຈົດທະບຽນຈັດຕັ້ງເປັນນິຕິ ບຸກຄົນຕາມກົດໝາຍ ແຫ່ງ ສປປ ລາວ ເມື່ອເດືອນ ກໍລະກົດ 2009 ໂດຍມີຜູ້ຖືຮຸ້ນ 3 ບໍລິສັດ ໄດ້ແກ່ລັດ ວິສາຫະກິດຖືຮຸ້ນລາວ 20%, ບໍລິສັດ ອາເອດຊ ອິນເຕີເນເຊີນແນວ (ສິງກະໂປ) ຄໍປໍເລເຊິນ ຈໍາກັດ 40% (ບໍລິສັດຍ່ອຍຂອງ ບໍລິສັດຜະລິດໄຟຟ້າ ຣາດຊະບູລີ ໂຮນດິ້ງ ຈໍາກັດ (ມະຫາຊົນ) ຖືຮຸ້ນ 40% ແລະບໍລິ ສັດ ບ້ານປູພາວເວີ ຈຳກັດ (ມະຫາຊົນ) ປະເທດ ໄທ ຖືຮຸ້ນ 40% ຊຶ່ງໄດ້ເລີ່ມການກໍ່ສ້າງໂຮງໄຟຟ້າ ພະລັງງານຄວາມຮ້ອນ ໂດຍໃຊ້ຖ່ານຫີນນຼິກໄນເປັນເຊື້ອໄຟ, ຕັ້ງຢູ່ເມືອງຫົງສາ ແຂວງໄຊຍະບູລີ ໃນປີ 2010 ແລະສຳເລັດໃນປີ 2015 ມີຂະໜາດກຳລັງການຜະລິດລວມ 1.878 ເມກາວັດ ແລະ ເປົ້າໝາຍຂອງການກໍ່ສ້າງໂຮງໄຟຟ້າແຫ່ງນີ້ແມ່ນເພື່ອຈຳໜ່າຍໄຟຟ້າໃຫ້ລັດວິສາຫະກິດໄຟຟ້າລາວ 100 ເມກາວັດ ແລະການໄຟຟ້າຝ່າຍຜະລິດແຫ່ງປະເທດໄທ 1.473 ເມກາວັດ, ມີໄລຍະສຳປະທານ 25 ປີ(2015-2041), ເຮັດໃຫ້ລັດຖະບານລາວມີລາຍຮັບຈາກໂຄງການດັ່ງກ່າວໂດຍທາງກົງຕະຫຼອດໄລຍະສຳປະທານ ແລະປະຊາຊົນບັນດາເຜົ່າ ກໍ່ຄືທ້ອງຖິ່ນ ເຂດບໍລິເວນໂຄງການ ກໍ່ໄດ້ຮັບຜົນປະ ໂຫຍດຈາກໂຄງການດັ່ງກ່າວເປັນຕົ້ນການຈັດສັນທີ່ດິນ ແລະທີ່ຢູ່ອາໃສ, ການສ້າງວຽກເຮັດງານທຳ,ມີແຫຼ່ງນໍ້າໃຊ້ຖາວອນສຳລັບການດຳລົງຊີວິດ ແລະປູກຝັງ-ລ້ຽງສັດ, ລະບົບໄຟຟ້າ, ເສັ້ນທາງ, ການສຶກສາ, ສາທາລະນະສຸກ, ສີມືແຮງງານ ແລະລາຍຮັບຂອງປະຊົນແມ່ນໄດ້ຮັບການປັບປຸງດີຂຶ້ນຢ່າງຈະແຈ້ງ.

  ທ່ານ ນາງ ດາວວິນ ລາດຊະກິດ ຮອງເຈົ້າເມືອງໆຫົງສາໄດ້ໃຫ້ຮູ້ວ່າ: ພາຍຫຼັງທີ່ລັດຖະບານ ແລະບໍລິສັດໄຟຟ້າຫົງສາຈໍາກັດໄດ້ລົງນາມເຊັນສັນຍາສໍາປະທານໂຄງການໂຮງໄຟຟ້າພະລັງງານຄວາມຮ້ອນຫົງສາຮ່ວມກັນໃນວັນທີ 30 ພະຈິກ 2009 ເປັນຕົ້ນມາ, ອົງການປົກຄອງເມືອງຫົງສາໄດ້ເອົາໃຈໃສ່ສົມທົບຢ່າງສະເໝີຕົ້ນສະເໝີປາຍກັບບໍລິສັດໄຟຟ້າຫົງສາຈໍາກັດ ແລະ ໜ່ວຍງານຍົກຍ້າຍຈັດສັນ-ຟື້ນຟູອາຊີບປະຊາຊົນຜູ້ທີ່ໄດ້ຮັບຜົນກະທົບຈາກການພັດທະນາໂຮງໄຟຟ້າຫົງສາພາຍໃຕ້ການນໍາພາຂອງຄະນະຊີ້ນໍາໂຄງການຂັ້ນສູນກາງ, ຂັ້ນແຂວງ ແລະຂັ້ນເມືອງ, ເຮັດໃຫ້ການຍົກຍ້າຍ ແລະຈັດສັນອາຊີບໃຫ້ປະຊາຊົນດຳ ເນີນໄປດ້ວຍດີຊຶ່ງເປັນອີກວຽກງານໜຶ່ງທີ່ສຳຄັນຍິ່ງຕ້ອງໄດ້ເອົາໃຈໃສ່ພິເສດໃນການພັດທະນາອາຊີບໃຫ້ກັບປະຊາຊົນທີ່ຖືກຍົກຍ້າຍໄປຢູ່ໝູ່ບ້ານຈັດສັນໃໝ່  ຈຳນວນ 450 ຄອບຄົວໃຫ້ມີລາຍໄດ້ພົ້ນຂີດຄວາມທຸກຍາກພາຍໃນ 3 ປີ ແລະມີລາຍຮັບເພີ່ມຂຶ້ນ150% ພາຍໃນ 10 ປີ ເລີ່ມແຕ່ສົກປີ 2012-2022. ໂດຍລັດຖະບານລາວໄດ້ກຳນົດໃຫ້ເສັ້ນທາງຫົງສາຫາໄຊຍະບູລີ ແລະ ຂຶ້ນທະບຽນຢ່າງເປັນທາງການໃສ່ຊື່ວ່າ: “ບ້ານນາແກ່ນຄຳ” ສຳເລັດໃນເດືອນກໍລະກົດ 2012 ແລະກຳນົດໃຫ້ບໍລິສັດຕ້ອງເບິ່ງແຍງ ແລະ ສະໜັບສະໜູນປະຊາຊົນທີ່ຖືກຍົກຍ້າຍເປັນຕົ້ນເງິນຊົດເຊີຍ; ພື້ນທີ່ຢູ່ອາໃສ 450 ຕາແມັດຕໍ່ຄອບຄົວ; ພື້ນທີ່ທຳການຜະລິດ 2 ເຮັກຕາຕໍ່ຄອບຄົວ; ສົ່ງເສີມ ແລະພັດທະນາອາຊີບທາງເລືອກຕ່າງໆເຊັ່ນ: ຫັດຖະກຳ, ປູກຝັງ ແລະລ້ຽງສັດພ້ອມທັງເຮັດວຽກໃນໂຄງການຢ່າງນ້ອຍ 1 ຕໍາແໜ່ງຕໍ່ຄອບຄົວຕະຫຼອດໄລຍະສໍາປະທານ. ນອກນັ້ນ, ຍັງໄດ້ກໍ່ສ້າງລະບົບສາທາລະນຸປະໂພກ, ສິ່ງອຳນວຍຄວາມສະດວກຕ່າງໆໃນເທສະບານເມືອງປະກອບສ່ວນທຶນໃນການສ້າງຖະໜົນຫົນທາງພາຍໃນເມືອງ ແລະເຊື່ອມຈອດກັບເມືອງອ້ອມຂ້າງ.

  ການພັດທະນາໂຄງການໄຟຟ້າຫົງສາ, ບໍລິສັດໄຟຟ້າຫົງສາ ຈຳກັດ ໄດ້ຖືສຳຄັນ ແລະເອົາໃຈໃສ່ຕໍ່ວຽກງານດ້ານເຕັກນິກເປັນຢ່າງຍິ່ງໂດຍສະເພາະການຈັດ ການ, ການວັດແທກຄຸນນະພາບການກໍ່ສ້າງ ແລະ ການຄຸ້ມຄອງສິ່ງແວດລ້ອມໂດຍມີການພັດທະນາ ແລະ ນຳໃຊ້ລະບົບເຕັກນິກທີ່ທັນສະໄໝ ແລະ ໄດ້ມາ ດຕະຖານສາກົນເພື່ອຮັບປະກັນແກ່ການຜະລິດກະແສໄຟຟ້າທັງດ້ານປະລິມານ ແລະຄຸນນະພາບ, ມີຄວາມປອດໄພໃນຕະຫຼອດໄລຍະສຳປະທານລວມທັງການພັດທະນາຄຸນນະພາບຊີວິດຂອງຊຸມຊົນອ້ອມຂ້າງໂຮງໄຟຟ້າໃຫ້ເຕີບໃຫຍ່ໄປພ້ອມໆກັນຈິ່ງເປັນທີ່ມາຂອງການນຳໃຊ້ລະບົບການບໍລິຫານຈັດການດ້ານຄວາມປອດໄພ, ສຸຂະພາບ, ສຸຂະອະນາໄມ ແລະສິ່ງແວດລ້ອມພ້ອມດ້ວຍການຜະລິດທີ່ເປັນມິດກັບສິ່ງແວດລ້ອມເຂົ້າມານຳໃຊ້ກັບທຸກຂັ້ນຕອນຂອງຂະບວນການຜະລິດໄຟຟ້າ ແລະການປະຕິບັດວຽກງານໂດຍໄດ້ສຶກສາປະເມີນຜົນກະທົບຕໍ່ສິ່ງແວດລ້ອມ EIA ແລະພັດທະນາການບໍລິຫານສິ່ງແວດລ້ອມ EMP ຢ່າງຮອບດ້ານດ້ວຍການນຳໃຊ້ເຕັກໂນໂລຊີຖ່ານຫີນສະອາດມາໃຊ້ໃນໂຮງໄຟຟ້າ,ລະບົບເຜົາໄໝ້ຢ່າງມີປະສິດທິພາບ,ເຕັກໂນໂລຊີດັກຈັບມວນສານ ແລະຄວບຄຸມ ຝຸ່ນ; ລະບົບບຳບັດນໍ້າເສຍທີ່ໄດ້ມາດຕະຖານຈົນກ້າວສູ່ຄວາມຍືນຍົງດ້ວຍມາດຕະຖານ ISO 10041:2015 ໃນວັນທີ 2 ມີນາ 2019 ທີ່ນະຄອນຫຼວງວຽງຈັນ.

  ທ່ານຄະທາຢຸດ ຊູພູນ ຜູ້ອຳນວຍການໃຫຍ່ບໍລິສັດໄຟຟ້າຫົງສາຈຳກັດ ໄດ້ມີຄຳເຫັນວ່າ: ISO 14001:2015 ແມ່ນມາດຕະຖານການຈັດການສິ່ງແວດ ລ້ອມທີ່ເປັນສາກົນ ແລະທົ່ວໂລກໃຫ້ການຍອມຮັບຊຶ່ງປະກອບດ້ວຍການຈັດການສິ່ງແວດລ້ອມທີ່ມີປະສິດທິພາບ ແລະເປັນຫົວໃຈຂອງການດຳເນີນເພື່ອໃຫ້ໄດ້ຜົນສຳເລັດທີ່ຍືນຍົງ ແລະ ເຮັດໃຫ້ການຈັດການດ້ານສິ່ງແວດລ້ອມດຳເນີນໄປຢ່າງເປັນລະບົບ ແລະ ສອດຄ່ອງກັບລະບຽບກົດໝາຍ, ໃນເມື່ອໄດ້ຮັບການຢັ້ງຢືນມາດຕະຖານສາກົນດັ່ງກ່າວນີ້ແລ້ວບໍລິສັດກໍ່ຈະອອກແຮງສືບຕໍ່ພັດທະນາລະບົບໂຄງຮ່າງການຈັດການດ້ານຕໍ່ສິ່ງແວດລ້ອມໃຫ້ມີຄວາມຍືນຍົງ, ສາ ມາດຮັກສາມາດຕະ ຖານ ISO 14001: 2015 ໄວ້ໄດ້ຍືນຍົງ; ຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໂຄງການໄດ້ມີຊີ ວິດການເປັນຢູ່ດີຂຶ້ນ; ຊ່ວຍສ້າງວຽກເຮັດງານທຳ ແລະອອກແຮງສົ່ງເສີມການສຶກສາຂອງເຂົາເຈົ້າໃຫ້ດີຂຶ້ນ ແລະມີສ່ວນຮ່ວມໄດ້ຮັບຜົນປະໂຫຍດທີ່ແທ້ຈິງພ້ອມທັງເອົາໃຈໃສ່ຕໍ່ແຮງງານທີ່ເຮັດວຽກຢູ່ບໍລິສັດໃຫ້ຖືກຕ້ອງຕາມກົດໝາຍ, ຕາມຂໍ້ກຳນົດສັນຍາ, ທຸກຄົນໄດ້ຮັບສະຫວັດດີການສັງຄົມ; ຊ່ວຍຝຶກອົບຮົມພັດທະນາສີມືແຮງງານເພື່ອຮັບປະກັນຄວາມປອດໄພ ແລະນຳເອົາຜົນປະໂຫຍດທີ່ໄດ້ຮັບຈາກໂຄງການໄຟຟ້າມາປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດຊາດໃຫ້ມີຄວາມຈະເລີນສີວິໄລຂຶ້ນເປັນກ້າວໆ.

  ສັງລວມແລ້ວ, ນັ້ນແມ່ນການປະຕິບັດຕາມພັນທະກິດຈະກຳຫຼັກຂອງບໍລິສັດ ໄຟຟ້າຫົງສາ ຈຳກັດ, ຊຶ່ງບໍ່ພຽງແຕ່ເປັນຜູ້ດຳເນີນທຸລະກິດດ້ານພະລັງງານໄຟຟ້າເທົ່ານັ້ນ, ແຕ່ຍັງມຸ່ງເນັ້ນການດຳເນີນທຸລະກິດຄຽງຄູ່ກັບການພັດທະນາສັງຄົມ, ເບິ່ງແຍງດ້ານສິ່ງແວດລ້ອມ ແລະເອົາໃຈໃສ່ຕໍ່ວຽກງານທີ່ຕິດພັນກັບການພັດທະນາໂຄງການຢ່າງຮອບດ້ານເພື່ອກ້າວສູ່ຄວາມຍືນຍົງດັ່ງທີ່ລະບຸໄວ້ໃນວິໃສທັດຂອງບໍລິສັດຄື: “ການເປັນໂຮງໄຟຟ້າປາກບໍ່ແຮ່ນຳໜ້າໃນອາຊຽນ ໂດຍການເຮັດວຽກທີ່ເປັນເລີດສ້າງຄວາມເຊື່ອໝັ້ນ ແລະຄວາມສຸກສູ່ສັງຄົມ” ໃຫ້ປາກົດຜົນເປັນຈິງ.

ຂ່າວ: ນສພ ເສດຖະກິດ-ສັງຄົມ

แชร์