ເຊໂປນ ເປີດນໍາໃຊ້ຄືນ 4 ດ່ານປະເພນີ

ພິທີເປີດການນໍາໃຊ້ຄືນ 4 ດ່ານປະເພນີຄື: ດ່ານຈຸດສຸມລະໂກ, ດ່ານຕະຫຼຸງ, ດ່ານບ້ານແຈງ ແລະດ່ານບ້ານໃໝ່ວັງເລິກ ຂຶ້ນເມື່ອບໍ່ດົນມານີ້ທີ່ດ່ານບ້ານໃໝ່ວັງເລິກ ທີ່ຂຶ້ນກັບຈຸດສຸມລະໂກ ເມືອງເຊໂປນ ແຂວງສະຫວັນນະເຂດ. ໂດຍເປັນກຽດເຂົ້າຮ່ວມຂອງທ່ານ ວົງສະຫວັນ ວຽງມະນີ ເຈົ້າເມືອງໆເຊໂປນ, ມີຄະນະປະຈໍາພັກເມືອງ, ແຂກຖືກເຊີນຈາກເມືອງເຮື່ອງຮວາ ແຂວງກວາງຈິ ສສ ຫວຽດນາມ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ວົງສະຫວັນ ວຽງມະນີ ກ່າວວ່າ: ການຮ່ວມມືດ້ານຕ່າງໆລະຫວ່າງເມືອງເຊໂປນກັບເມືອງເຮື່ອງຮວາ ແຂວງກວາງຈິ ສສ ຫວຽດນາມ ໄດ້ມີການແລກປ່ຽນຂໍ້ມູນຂ່າວສານ, ໄປມາຫາສູ່ຊຶ່ງກັນ ແລະ ກັນ. ມາຮອດທ້າຍປີ 2019-2022 ການພົວພັນປະສານງານແມ່ນບໍ່ເປັນປົກກະຕິ ຍ້ອນການແຜ່ລະບາດຂອງພະຍາດໂຄວິດ-19 ຈຶ່ງໄດ້ມີການປິດດ່ານຈຸດສຸມລະໂກ ຊຶ່ງໃນເມື່ອກ່ອນການຮ່ວມມື, ອໍານວຍຄວາມສະດວກ ແລະ ຄວາມປອດໄພໃນການເຂົ້າ-ອອກເມືອງຕາມຈຸດຜ່ານແດນເມືອງກັບເມືອງ, ຜ່ານມາທາງເຈົ້າໜ້າທີ່ ຕມ ຈຸດສຸມລະໂກໄດ້ມີການປະສານສົມທົບກັບເຈົ້າໜ້າທີ່ ຕມ ຕະຫຼຸງໃນການອໍານວຍຄວາມສະດວກເຂົ້າ-ອອກເມືອງ ທີ່ມີຈຸດປະສົງເດີນທາງຂ້າມໄປຊື້ສິນຄ້າ ເຄື່ອງອຸປະໂພກ-ບໍລິໂພກ, ໄປປິ່ນປົວພະຍາດ ຫຼືມີຈຸດປະສົງໄປທ່ອງທ່ຽວຢ້ຽມຢາມພີ່ນ້ອງ ແລະອື່ນໆ.

ມາຮອດປະຈຸບັນ, ສະພາບການຕ່າງໆໄດ້ຜ່ອນຜັນໄປທາງທີ່ດີຂຶ້ນ, ຫຼາຍປະເທດໃນໂລກໄດ້ມີການເປີດປະເທດຕ້ອນຮັບນັກທ່ອງທ່ຽວການຄ້າຂາຍເລີ່ມກັບມາເປັນປົກກະຕິ, ການໄປມາສະດວກສະບາຍຂຶ້ນ ສປປ ລາວ ແລະ ສສ ຫວຽດນາມ ໄດ້ເລີ່ມເປີດປະເທດໄປມາຫາສູ່ໂດຍຜ່ານດ່ານສາກົນແດນສະຫວັນ ແລະສະໜາມບິນສາກົນ, ແຕ່ມາຮອດມື້ນີ້ດ່ານປະເພນີຈຸດສຸມລະໂກ, ດ່ານຕະຫຼຸງ, ດ່ານບ້ານແຈງ ແລະ ດ່ານບ້ານໃໝ່ວັງເລິກ ສາມາດເປີດໃຫ້ບໍລິການແກ່ພໍ່ແມ່ປະຊາຊົນ 2 ປະເທດກັບມານໍາໃຊ້ຄືນໃນການໄປມາຫາສູ່, ຄ້າຂາຍແລກປ່ຽນ, ຮ່ວມສືບສານວັດທະນະທໍາອັນດີງາມຂອງ 2 ປະເທດໃຫ້ຍືນຍົງຕະຫຼອດໄປ.
ຂ່າວ-ພາບ: ສະຫວັນນະເຂດ

• 15/02/2023