ຜູ້ແທນຊາວໜຸ່ມລາວ ຮ່ວມກອງປະຊຸມສຸດຍອດຊາວໜຸ່ມອາຊຽນ-ອິນເດຍ ຄັ້ງທີ IV

ຄະນະຜູ້ແທນ ຊາວໜຸ່ມປະຊາຊົນປະຕິວັດລາວຈາກຄະນະພົວພັນຕ່າງປະເທດສູນກາງພັກ, ກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ, ກະຊວງການຕ່າງປະເທດ, ກະຊວງອຸດສະຫະກຳ ແລະ ການຄ້າ, ສູນກາງຊາວໜຸ່ມປະຊາຊົນ ປະຕິວັດລາວ, ວິທະຍາໄລ ຣັຕະນະບໍລິຫານທຸລະກິດ, ພິພິທະພັນຜ້າໄໝລາວ ແລະ ສູນມືແຫ່ງຄວາມຫວັງໄດ້ເດີນທາງເຂົ້າຮ່ວມກອງປະຊຸມສຸດຍອດຊາວໜຸ່ມອາຊຽນ-ອິນເດຍ ຄັ້ງທີ IV ຢູ່ແຂວງໄຮເດີຣາບັດ, ເທລັງການາ ປະເທດອິນເດຍ ໃນລະຫວ່າງວັນທີ 12-16 ກຸມພາ 2023 ໂດຍມີຊາວໜຸ່ມມາຈາກ 10 ປະເທດອາຊຽນ, ຊາວໜຸ່ມປະເທດເຈົ້າພາບ, ບັນດາ ຄະນະກຳມາທິການມູນນິທິອາຊຽນ-ອິນເດຍ ແລະພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ໄດ້ເປີດໃຫ້ຊາວໜຸ່ມແຕ່ລະປະເທດນຳສະເໜີກ່ຽວກັບປະເທດຕົນເອງໂດຍສະເພາະກ່ຽວກັບປະຫວັດສາດ, ການເມືອງ, ເສດຖະກິດ, ກິລາ, ມໍລະດົກ, ວັດທະນະທຳ ແລະການທ່ອງທ່ຽວ, ເຊິ່ງຊາວໜຸ່ມປະຊາຊົນປະຕິວັດລາວໄດ້ນຳສະເໜີກ່ຽວກັບປະເທດລາວເປັນຕົ້ນແມ່ນດ້ນຳສະເໜີທີ່ຕັ້ງພູມສັນຖານ, ມໍລະດົກໂລກ, ວັດທະນະທຳ ແລະການທ່ອງທ່ຽວ ຢູ່ ສປປ ລາວ ເຮັດໃຫ້ຜູ້ເຂົ້າຮ່ວມປະຊຸມຈາກປະເທດອິນເດຍ ແລະບັນດາປະເທດໃນອາຊຽນໄດ້ຮັບຮູ້ກ່ຽວກັບປະເທດລາວ ຫລາຍຂຶ້ນ.

ໂອກາດນີ້, ຍັງໄດ້ຮັບຟັງການບັນຍາຍ-ແລກປ່ຽນບົດຮຽນກັບຊ່ຽວຊານ, ຄູອາຈານ, ຄະນະນຳຂອງກະຊວງຍຸຕິທຳ, ກະຊວງວັດທະນະທຳ, ສະຖາບັນການຄ້າຕ່າງປະເທດ, ຄະນະກຳມາທິການມູນນິທິອາຊຽນ, ຄູອາຈານຈາກມະຫາວິທະຍາໄລເດວລີ ກ່ຽວກັບຫົວຂໍ້ພາວະຄວາມເປັນຜູ້ນຳ ແລະ ການວາງນະໂຍບາຍ, ປະຫວັດສາດ ແລະວັດທະນະທຳ ທີ່ເຊື່ອມໂຍງຮ່ວມກັນ,ການສ້າງຜູ້ປະກອບການ ແລະພັດທະນາທັດສະໃຫ້ກັບໄວໜຸ່ມ, ເຕັກໂນໂລຊີ ແລະການສ້າງສະຕາດອັບ,ໂຄງການພັດທະນາພື້ນຖານໂຄງລ່າງເຊື່ອມໂຍງອາຊຽນ-ອິນເດຍ.

ໂອກາດເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນຊາວໜຸ່ມປະຊາຊົນປະຕິວັດລາວຍັງໄດ້ເຂົ້າຮ່ວມກິດຈະກຳທ່ອງທ່ຽວໃນດິນແດນພະຈົນໄພ, ຢ້ຽມຊົມເຂດເມືອງພັດທະນາເຕັກໂນໂລຊີ(IT city), ທ່ອງທ່ຽວຢູ່ທະເລສາບ ຮັດຊານ ຊາກ້າ ແລະກາບໄຫວ້ຮູບປັ້ນພະພຸດທະເຈົ້າ ແລະເຂົ້າຮ່ວມແລກປ່ຽນສິລະປະ-ວັດທະນະທຳ ຮ້ອງ-ຂັບລຳ, ຟ້ອນລຳວົງ, ເຕັ້ນລຳໄປຕາມລັກສະນະສະເພາະຂອງແຕ່ລະປະເທດ ແລະຮ່ວມກິດຈະກຳອື່ນໆ.

• 14/02/2023