ຮອງລັດຖະມົນຕີກະຊວງການເງິນ ຕ້ອນຮັບຄະນະກຳມາທິການເອີຣົບ

ເມື່ອບໍ່ດົນມານີ້, ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນໄດ້ຕ້ອນຮັບທ່ານ ມາຣິໂອ ຣອນໂຄນີ ຫົວໜ້າຄະນະຮັບຜິດຊອບອາຊີໃຕ້ ແລະອາຊີຕາເວັນອອກສ່ຽງໃຕ້, ຫົວໜ້າກົມຮ່ວມມືສາກົນ (INTPA) ຂອງຄະນະກຳມາທິການເອີຣົບ ປະຈຳຢູ່ສຳນັກງານໃຫຍ່ ທີ່ບຣຸກແຊນ ປະເທດແບນຊິກ ພ້ອມຄະນະໃນໂອກາດມາເຄື່ອນໄຫວວຽກງານຢູ່ ສປປ ລາວ.

ເມື່ອບໍ່ດົນມານີ້, ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ ໄດ້ຕ້ອນຮັບທ່ານ ມາຣິໂອ ຣອນໂຄນີ ຫົວໜ້າຄະນະຮັບຜິດຊອບອາຊີໃຕ້ ແລະອາຊີຕາເວັນອອກສ່ຽງໃຕ້, ຫົວໜ້າກົມຮ່ວມມືສາກົນ (INTPA) ຂອງຄະນະກຳມາທິການເອີຣົບ ປະຈຳຢູ່ສຳນັກງານໃຫຍ່ ທີ່ບຣຸກແຊນ ປະເທດແບນຊິກ ພ້ອມຄະນະໃນໂອກາດມາເຄື່ອນໄຫວວຽກງານຢູ່ ສປປ ລາວ.

ໂອກາດນີ້, ທ່ານຮອງລັດຖະມົນຕີ ກະຊວງການເງິນ ແລະທ່ານ ມາຣິໂອ ຣອນໂຄນີ ໄດ້ແລກປ່ຽນຄຳຄິດເຫັນຕໍ່ຍຸດທະສາດການຮ່ວມມື ລະຫວ່າງ ສປປ ລາວ ແລະ ສະ ຫະພາບເອີຣົບ ໂດຍສະເພາະ ແມ່ນໂຄງການຮ່ວມມື ເພື່ອສະໜັບສະໜູນການປະຕິຮູບການຄຸ້ມຄອງການເງິນພາກລັດ ລວມມູນຄ່າລວມ 11.412.723 ເອີໂຣ. ໃນນັ້ນ, EUປະກອບສ່ວນ 5 ລ້ານເອີໂຣ,ກະຊວງການຕ່າງປະເທດ ແລະການຄ້າອົດສະຕຣາລີ ປະກອບສ່ວນ 10 ລ້ານໂດລາ ອົດສະຕຣາລີ (ປະມານ 6.412.723 ເອີໂຣ) ຮ່ວມຈັດຕັ້ງປະຕິບັດໂດຍທະນາຄານໂລກ.

ໂຄງການດັ່ງກ່າວ ເປັນໜຶ່ງໃນ 5 ໂຄງການພາຍໃຕ້ແຜນງານ ຊ່ວຍເຫລືອລ້າໄລຍະຍາວຂອງ ສະຫະພາບເອີຣົບ 2021-2027, ພ້ອມທັງຕິດຕາມ ແລະປຶກສາຫາລືກ່ຽວກັບ ຄວາມຄືບໜ້າຂອງ ການຈັດຕັ້ງປະຕິບັດ ແຜນງານດຸ່ນງົບປະມານ ມະຫາພາກຈາກສະຫະ ພາບເອີຣົບ (EUBudget Support)ປີ 2018-2022) ກໍຄືການເບີກຖອນບ້ວງເງິນຈໍານວນ 22,8 ລ້ານເອີໂຣ ເພື່ອສະໜັບສະໜູນວຽກງານຂະແໜງສຶກສາ ແລະແຜນງານໂພຊະນາການຢູ່ ສປປ ລາວ.

ໃນຕອນທ້າຍ, ທ່ານຮອງລັດຖະມົນຕີກະຊວງການເງິນ ຍັງໄດ້ສະແດງຄວາມຂອບໃຈມາຍັງສະຫະພາບເອີຣົບ ທີ່ໃຫ້ການສະໜັບສະໜູນໃຫ້ແກ່ ສປປ ລາວ ຕະຫລອດມາ,ພ້ອມນັ້ນ,ກະຊວງການເງິນຈະສືບຕໍ່ຮ່ວມມືຢ່າງໃກ້ຊິດກັບສະຫະພາບເອີຣົບແລະບັນດາປະເທດສະມາຊິກໃນຕໍ່ໜ້າໂດຍສະເພາະຕິດພັນກັບການສ້າງຊັບພະຍາກອນມະນຸດ ໃຫ້ມີຄຸນນະພາບ, ການຍົກລະດັບຄຸນນະພາບ ຂອງສິນຄ້າກະສິກຳລາວ ໃຫ້ເປັນສິນຄ້າສົ່ງອອກ ແລະ ສຳຄັນແມ່ນວຽກງານການປະຕິຮູບ ການຄຸ້ມຄອງການເງິນພາກລັດ ທີ່ເປັນໜຶ່ງໃນປັດໄຈສຳຄັນເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ.
ຂ່າວ-ພາບ: ກະຊວງການເງິນ.

แชร์