ເຊກອງ ສະຫຼຸບການຈັດຕັ້ງແຜນງົບປະມານແຫ່ງລັດປະຈໍາປີ 2022

ກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2022 ແລະ ທິດທາງແຜນການປີ 2023 ໄຂຂຶ້ນໃນຕອນເຊົ້າວັນທີ 14 ກຸມພານີ້ທີ່ສະໂມສອນຫ້ອງວ່າແຂວງ, ພາຍໃຕ້ການເປັນປະທານຂອງທ່ານ ຄໍາຮູ້ ອ່ອນມະນີ ກໍາມະການພັກແຂວງ, ຫົວຫນ້າພະແນກການເງິນແຂວງ ແລະ ເປັນກຽດເຂົ້າຮ່ວມມີທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ, ຜູ້ຊີ້ນໍາເສດຖະກິດຂັ້ນແຂວງ; ຫົວໜ້າ-ຮອງຫົວໜ້າພະແນກ, ຫ້ອງການ, ອົງການທຽບເທົ່າອ້ອມຂ້າງແຂວງ ແລະ ຫ້ອງການໆເງິນ 4 ຕົວເມືອງເຂົ້າຮ່ວມ.

ໂອກາດນີ້ ທ່ານ ວົງມະນີ ແກ້ວນະຄອນ ຮອງຫົວໜ້າພະແນກການເງິນແຂວງ ໃຫ້ຮູ້ວ່າ: ໃນປີ 2022 ຜ່ານມາ ແຂວງເຊກອງສາມາດຈັດເກັບລາຍຮັບເຂົ້າງົບປະມານໄດ້ 157,43 ຕື້ກີບ ທຽບໃສ່ແຜນດັດແກ້ເທົ່າກັບ 132,46% ທຽບໃສ່ປີ 2021 ເພີ່ມຂື້ນ 50% ໃນນັ້ນ ລາຍຮັບພູດສູນກາງມາປະຕິບັດຢູ່ທ້ອງຖິ່ນ 7,95 ຕື້ກີບ ທຽບໃສ່ແຜນເທົ່າກັບ 190,62% ທຽບໃສ່ປີ 2021 ເພີ່ມຂຶ້ນ 50% ແລະ ລາຍຮັບພູດຂອງແຂວງ 149,48 ຕື້ກີບ ທຽບໃສ່ແຜນເທົ່າກັບ 130,34% ທຽບໃສ່ປີ 2021 ເພີ່ມຂຶ້ນ 51%. ສ່ວນດ້ານລາຍຈ່າຍປະຕິບັດໄດ້ 382,44 ຕື້ກີບ ທຽບໃສ່ແຜນເທົ່າກັບ 99,13% ໃນນັ້ນມີລາຍຈ່າຍງົບປະມານປົກກະຕິ 377,07 ຕື້ກີບ ທຽບໃສ່ແຜນເທົ່າກັບ 99,13% ແລະ ຈ່າຍເງິນບໍລິຫານວິຊາການ 5,36 ຕື້ກີບ ທຽບໃສ່ແຜນເທົ່າກັບ 98,89%. ຂະນະທີ່ບັນດາເມືອງຄື: ເມືອງລະມາມ ເກັບລາຍຮັບໄດ້ 5,02 ຕື້ກີບ ທຽບໃສ່ແຜນເທົ່າກັບ 126,49%; ເມືອງທ່າແຕງ 5,29 ຕື້ກີບ ເທົ່າກັບ 131,41%; ເມືອງດາກຈຶງ 6,23 ຕື້ກີບ ເທົ່າກັບ 132,83% ແລະ ເມືອງກະລຶມເກັບລາຍຮັບໄດ້ 6,3 ຕື້ກີບ ທຽບໃສ່ແຜນເທົ່າກັບ 124,25%.

ທ່ານຮອງຫົວໜ້າພະແນກການເງິນໃຫ້ຮູ້ຕື່ມວ່າ: ສໍາລັບທິດທາງແຜນການໃນການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2023 ແຂວງເຊກອງ ຈະສູ້ຊົນເກັບລາຍໃຫ້ໄດ້ທັງໝົດ 234 ກ່ວາຕື້ກີບ, ໃນນີ້ລາຍຮັບຂອງສູນກາງມາປະຕິບັດຢູ່ທ້ອງຖິ່ນໃຫ້ໄດ້ 10 ຕື້ກີບ; ລາຍຮັບຂອງແຂວງໃຫ້ໄດ້ 224,52 ຕື້ກີບ ແລະ ຄຸ້ມຄອງລາຍຈ່າຍໃຫ້ຢູ່ໃນລະດັບ 305,03 ຕື້ກີບ, ທັງນີ້ກໍ່ເພື່ອລິເລີ່ມການປະຕິບັດການຫັນໃຫ້ລາຍຮັບຂອງແຂວງສາມາດກຸ້ມຕົນເອງທາງດ້ານລາຍຈ່າຍພາຍໃນເທື່ອລະກ້າວ.

ໃນໂອກາດນີ້, ຍັງໄດ້ເຜີຍແຜ່ດຳລັດຂອງນາຍົກລັດຖະມົນຕີ ວ່າດ້ວຍການປະຢັດ ແລະ ຕ້ານການຟຸມເຟືອຍ, ຂໍ້ຕົກລົງຂອງລັດຖະມົນຕີກະຊວງການເງິນ ວ່າດ້ວຍການກຳນົດຫມາຍໃຊ້ຈ່າຍງົບປະມານຂອງລັດ, ການປະຢັດ ແລະ ຕ້ານການຟຸມເຟືອຍ ແລະ ຄໍາແນະນໍາຂອງທ່ານເຈົ້າແຂວງ ວ່າດ້ວຍການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2023.

แชร์