ສຸນິຕ້າ ພິມມະສອນ ແນະນຳປຶ້ມອາຊີບຂອງຂ້ອຍ

   ພິທີແນະນຳປຶ້ມອາຊີບຂອງຂ້ອຍໄດ້ຈັດຂຶ້ນໃນວັນທີ 28 ມີນາ 2019 ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ວິ ລະວອນ ພັນທະວົງ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະກີລາ ນະຄອນຫຼວງວຽງຈັນ ບັນດາຄະນະນຳສູນກາງຊາວໜຸ່ມ, ຕາງໜ້າກະຊວງອຸດສາຫະກຳ ແລະການຄ້າ ແລະ ພ້ອມດ້ວຍສະມາຄົມນັກປະພັນລາວ, ສຳນັກພິມໄວເດັກ ແລະ ພາກສ່ວນກ່ຽວຂ້ອງ.

  ປຶ້ມອາຊີບຂອງຂ້ອຍຂຽນໂດຍ ນາງ ສຸນິຕ້າ ພິມມະສອນ ຊຶ່ງເປັນຜູ້ປະກາດຂ່າວໂທລະພາບແຫ່ງຊາດລາວປຶ້ມດັ່ງກ່າວໂດຍມີແຮງບັນດານໃຈໃນການຂຽນຈາກການທີ່ໄດ້ເຫັນສະພາບແວດລ້ອມ, ໄດ້ໂອ້ລົມພົບປະໄດ້ເຂົ້າຮ່ວມກິດຈະກຳຕ່າງໆຂອງສັງຄົມ ແລະຊາວໜຸ່ມເຊັ່ນວ່າ: ໄດ້ໄປສຳພາດນ້ອງນັກຮຽນ, ໄດ້ໄປເປັນພິທີກອນງານມອບຮັບທຶນການສຶກສາໃຫ້ກັບນັກຮຽນ,ໄດ້ໄປເປັນພິທີກອນງານຕະຫຼາດນັດແຮງງານ, ການຈັດຫາງານຢູ່ນະຄອນຫຼວງ ແລະຕ່າງແຂວງ, ການລົງໄປພົບປະກິດຈະກຳຊາວໜຸ່ມຊຶ່ງໃນໄລຍະ 3-4 ປີທີ່ຜ່ານມາ ສຸນິຕ້າ ພິມມະສອນ ໄດ້ລອງຂຽນຄຸກຄີພ້ອມໄດ້ພົວພັນກັບຊີວິດຂອງນັກຮຽນມັດທະຍົ ມຕອນປາຍຈົນປະສົບຜົນສຳເລັດແລ້ວຂຽນປຶ້ມນີ້ອອກມາ,ປຶ້ມອາຊີບຂອງຂ້ອຍມີເນື້ອໃນຄວາມໝາຍສຳລັບນ້ອງນັກຮຽນທີ່ກຳລັງຮຽນຈົບຊັ້ນ ມ.ປາຍ ໂດຍບົ່ງບອກໃຫ້ຄວາມຮູ້ວ່າຕົນເອງມັກດ້ານໃດ, ຢາກເຮັດອາຊີບຫຍັງ, ເມື່ອຮຽນຈົບແລ້ວຈະໄປຮຽນໃສຕໍ່? ຕົນເອງມີຄວາມຖະໜັດຫຍັງເປັນພິເສດ ແລະລວມເຖິງການໃຊ້ຊີວິດຂອງຕົນໃນໄວຮຽນເຮັດແນວໃດໃຫ້ຄຸ້ມຄ່າທີ່ສຸດ.

   ປຶ້ມອາຊີບຂອງຂ້ອຍແມ່ນຜົນງານທຳອິດຂອງ ສຸນິຕ້າ ພິມມະສອນ ທີ່ໄດ້ກັ່ນຕອງຈາກນ້ຳມຶກແຫ່ງຈິດວິນຍານ ແລະ ຄວາມຕັ້ງໃຈທີ່ຢາກຊ່ວຍແນະນຳຊີ້ທາງໃຫ້ໄວໜຸ່ມ, ນ້ອງນັກຮຽນ, ນັກສຶກສາໃຫ້ມີສັກກະຍາພາບໃນການຮຽນຮູ້ເຂົ້າໃນການຮຽນຢ່າງມີເປົ້າໝາຍມີອຸດົມການ ແລະການປະກອບອາຊີບຕາມຄວາມຕ້ອງການຂອງຕົນເອງ ແລະຄວາມຕ້ອງການຂອງຕະຫຼາດແຮງງານພາຍຫຼັງທີ່ຮຽນຈົບ.

ໂດຍ: ແພງຕາ

• 05/04/2019