ມີຫຼາຍກວ່າ 130 ຫົວຫນ່ວຍທຸລະກິດຮ່ວມງານຜະລິດຕະພັນລາວ

ໃນຕອນບ່າຍວັນທີ 15 ກຸມພາ 2023 ທີ່ສູນການຄ້າລາວ-ໄອເຕັກ ໄດ້ຈັດພິທີເປີດງານວາງສະແດງຜະລິດຕະພັນລາວ ປະຈໍາປີ 2023. ໂດຍໃຫ້ກຽດເຂົ້າຮ່ວມເປີດງານໂດຍທ່ານສອນໄຊສີພັນດອນ, ນາຍົກລັດຖະມົນຕີແຫ່ງ ສປປ ລາວ, ທ່ານວິໄລວົງບຸດດາຄຳເຈົ້າແຂວງຈຳປາສັກ, ທ່ານມະໄລທອງກົມມະສິດລັດຖະມົນຕີກະຊວງອຸດສາຫະກໍາແລະການຄ້າ, ທ່ານນາງຈັນທະຈອນວົງໄຊ ຮອງປະທານສະພາການຄ້າແລະອຸດສາຫະກໍາແຫ່ງຊາດລາວ, ທ່ານນາງບູນເຮືອງແຄລໍລິດດັງປະທານສະພາການຄ້າແລະອຸດສາຫະກໍາແຂວງຈຳປາສັກ ພ້ອມດ້ວຍບັນດາທ່ານຕາງໜ້າຈາກພາກລັດຖະບານ, ອົງການຈັດຕັ້ງສາກົນ ແລະພາກທຸລະກິດເຂົ້າຮ່ວມ.

ທ່ານ ນາງ ຈັນທະຈອນ ວົງໄຊ ຮອງປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ຜູ້ຊີວຽກງານດັ່ງກ່າວໄດ້ຂື້ນລາຍງານການຈັດກຽມງານ ຈັດວາງສະແດງຜະລິດຕະພັນລາວ ປະຈໍາປີ 2023 (Made in Laos 2023 ) ໂດຍການຈັດຮ່ວມກັບສະພາການຄ້າ ແລະອຸດສາຫະກໍາ ແຂວງຈໍາປາສັກ ແລະ ສຄອ ແຂວງທົ່ວປະເທດຈັດຂຶ້ນໃນລະຫວ່າງວັນທີ 10–19 ກຸມພາ 2023 ທີ່ສູນການຄ້າລາວ-ໄອເຕັກ, ງານວາງສະແດງຜະລິດຕະພັນລາວໄດ້ຈັດຂື້ນຄັ້ງທຳອິດ ໃນປີ 2011 ຈົນເຖິງປັດຈຸບັນ ເຊິ່ງແຕ່ລະປີຈະມີສະພາການຄ້າ ແລະອຸດສາຫະກໍາແຂວງເປັນເຈົ້າພາບຮ່ວມ ແລະປີນີ້ແມ່ນ ສຄອ ແຂວງຈຳປາສັກ ເປັນເຈົ້າພາບຮ່ວມຫຼັກໃນການຈັດງານ, ເຊິ່ງ ສຄອ ແຂວງຈຳປາສັກ ຈະໄດ້ມີການອອກແບບຕົບແຕ່ງ Booth pavilion ເປັນພິເສດ ແລະສວຍງາມເພື່ອສື່ໃຫ້ເຫັນວິທີຊີວິດການເປັນຢູ່, ຮີດຄອງປະເພນີ, ວັດທະນະທຳທີ່ສວຍງາມ ແລະບັນດາແຫລ່ງທ່ອງທ່ຽວຕ່າງໆ ທາງດ້ານວັດທະນະທຳ ແລະທຳມະຊາດ ທີ່ຕິດພັນກັບການດຳລົງຊີວິດ ຂອງຊາວ ແຂວງຈຳປາສັກ ນອກຈາກນັ້ນຍັງໄດ້ເຫັນເຖິງການຂະຫຍາຍຕົວທາງດ້ານເສດຖະກິດ ບໍ່ວ່າຈະເປັນເຂດເສດຖະກິດພິເສດ ແລະສະຖານທີ່ທ່ອງທ່ຽວທາງວັດະທານໍາ, ທຳມະຊາດທີ່ສວຍງາມ ແລະສິນຄ້າອື່ນໆ ທີ່ເປັນທ່າແຮງຂອງແຂວງຈຳປາສັກ.

ງານວາງສະແດງໃນຄັ້ງນີ້ໄດ້ຮັບການສະໜັບສະໜູນຫຼັກຈາກຄູ່ຮ່ວມຍຸດທະສາດຈາກ 2 ບໍລິສັດຄື: ບໍລິສັດ ປີໂຕຣລ້ຽມເທຣດດີງລາວ ມະຫາຊົນ ແລະ ບໍລິສັດ ເບຍລາວ, ນອກຈາກນັ້ນກໍ່ມີບັນດາບໍລິສັດ ແລະ ໂຄງການ ທີ່ໃຫ້ການສະໜັບສະໜູນ ງານອີກດ້ວຍ, ຈຸດປະສົງຫຼັກໃນການຈັດງານ ເພື່ອຊຸກຍູ້ສົ່ງເສີມໃຫ້ຄົນລາວຫັນມານໍາໃຊ້ຜະລິດຕະພັນລາວໃຫ້ຫຼາຍຂື້ນ ພ້ອມດຽວກັນນັ້ນກໍ່ເປັນການປຸກລະດົມຂົນຂວາຍເພີ່ມທະວີການຜະລິດໃນລະດັບຄອບຄົວໃຫ້ກາຍເປັນສິນຄ້າ ທີ່ສາມາດສ້າງລາຍຮັບໃຫ້ແກ່ຄອບຄົວໄດ້, ອີກທັງເພື່ອສົ່ງເສີມການຜະລິດຂະໜາດນ້ອຍ ໃຫ້ກ້າວສູ່ຂະໜາດກາງແລະ ໃຫ້ກາຍເປັນຂະໜາດໃຫ່ຍ ໃຫ້ກາຍເປັນອຸດສາຫະກຳການຜະລິດທາງດ້ານປະລິມານແລະຄຸນນະພາບທີ່ໄດ້ມາດຕະຖານ ທີ່ພຽບພ້ອມແຂ່ງຂັນຈຳໜ່າຍຕະຫລາດພາຍໃນແລະສົ່ງອອກສູ່ສາກົນໄດ້. ພ້ອມດຽວກັນນີ້,ການຈັດງານໃນຄັ້ງນີ້ ຍັງຈະເປັນການເປີດໂອກາດໃຫ້ບັນດາຫົວໜ່ວຍທຸລະກິດທີ່ກຳລັງຊອກຫາຄູ່ຄ້າໃໝ່ໆ ແລະ ຕ້ອງການເປີດຕົວສິນຄ້າ ແລະ ບໍລິການໃໝ່ໆຂອງບໍລິສັດ ໃຫ້ບັນດາແຂກທີ່ມາຊົມງານທັງພາຍໃນ ແລະ ສາກົນໄດ້ຮັບຊາບ, ອີກທັງຍັງເປັນການແລກປ່ຽນຄວາມຮູ້, ເຕັກນີກດ້ານວິຊາການ, ວິທີການຜະລິດ ເພື່ອນຳມາພັດທະນາການຜະລິດສິນຄ້າຂອງຕົນ. ພ້ອມທັງເປັນການໂຄສະນາຄວາມອຸດົມສົມບູນທາງດ້ານຮີດຄອງປະເພນີ-ວັດທະນະທຳ, ການຄ້າ-ການລົງທືນ, ສະຖານທີ່ທ່ອງທ່ຽວ ແລະ ອື່ນໆ ທີ່ເປັນເອກະລັກຂອງແຂວງທີ່ເປັນເຈົ້າພາບຮ່ວມຈັດງານຕະຫຼອດເຖີງທຸກແຂວງທີ່ເຂົ້າຮ່ວມງານໃນຄັ້ງນີ້ອີກດ້ວຍ.

ງານວາງສະແດງໃນຄັ້ງນີ້ມີຫຼາກຫຼາຍຜະລິດຕະພັນ, ທີ່ຜະລິດ ແລະປະກອບຢູ່ ສປປ ລາວ, ເຂົ້າຮ່ວມຫຼາຍກ່ວາ 200 ຫ້ອງວາງສະແດງຈາກຫລາຍກ່ວາ 130 ຜູ້ປະກອບການ ແລະ ຫົວໜ່ວຍທຸລະກິດ, ແລະ ມີຫຼາກຫຼາຍຂະແໜງການເຊັ່ນ: ຂະແໜງຜະລິດຕະພັນສິນຄ້າໜື່ງເມືອງໜືງຜະລິດຕະພັນ (ໂອດັອບ), ຂະແໜງຜະລິດຕະພັນເມດອີນລາວ, ຂະແໜງຜະລິດຕະພັນຫັດຖະກຳ, ຂະແໜງຜະລິດຕະພັນອາຫານແລະເຄື່ອງດື່ມ, ຂະແໜງຜະລິດຕະພັນອຸດສາຫະກໍາ, ຂະແໜງຜະລິດຕະພັນໄອທີ, ຂົນສົ່ງ, ທະນາຄານແລະການບໍລິການ,ຂະແໜງຜະລິດຕະພັນລາວຫັດຖະກຳໄມ້ປ່ອງ,ຂະແຫນງຜະລິດຕະພັນເຟິນິເຈີ, ຂະແໜງຜະລິດຕະພັນກະສິກໍາ

ພິເສດ ປີນີ້ບັນດາທ່ານ ຍັງຈະໄດ້ພົບກັບສິນຄ້າຫລາກຫລາຍຈາກ 3 ປະເທດ ສປ ຈີນ, ລາຊາອານາຈັກໄທ ແລະ ສສ ຫວຽດນາມເຊີ່ງປີນີເປັນປີທຳອິດທີ່ ສຄອຊ ໄດ້ເຊີນນັກລົງທືນ 3 ປະເທດ ເຂົ້າຮ່ວມງານໃນຄັ້ງນີ້.

ນອກຈາກນີ້,ພາຍໃນງານມີຫຼາກຫລາຍກິດຈະກໍາເຊັ່ນ : ການວາງສະແດງສິນຄ້າ, ງານປະຊຸມສຳມະນາຕ່າງໆ ໃຫ້ຄວາມຮູ້, ງານພົບປະທຸລະກິດ, ກິດຈະກຳແຈກຂອງລາງວັນ ແລະ ກິດຈະກຳບັນເທີງອື່ນໆ ຕະຫລອດໄລຍະການຈັດງານ.

แชร์