ປະທານສະພາແຫ່ງຊາດ ໂອ້ລົມກອງປະຊຸມວຽກຕິດຕາມກວດກາການດໍາເນີນຄະດີອາຍາທົ່ວປະເທດ

ໃນຕອນບ່າຍວັນທີ 14 ກຸມພາ 2023 ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໂອ້ລົມຕໍ່ຜົນສຳເລັດກອງປະຊຸມວຽກງານຕິດຕາມກວດກາການດໍາເນີນຄະດີອາຍາທົ່ວປະເທດຄັ້ງທີ I, ການຈັດຕັ້ງປະຕິບັດຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະພິທີມອບບັດພະນັກງານໄອຍະການປະຊາຊົນ ແຫ່ງ ສປປ ລາວ ຂອງອົງການໄອຍະການປະຊາຊົນ.

ໃນວາລະດັ່ງກ່າວທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດໄດ້ລາຍງານຜົນສຳເລັດຂອງສອງກອງປະຊຸມ ດັ່ງກ່າວຄື: ກອງປະຊຸມສະຫຼຸບບວຽກງານຕິດຕາມກວດກາການດໍາເນີນຄະດີອາຍາ ທົ່ວປະເທດຄັ້ງ I ໄດ້ໄຂຂຶ້ນໃນຕອນເຊົ້າຂອງວັນທີ 13 ກຸມພາ 2023 ແລະ ອັດລົງໃນຕອນແລງວັນດຽວກັນ ດ້ວຍຜົນ ສຳເລັດອັນຈົບງາມ. ໃນຕອນເຊົ້າຂອງວັນທີ 14 ກຸມພາ 2023 ກໍໄດ້ດຳເນີນກອງປະຊຸມສະຫລຸບການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຂອງອົງການໄອຍະກາປະຊາຊົນ ແລະຕອນບ່າຍຂອງວັນດຽວກັນ ກໍໄດ້ມີພິທີມອບບັດພະນັກງານໄອຍະການປະຊາຊົນຂັ້ນ I ຄັ້ງທີ, ກອງປະຊຸມ ໄດ້ຜ່ານບົດສະຫຼຸບຕີລາຄາວຽກງານຕິດຕາມກວດກາການດໍາເນີນຄະດີອາຍາຂອງອົງການໄອຍະການປະຊາຊົນຕະຫຼອດໄລຍະ 33 ປີຜ່ານມາ; ສະຫຼຸບການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຂອງອົງການໄອຍະການປະຊາຊົນພ້ອມທັງໄດ້ພ້ອມກັນສະຫລຸບຕີລາຄາຄືນຜົນສຳເລັດ, ຂໍ້ຄົງຄ້າງ, ບັນຫາຕັ້ງຂຶ້ນ, ບົດຮຽນທີ່ຖອດຖອນໄດ້ ແລະທິດທາງວຽກງານຈຸດສຸມໃນຕໍ່ໜ້າ.

ໂອກາດນີ້, ທ່ານ ໄຊສົມພອນ ພົມວິຫານ ໄດ້ສະແດງຄວາມຍ້ອງຍໍຊົມເຊີຍຜົນສຳເລັດຂອງອົງການໄອຍະການປະຊາຊົນໃນການຕິດຕາມກວດກາການດຳເນີນຄະດີອາຍາ ແລະ ການປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ. ພ້ອມທັງໄດ້ຊີ້ນຳວ່າ: ໃນຕໍ່ໜ້ານີ້ຈະຕ້ອງສຸມໃສ່ວຽກງານຈໍານວນໜຶ່ງເປັນຕົ້ນ ວຽກງານປັບປຸງກົງຈັກການຈັດຕັ້ງ ແລະ ກໍ່ສ້າງພັກ-ພະນັກງານ ເອົາໃຈໃສ່ຕື່ມໃນການສຶກສາອົບຮົມການເມືອງ-ແນວຄິດ, ຄຸນທາດການເມືອງ, ເອົາໃຈ ໃສ່ກໍ່ສ້າງພະນັກງານໄອຍະການປະຊາຊົນ ຕິດພັນກັບການສ້າງຂະບວນການວຽກດີຄົນເດັ່ນ ຕາມຄໍາຂວັນ 3 ມີ 4 ຮັບປະກັນ ແລະຕາມມາດຕະຖານທີ່ໄດ້ກໍານົດໄວ້ໃນກົດໝາຍວ່າດ້ວຍ ພະນັກງານ-ລັດຖະກອນ; ເພີ່ມທະວີການຕິດຕາມກວດ ກາການປະຕິບັດກົດໝາຍ ແລະ ສັ່ງຟ້ອງຜູ້ຖືກຫາຂຶ້ນສານ ໂດຍຜັນຂະຫຍາຍເນື້ອໃນມະຕິ ສະບັບເລກທີ 037/ຄບສພ ວ່າດ້ວຍການຍົກສູງປະສິດທິ ພາບຄຸ້ມຄອງລັດ-ຄຸ້ມຄອງສັງ ຄົມດ້ວຍກົດໝາຍ ແລະ ມະຕິສະບັບເລກທີ 112 ຂອງກົມການເມືອງສູນກາງພັກ ວ່າດ້ວຍການຍົກສູງຄຸນນະພາບການດຳເນີນຄະດີຕາມຂະບວນການຍຸຕິທຳ, ປະຕິບັດການໂຕ້ຖຽງ, ໂຕ້ແຍ່ງໃນທີ່ປະຊຸມສານຢ່າງມີປະສິດທິຜົນ; ສືບຕໍ່ສ້າງກົນໄກປະສານງານ ລະຫວ່າງ ອົງການໄອຍະການປະຊາຊົນ, ອົງການສືບ ສວນ-ສອບສວນ ແລະ ສານປະ ຊາຊົນ ຂັ້ນທ້ອງຖິ່ນໃນຂອບເຂດທົ່ວປະເທດໃຫ້ສໍາເລັດ; ສືບຕໍ່ຈັດຕັ້ງຜັນຂະຫຍາຍ ຄໍາສັ່ງຂອງກົມການເມືອງສູນກາງພັກ ສະບັບເລກທີ 02/ກມສພ, ມະຕິສະບັບເລກທີ 04/ສພຊ ຂອງສະພາແຫ່ງຊາດ, ຄໍາສັ່ງຂອງທ່ານນາຍົກລັດຖະມົນຕີ ສະບັບເລກທີ 19/ນຍ ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ,ໃຫ້ຮັບປະກັນ 3 ຫລັກການຕົ້ນຕໍ ຂອງການຈັດຕັ້ງປະຕິບັດວາລະແຫ່ງຊາດ ຄື: ຄວາມເດັດຂາດ, ຄວາມໂປ່ງໄສ ແລະ ຄວາມເປັນມືອາຊີບ; ຕັ້ງໜ້າປະຕິບັດແນວທາງການຕ່າງປະເທດຂອງພັກ ແລະ ລັດ ຢ່າງເປັນເຈົ້າການ ແລະ ມີຜົນສໍາເລັດຕົວຈິງ ໂດຍຮັບປະກັນຕ່າງຝ່າຍຕ່າງມີຜົນປະໂຫຍດຮ່ວມກັນ, ເປີດກວ້າງການພົວພັນຮ່ວມມືກັບປະເທດອື່ນໆ ກໍຄື ອົງການຈັດຕັ້ງສາກົນ ເພື່ອຍາດແຍ່ງບົດຮຽນ, ເຕັກນິກ, ເຕັກໂນໂລຊີ ແລະ ທຶນຮອນມາພັດທະນາວຽກງານໄອຍະການໃຫ້ກ້າວໜ້າ ແລະ ທັນສະໄໝ; ສືບຕໍ່ປັບປຸງແບບແຜນ ແລະ ວິທີການນໍາພາຂອງພັກ ຕໍ່ວຽກງານໄອຍະການໃນນີ້, ໃຫ້ລົງເລິກປັບປຸງຮາກຖານການເມືອງຢູ່ໃນແຕ່ລະໜ່ວຍພັກ, ຢູ່ໃນແຕ່ລະກົມກອງຂອງອົງການໄອຍະການປະຊາຊົນ, ຄົ້ນຄວ້າມາດຕະການສະກັດກັ້ນຕໍ່ເປົ້າໝາຍທີ່ມີພຶດຕິກໍາລະເມີດກົດໝາຍ ແລະລົງວິໄນຕໍ່ຜູ້ລະເມີດ, ພ້ອມກັນຜ່ານຜ່າຄວາມຫຍຸ້ງຍາກນາໆປະການຈົນສາມາດປະຕິບັດສໍາເລັດໜ້າທີ່ພັກ ແລະ ລັດມອບໝາຍໃຫ້ຕາມລະດັບຄາດໝາຍທີ່ວາງໄວ້.

แชร์